MÜNGOKESÜ 15 - KETHOLESI KESAO N.T. (BSI)

¹ Tüyo zasi kekre pü pari, zho mu ungo thi, Tüyochoyimi thüna pari tüsa thüna khita kekrelamori Jihova lekhu sükolü thsu ta.

² I ngo keti, khriva jükezho bi me sükolü kesata; khonuo pi ku keta la, pümarheko pi ri kuyi, m zasi tho kepü kopiri kuyi m pü za thopü ketako piri kuyi, jü kezho khriva yo thade, Jihova libüko (harp) pü tha.

³ Moses tsale Jihova choyio thi, tekonu tsale ri thi, n mhathoko zho mu ungozo, Niepoo therü kekuo; n choko mezi mu kethozo, no kemesako kedeo.

⁴ Sopü n mpe mota O! Niepoo, uza po kemele mota? N lebi kemesazo; kedeshuye metü voride n mhüjü n reshü to; no mi mejo keto mesemüngo süte.

⁵ Süsa I pe süri, hihe, tüyo kereshüce lü zhopo khasü;

⁶ Tüyochoyimi thüna kereshüce lü pari, uko thepü thüna khita, sapütsafü (linen) kemesa be, uko suna pü uko khoro pha.

⁷ Khonu dako dolü mipü suna he pü tüyo choyi thünako tsüsü, sülü Jihova lekhu chuta, pü kechothe rhü ta yo.

⁸ Jihova zapozale mekho tho kereshüce sülü chu bata, pü kekuri mu mipüri sülü lü su ta, tüyochoyimi tüsa thünako tso va kemothe.