MÜNGOKESÜ 6 - KETHOLESI KESAO N.T. (BSI)

¹ Tekonuo mohor zhü kemeta phrü kesü I ngo, mu thetsü fü bi se, khonu dako mipu pode, “vori pete,”

² M I ngoti, gura kekropü, püyo ketao lice pü ba; kedepira pü pütsüsü; to mi meni m pfü keto la ta prata.

³ Pü mohor kevü kenao phrü sü, siri khonu kenao poti, “vori pete” sitsü I se.

⁴ Gura kekre pü mere de ta prata; cejü lü kezükeve pü tata ketola keku püyo ketao sü sü, m uko hunehu dokhri node, zevo kezhopü kha pütsü sü.

⁵ Pü mohor 3-o phrü süri khonu 3-o pode ace “hice vori pete” sitsü se, a kengo ce, gura ketüpü süyo ketao mha meshi mede ketsü khu püta.

⁶ Khonu dako dolü mhafü pü se, “ata (telha) Medo ketsü presa pü, chü rhasü presa pü; tirü mu hezo pü keho thi va hite,”

Mohor dao mu kesa

⁷ Pü mohor dao phrü süri khonu dao mha kepo I se, “vori pete.”

⁸ I Meho sü, gura petsü pü; mipü püyo kebao za kesa mu meza, ni püa ta. M keku cejü zada pü pü tsüsü, zecho pü dokhri ketola, khümeri, m kesa, cefü lü khonuko.

⁹ Pü mohor pü ngu phrüsü, A kengo kereshü ba khro Jihova jüla mipo u dokhri ke vako rüpü sülaba, uko süo zhopo kola;

¹⁰ Uko füphra meto shude poti, “Dithe chota, O Niepo, mesa mu kethozo tsüo; no hako za khüpo sü motame cejü lü hü kebako yo?”

¹¹ Fü kekropü uko tsüsü; mu posüte, uko ce, ukopo dopü relü ba no zita, ukezümiko, mu usazüjürako ri dokhri pü uko bi ba zo tsü la, popü kemetako thi tsoyi ketola.

¹² Mohor shurüo phrü kesü I ngo, siri hihe, cece süphita; nace zü tü müka thepitha fü bita, khri thüza bita.

¹³ Tüyo thenyüko n ra cejü tsü ta, chüdüse pü tü kemolü nra ketabi, tükhra kerü po pü hüra keva bi ta.

¹⁴ Tü rülo lesi thsü kezi kevabi, cejütuko mu rethitso kemoko utho uthi lü ba mo ta.

¹⁵ Cejü kedemiko, thüma kezhoko, kenemiko, thipahe kezhoko, thüma kekuko, thejümi ri, mali miri tavo cejü khü kolü mu ketsü do kolü cejütu doko lü resü to.

¹⁶ Cejütu mu tsüroko cepode, “Ta tsü ha kra ta te de hapo kede bayo kebao mhüjülü resüta te,

¹⁷ mu lekhu tüso vorite; sopü pümhüjülü thayi veta?”