MÜNGOKESÜ 9 - KETHOLESI KESAO N.T. (BSI)

Thecü pünguo

¹ Tüyochoyi pünguo thecü füsü, I ngotsü thenyü pü tüyo no retu cejü tsüta, uthüla kede kece ce cabi pü pü tsü va.

² M pü uthüla kedi kece ce khri sü; mekho kece ce lü, methü kesü kezhopü mekho, nace mu tükhrako zübü ta mekho la.

³ Ko mekholü prari ta cejüyo; kekupü uko tsü sü cejü lü seba tsü bi

⁴ M ukopo nha kemejo jü meshüva hi no uko ce posü, kemejo kekreko sheri, mori süko sheri, veli thema utükhalü mohor vü kemoko lebi.

⁵ Uko dokhri va ho, veli uko methi meni tsü zoto tükhri püngu; seba thüma keyi tsü bi uko kemezheto.

⁶ M tüsozho hidoce hi thümako sata nyüsa de kesa phuto, veli kesa zü kesü motato; kesa sü ta keta la.

⁷ Koko uhü gura therilü voketola dojüpü ketabi; uko piyo suna kedepirabi, uko zü pepü thüma zübi

⁸ Uko pitha thenomi pitha bi, uko huko Losha huko bi

⁹ M uko meyiko thegi pü kethi yi bizo; mu uko gura gari kekro kehu keta pü bi usiko fü therilüvo kezübi.

¹⁰ Umeko seba mebi, umeyo ukeyi tsü ta; ukopo tükhri püngu thüma methi to.

¹¹ M kedepü uko züta, tüyochoyimi pü thüla kedi kece ce kefü-o, Hebrew mizülü püza “Abaddon” veli a Greekmi jülü püza “Apollyon.”

¹² Lüzhe pü tata, lüzhe kekre kena la vori sala.

Thecü shurüo

¹³ Tüyochoyimi shurüo thecü füsü m I setsü thefüpü Jihova mhüjülü suna kereshübayo uka dao prari.

¹⁴ Tüyochoyi shorüo cepode thecü khikeba-o tüyochoyimi dako Euphrates lü phapü kemütako hesü vate.

¹⁵ Muko hesüva, uko thüma zasühzapü dokhri ketola dojüpü prata, bavüdopü, tüsozhopü, tükhripü, m tütsepü.

¹⁶ Pü maphri million kra kena; I uko piphri se.

¹⁷ I zümholü uko gurakongo sükoyo ketakori, uko yikoyo mepüta, jacinth metsa; gura piko losha pikobi; uko ta kolü me, mekho, mu metsa prari.

¹⁸ Hizi ketala thüma zasühzapü sata, meyo, mekho mu metsayo, uko talü prari ta.

¹⁹ Uko keku uko talü ba, uko meyoba; uko meyo tenhi bi mu upi ba mha methi ketola.

²⁰ Thüma kekreko dokhri vamo tüso hilü, veli ukothelü redemo, ukobe mhathoko, uko therükeshüko, pitol pü kethiko, ketsüzhüko, süpü kethiko; süko mhangoriyomo, se ri yomo mori tariyomo.

²¹ Mori uko kedokhri lüko uko lü kedeyi mo, mori thenyü ketikolü, mori keregü kerezhü kolü, mori uko rügo kolü ri.