MÜNGOKESÜ 16 - KETHOLESI KESAO N.T. (BSI)

¹ I keresücelü mhafü pü se tüyochoyimi thünako cepode, “Neko ta neko cholü vode Jihova lekhu heko lapü cejülü süte.”

² Süko dolü kerao pü he lapü cejü lü sü, lüshüfü, uphüzotsü kethi thüma somi yo khonu marhe ba m reshüyo sheli süko yo vota.

³ Tüyochoyi mi kenao he lapü jülü sü; süko thüma sakezümi za thita; rhü keta jülü keba metüsato.

⁴ Tüyochoyimi süo pühe lapü kerülü m jürilüko sü; süko metü thüza meveta.

⁵ Jülüketa tüyochoyio poti, po mezizo, O! Niepoo voketao tsüdoketao, m hisa vori ketoo, no kemejo mhatho hiko thi süte.

⁶ Kekrelamori uko kemesako, saju kepoko za mekrüve. Thüza pü uko po krayi kekrelamori uko kra tsü mesüzo.

⁷ I kereshüba yo bala kesüse, Sizo therü Niepo kekuo n shetiko mezizo.

⁸ Tüyochoyi midao pühe lapü nace yosü; thüma methi tsü keto kekupü pü tsü.

⁹ Thüma thsü methi shüsü, kethi hio pi keku keba Jihova zho shüta; uko lü kede mode zapo zale pü Jihova tsü mota.

¹⁰ Tüyochoyi pünguo pühe lapü khonuo bayosü; pü kedeba zübü vota; Thümako kemezhephi ketala uko meyi tha parita.

¹¹ Tüyo Thürü-o zhoshü m püthata kekrelamori uko thimu kethikuko la, uko mhatholü uko lü rede mota.

¹² Tüyochoyimi shorüo pühe lapü Euphrates rü kezholü sü; ri kerü süo sota, nathoco kedeko cho kesüyi ketola.

¹³ A kengo rüpü mesakemo 3 fükera talü pari, m khonuo talüri pari, m saju kepomi talüri pari.

¹⁴ Süko therü keshü rüpüko, ungo mhathoko thi, cejülü kedemiko cevo m cejü metülüvo, uko züvo kenguyide theku kekuo tüsozho nha theri thiketola.

¹⁵ Hihe, I kerügomi bi vorito. Somi füla kebao thejo kepütho ufüne khiba de mechü ta kemo, de mipo pü kemechü kemenga ngo kemomi.

¹⁶ M pü uko zü kengupü thethi pü Hebrewmi jülü Armogeddon sitsü lüsü.

¹⁷ Tüyochoyi thünao pühe lapü tükhralü sü; siri tüyo kereshücelü mhafü kerekrü pü se, poti tsüo thise;

¹⁸ Thefüko, tüsüko, m metho kekreko pari; cecesü mezho shuta, thüma kehülü sükümha thi, mozo cejülü, cecesü rüshuta, kushuta.

¹⁹ Nadeo kezapü zasüh thiva, kede nadeko retuta; Babylon kezhosü Jihova mhüjü rükra la vori, pü lekhu kerü hezo pü pütsü ketola.

²⁰ Cejü rethi tsokemoko, cejütuko ngosa mota.

²¹ Tüyo phrü kri shipü thüma vota, pü meshi zhorhapümeshi (100lb); thümako Jihova reshü (zhoshü) ta thepü hio la, hio zho kemere thita.