MÜNGOKESÜ 2 - KETHOLESI KESAO N.T. (BSI)

Ephesus ce jü khakesü

¹ Ephesus lü keba tüyochoyio ce jütho kesü: thenyü thüna ube uzaco pü kebao mhahiko poyo, pü suna meto thüna dolü ta kebao

² I n mhathoko m thikebako ngo, sügüsühe ketsüko, no mikemedako zü yo kemo; mu somi apostle mi le po veli kemedami;

³ M sügüsühe de azala mhathothi de n nyü ta yo kemo.

⁴ Sizo sheri n yo a nü kemo huba, kekrelamori no n kekhrü kerao kha kevala.

⁵ Süla nsa lü sü de no dipüce retu ta sheli de nlü kedeyi de mhatho kerao thiyite; molize n ce mhai voritato, suna meto n yo kebao pü vato n thilü, nlü rüde mota lize.

⁶ Veli no ri Nicolaitanes kemetha n nümo I ri tsüo ngometsü.

⁷ Uni kebao po jü Rüpü kehako ce kepo reniyite; Somi thatosheli I kerhüsü pü püpo tito, süo paradise metsu lü ba. (Jihova rüna).

Smyrna kehu cekepojü

⁸ Tho pü Smyrna kehu tüo choyio ce kesü; Mha hiko kepo Thüra-o m kekhao, sakeva-o m rhüta ketao.

⁹ I se n mhatho, n mezhe, ntsakhu (veli no mhane) I se kemeda (niepoo zho shü latsü) uko Jewmi le si veli mo, veli Satan kehu lü ta yo.

¹⁰ Mice pohi, no kemezhe ketoko; Therükeshü-o neko humi tü pü Thejücelü süto, side n ne ketito; side zho kerü kemezhe ta to; kesa ketso sheri kemelü thazote, size I kehü kedepira pü ntsü to.

¹¹ U ni kenemipo Rüpü kehuce kepofü reni yite; somi thayisheli kesa kenao po pü methi saho.

¹² Pergamos kehu tüyo choyio cetho kesü; zecho uyi licohivo kebao po kesü;

¹³ I n mhathoko se, m n kehüthi, Satan kebathi: no aza khi metükeba, a kemelü melakemo, Antipas a kemelü la dokhri kevao balü mi po püdokhrive, Satan Thethi lü.

¹⁴ Veli mhahulü a nütso kemoba, n celü Balaam no Balak methapü Israel mi nuneko chokha kethiko züba, marhe kereshü coko ti nozi, de uko po regürezhü tsü thi keto la.

¹⁵ Süla no Nicolaitans dorhüko I ngometsü kebako ri züba.

¹⁶ Thelü rüdeta te, molize I mhai nce vori tato, m I talü zecho khi sükho merha ta to.

¹⁷ Uni kenemi Rüpü kehukoce kepo reni yite; pfü keyiko I kevapü meta ketsü manna pü püpotito, side ketsü kemega pü pütsü süto, ketsüyo theza kesa tho kesü, mi püri sekemo, ngokeyio thozo kemosa.

Thyatira kehuce kesü jü

¹⁸ Thyatira kehulü keba tüyochoyi cetho kesü: Jihova Nu hiko po sü, pü mhüni meli bi, püphezi ni pitol kemeva bi;

¹⁹ I se n mhatho, n kekhrühi, nyitho, n kemelü, n sügüsühe ketsü, n mhathoko; thelako kerako ce thipfü ketsü.

²⁰ Sizosheri I mhahu nyo anü tso kemoba, no Jezebel choyithi, pü saju kepopü le poyo, a choyi mi swu ketsepü uko po keregü kerezhü thiyo, marhe kereshüzhüko tino zi yo.

²¹ Mu I pütü pü pütsü sü thelü rüde ketola; veli pü rüde mute.

²² Hihe, I pü kehüpü thezilü sü vato, m püzü regürezhü ketako po kemezhe shu süto, uko thelü rüde ta kemosa, uko mhatho kolü.

²³ M I kesa pü pünuneko mesa vato; m kehu metüko I uko mhathoko, uko melüko phu kega keta seyito; m neko mipüpü ketsü mhatho khü cezüde zhokhro I kha süto.

²⁴ Veli I neko Thyatira lü kebako ce po yo, neko thezhokesü zü kemoko, m Satan do kemesüko seyo kemoko; I thepü kemeshi kekre kha neko tsü sa ho.

²⁵ Veli no melü ketayo pü metü ba zo te I vori kemothe.

²⁶ M sopü tha sheli mu a mhathoko thi ba pütü thela tso sheli I kepfü rünako pi pü tsü süto.

²⁷ M pü thegi kepfü khi shuyeko kekha to; mhabüko le kethio jüphro kesü bi I Apo celü ngo keyi bi.

²⁸ M I keshuo thenyü pü pütsü süto.

²⁹ Uni keba mi Rüpü kehukoce kepo fü reni yite.