MÜNGOKESÜ 8 - KETHOLESI KESAO N.T. (BSI)

Mohorko

¹ Pü mohor thünao phrü sü, süce bavüdo ketüpü kemekre zü bata.

Tüyochoyimi Thüna, thecü thüna

² A kengo, tüyochoyi thüna Jihova kedeba mhüjü thatha; thecü thüna pü uko tsüsü.

³ M tüyochoyimi kekrepü voride kereshüba ce thata, süna fü kethüzhü; m mharü kethenyü kekro pü pü tsüsü, side püpo kemesümi kecho pü suna kereshüba yo kedeba mhüjü keba yo reshü thi no sü.

⁴ M mharü kethenyü mekho kemesako kechoko tüyochoyio belü kho Jihova mhüjü lü khota.

⁵ Tüyochoyio me Kereshübayo keba pü mekhu lü süde kehüpü cejü süva; sülü füphra, tüsü, methakri, m cecesü.

⁶ Tüyochoyimi thünako thecü thüna khi füsü keto la dojü pü bata.

Thecü kerao

⁷ Tüyochoyimi kerao thecü fü sü, siri phrü, meko thüza sa kerede kehüpü cejü sü va; sü zasü zapü sata, m nha kemejo metü thü va.

Thecü kenao

⁸ Tüyochoyimi kenao thecü füsü, ri cejütu meto bi kehüpü jülü süva, süsa jükezho zasü zapü thüza meveta.

⁹ Siri jü kezho hü keta khonuko sata; ru zasü zapü mekava.

Thecü Süo

¹⁰ Tüyochoyimi süo thecüfüsü siri thenyü kezhopü metopü metobü kezhopü bi retu kerü zasü zapülü tsü ta, mu jüri lüko tsüta.

¹¹ Thenyü sü za khu; jüko zasü zapü khu mezü mühata, jü kekhu la thüma kekro sata, kekrelamori jüko thipü khumezü ketala.

Thecü dao

¹² Tüyochoyimi dao thecü fü süri nace zasü zapü vüsü, khri zasü zapüri sa, mu thenyü zasü zapü; süko meü zasü zapü zübü ta, tüso zasü zapü va mota, mu tüzü ri sübi.

¹³ A kengo, tüyo choyimi pü tü metsu lü prüde füphrameto ti, “lüzhe, lüzhe, lüzhe cejü kehü miko püco tüyochoyimi kekre sü thecü füsa sü ketola.”