MÜNGOKESÜ 13 - KETHOLESI KESAO N.T. (BSI)

¹ I jü kezho khü tesünyo yo tha ri khonu pü jü kezhoyo pari dengo, upi thüna, uka keri, mu uka koyo kedepira ba, püpi koyo theza zho shu ketsü ta.

² Khonu kengo süo tekho khorhü bi, püphe zi ni thega phezibi, püta Losha ta bi; fükera po ketsü kha pü tsü, pubari mu pü kemeco ri

³ Püpi pü reza püde ta sata ketothi; pü reza ku menü tata, cejü metüko khonu sü ngo pü uko ngothi.

⁴ Uko keku kha kesü fükera sü reshüta de potsü, “Sopü no khonu hio biyita”? “Sopüno püzü theri thiyi veta?”

⁵ Pü talü mizhoshüyi keve mu mha kezho poyi keve pü pü tsüsü; keku pütsü kesü tekhri hedanküna.

⁶ Püta tagapü Jihova zhoshü shüsü, püza thali ceti, pü kereshü ceri, tüyo kehümi kori.

⁷ Püpo kemesami zü theri thi tota, uko meniva ketola; kede kekre ketiko pi, ujü kekre ketiko, mu kede shuyeko pi.

⁸ M cejülü kehü metü pü reshü tato, tekonu cejü thi süculü kerhülesidalü uza thoyi kemo metü.

⁹ Kehopüri mhace uni kebami po reni yite.

¹⁰ Pü mitüpü thejü kethimi po mijü thitato; zecho pü mi kedokhrimi mipo zechopü pü dokhri tato. Hice kemesako sügüsühe tsü mu kemelü bato.

¹¹ I khonu kekrepü cejüyo parizü ngo; Tekonu bi püka kena ba, m pükepo fükerabi.

¹² Pü mhüjülü khonu bi kekujü metüpo dojü, cejülü kehü metüpo khonu kerao reshüta, pü rüzaku menü ketao.

¹³ M pü mha ungo ketsü thi, tüyori me po kirita, cejülü, thümako kengo ce.

¹⁴ Mha ungo keti thi ketala cejü kehümiko kedo khonu mhüjülü pü keku kene thisü; de cejülü kehüko ce poti, ukopo khonu marhe thino sita, zecho khapü reza süde menü keta mu rhüta keto.

¹⁵ M pü keku pü khonu marhe rhekesüo po rhüyi keve thisü, marhe sü jüri poyive mu pü reshü kemomi dokhriva keto thisü.

¹⁶ Pülano kezhokeni, kene kedi, mijümi ukekha kedimi, metüpo ube uzaco ukho thoyino zita moze utükhayo sheri.

¹⁷ Sizi thoyi kemomipo hethoheli thimori mhakhri zhu mo ketola, khonuo zari mori ukho yo sheri süyi moketo.

¹⁸ Hicehi mhaseba, mhaseyi kevemi khonu mhaphri seyite, süsü thüma mhaphri, mu pu No lize 666.