MÜNGOKESÜ 3 - KETHOLESI KESAO N.T. (BSI)

Sardis kehuce kha kesü jü

¹ Tülü choyimi Sardis lü kebao ce tha kesü; Hiko pokesü Jihova Rüpü thüna kebao po; thenyü thüna; I nmhathoko se, no rhü ta zo leno thüza pü ba m sa ta te.

² Fü menu bate, mesho kebako thi kemetü yi te, sata too kebako; n mhathoko vetsütso mo keta ngo bate Jihova mhüjülü.

³ N sa rükra süte, no kedipü bide seyi mu ngoyi sheli, thezü metayi mu thelü rüdeyi te. Mhace no fü menu ba mota lize, I kerügomi bi ta nce vori tato, Pütü di püce vori to sheli no se kemolü.

⁴ No thüza huba Sardis lü ufüne merho kemo; m uko ufüne kekro khi a zü ta to; uko khishü keta la.

⁵ Somi thashi sümi füne kekro pü benene süto; kerhü lesidalü I püza va va ho, veli Apo mu tüyo choyimiko mhüjülü pü za po süto.

⁶ U ni kene mipo Rüpü kehuko ce kepofü neni yite.

Philadelphia kehuce jü kha kesü

⁷ Thopü Philadelphia kehuce kesü, mhahiko kepoo mesa, ketho, m David cabi püba, pü mi pü ri kha yiho, kha kevasa mipüri süo khri yiho;

⁸ I n mhathoko se, hihe, I cekha khri pü n mhüjü kha mba, m mipüri süo kha yiho; n kepfü kedopü ba tsü la, a jü zükeyila, m aza mela va kemola.

⁹ Hihe, I süko thüpü Satan kese shü ce thi va to, uko Jewmi le poyo, veli mo, uko meda; I uko thipü n mhüjü n phece reshü süto, ukopo I nkhrü keba seyi keto la.

¹⁰ Kekrelamori no ajü sügüsühe ketsü thi keyila, kedo ketsülü I n yo yito, cejü metülü dophi süsü voto.

¹¹ Hihe, I mhai vori tato; metü tha zote, mikekremi po n kede pira sü khita mo keto la.

¹² Pü pfü keyio püpo Jihova kehu celü sütüco thito, m püpo ta sa hote; I püyo a Rüo zatho pü tsüto, a Rüo nade za, m aza kesao ri thosapü pü tsü süto.

¹³ Püni kebao po Rüpü kehukoce kepo füreni yite.

Laodicea kehuce kepo

¹⁴ Laodicea kehu lü keba tüyochoyimi ce tho kesü; Amen, kemelü kethepu zhopolü kethothi, Jihova süculü thikesüo.

¹⁵ N mhathoko I se, no mekorimo lürimo; no meko ta mori lüri ta ze a nü to ri.

¹⁶ Kekrelamori no lüwi ketsüla, mekomo, thilümo, a mülü n mehe kha vato.

¹⁷ Kekrelamori no poti I mhane, vekehe bate azhüko, I mhakhi sa nsa mote; no hesheherü thiba keta no setha mote, kemechü kemerü, mhadi, n mhüce, mu mechükeba.

¹⁸ I npo suna melü thü keva khriyi node kepo, side n kemethu mipo ngo hite; n mhü kenhü ketsü kha kenhüyite, side no mhango yite.

¹⁹ I khrü ketsüko lekhu süyo, m methi süyo; n nüsai m rhürha yite, nlü kede yite.

Khrista kehu kecü

²⁰ Hihe, I cekha ce thade cekha ketu bayo; Mhace lami afü sede cekha khri sü lize, I pücelü lüto side püpo azü hi m I püzü hi to.

²¹ Thakeyimi I kedebalü püpo bato, I pfü keyibi de Apo kedebalü ba keyi bi.

²² Pü uni keneo po reni yite, Rüpü kehuce kepofü.