MÜNGOKESÜ 17 - KETHOLESI KESAO N.T. (BSI)

¹ Tüyochoyi thünako dolü mipü pori, pühe 7 püta, de ace poti, “Hice pherite, theno tükhrü pü jü kekrolü keba thakha n meka süto:

² Cejülü kedemi kekro püzü kekhrü kezü bayo, m cejülü kehümiko pü kerügü kra mezü bayo.”

³ Süla pü rüpülü azü rayho thilü vota. Thünopü ngotsü khonu merezü ketipüyo ba, theza kekro zhoshü keti la, püko keri püpi thüna yoba.

⁴ Thenopü rolozüta ketipü pü retso thi, suna, ketsü uma kerüko, pearlsko pü pürütso thi, süna he mesakemoko, zhoshu ketsü, m keregü kerezhü süla chu pü ba;

⁵ Pü tükha lü thopü keta, “Ketekhri ketsü Babylon kezhoo, thenotükhrüko zu, mha ngokemetsü kethiko cejü metü lü”

⁶ I ngo tsü thenopü kemesamiko za krapü kemesamiko za krapü mezata, Jisu zalü mipo udokhri kevako I ngo pü a ngo thita.

⁷ Tüyochoyio “no kedipüla n ngo thi ta? I nceposüto, thenopü ketekhri ketsüko, m khonu püpo ketayo, upi thüna m püka keri kebao.

⁸ No khonu ngokebao, ngomo ketao; cejü kecece pü thüla kedipülü parito, side mi kedoto; cejülü kehümiko ungothito, cejü shüdü culü kerhü lesidalü uza thopü ta kemoko, khonu himhüjü ketao, bamo ketao, m tsüdo ketao.

⁹ Hice, mhakesemi po seyite, pi thünoko sü cejüta thünoko, thenopü kebathi.

¹⁰ Kedemi thünaba; püngu retute, pü balu, kekrepü vori molu; pü vori süzo pütü huba zoto.

¹¹ Khonu hijü kedebao, dita, pü tüthao (8) tsü thüna (7) kebao, mikedotato.

¹² Püka keri ngokebako, kedekeri, uko kederüve ngoyi molu, tsü ketso; veli khonuo ce kedemi keku bavüdo pü ngoyito.

¹³ Uko metü ulükelü (umedo) püzo, ukokeku m uko kemeco kha khonuo tsüto.

¹⁴ Neko tekonuo zü therithito, tekonu ukopi kuyito, kekrelamori pü niepoko pi Niepoo zo tsüla, kedeko piri kedeo; püzü ketako cüpü kedakeyiko, kemelü ketho thiketako.”

¹⁵ Pü a cepode, jüko no ngo keba, thenotükhrü ba ketsüo, thümako, krodeko, kedeshuyeko, ujü kekre ketsüko.

¹⁶ Uko keri no ngo kebakhonuyo, tekhrü pü ngo metsü tato, uko pü thi medi m püpo mechü tato, m uko püthi tito, de mepü pü thü vato.

¹⁷ Kekrelamori therao pü jüko kha süko melülü süde pü medo thi tsü tso va ketola, ukopo umedo kemethode uko kedeko khonuo tsü vato, therao medoko (jüko) thi tsü tsoo kemothe.

¹⁸ No thenopü ngo kebao sü nadeo zo, cejülü kedeko kekha kebao;