MHATHOKO 8 - KETHOLESI KESAO N.T. (BSI)

Saul kehu methi keti

¹ Saul kedokhri hio pü medo zole siziba. Pütü süce Jerusalem lü kehuko methi shuta, uko metü tapre Judea, Samaria, khü umhükolü vota; apostleko lebi zota.

² Kemathoko Stephen püvo khrü va, de uko püla thekri thisü.

³ Saul lano kehupo kerekra thi, cepüpülü talü de thepu miri mu theno miri tüpü thejü celü sü.

Philip Samarialü zhopo kethi

⁴ Süla uko pre ta ketako jüo zhopo thi vota.

⁵ Süsa Philip ta Samaria nadelü ki, sülü Khrista zhopo thipü ukoce sü.

⁶ Thümako lüpü thi Philip pokesüko unü shude reniyi, pü ungo mhatho thi kesükori ngo mu reniyi.

⁷ Kekrelamori mesakemo rüpüko semeto de ukoyo ketakoyo taprata, lasako mu pheyho miko kekro thi kesürhosü.

⁸ Nade sülü thümako rethu shuta.

⁹ Vele thümapü süce ba püza Simon, nade sülü kemedu thenyü thiyo, Samaria thümako po pü melü phiyo, side püpü thüma kezho mipü zole sibayo.

¹⁰ Pü füko reni mu zü tayo thüma kezhotholü ki kenitho ketso, thüma hio Therü kezhoo keku khiyo side melüba.

¹¹ Pü thenyü medukola pütü kecho thümakopo pü melü mu pürho tayo.

¹² Vele Philip Jihova kede kethi mu Jisu Khrista zapü zhopo thi kesüko melü ketala uko jülopüyi, thenokori mu thepukori.

¹³ Simon sheri melü yita, pü jülopü keyice pü Philip sameji de ungo mhathoko mu zasi thi kesüko pepü pü mahüthi püngo thita.

¹⁴ Tsühi apostleko Jerusalem lü kebako Samaria lü sheri Jihova jüko melüyi keta sesü, uko Peter mu John ni ketsüsü.

¹⁵ Uni taki keyice ukola kecho thisü, Kemesa Rüpü ukopo ngoyi ketola.

¹⁶ Kemesa Rüpü sütüce uko mipü yori vo molu, uko Niepo Jisu yolü jülopü keyi zolu tila.

¹⁷ Süsa unibe chopü ukoyosü, side uko Kemesa Rüpü ngoyi.

¹⁸ Simon apostleni ngoti unibe chopü miyo süze Kemesa Rüpü kha mitsü kesü ngo, süla pü presapü uni tsüsü.

¹⁹ Unice poti, keku hio khapü asheri tsü süte, side apo abe chopü miyo kesüce mipori Kemesa Rüpü ngoyi ketola.

²⁰ Vele Peter püce pode n presapo nzü shü tate, kekrelamori nlü kelü presapü Kemesa Rüpü khri keyi kelüla.

²¹ No hilü kesa keto mori nzari bamo, kekrelamori nkelü Jihova mhüjülü mezi kemola.

²² Süla no mhakesu hilü thelü rede yite, side Jihova ce kecho thi yite, mhace nkelü kesu hiolü nkejo vayiri sehomo.

²³ Kekrelamori nmelülü kekhu mu kesu kelü ba, mesakemopo nphapü ta.

²⁴ Süsa Simon pode, ala Niepoo ce kecho thisüte, nkepoko püpori ayo vorimo ketola.

²⁵ Uni sülü Niepoo jü zhopo thi kevasa ta sala Jerusalem lü khota, Jüyikeve pü Samaria rüna kekrolü zhopo thi sü.

²⁶ Tüyo Niepoo choyimi Philip cepode, Tasüte, de ta Jerusalem mekhroco Gaza lü kite, kesacejü lü.

²⁷ Pü tasü süco vota, Hihe, mipü Ethiopiami, phove mipü, Candace kedepü celü kezho kekutho mipü, cene metü kekhi mipü, pü Jerusalem lü kho de kereshü thi.

²⁸ Ta sala vo tazü, gura gariyo ta, de Isaiah saju kese lesiko phrita.

²⁹ Süsa Kemesa Rüpü Philip cepode, Ta meno phete, side ta gura gariyo kute.

³⁰ Philip tasü pücephe, pü Isaiah phri keta sesü, süla püce poti, no phri keta se bame?

³¹ Püpode, dipübi seyita, humi ace posü kemosa? Philip po püzüde gura gariyo ku püzü bayite sita.

³² Pü phri keta süo hiohi, tekonu kedokhri bi püzüvo, tekonu püma kebümi mhüjülü kemekre kethabi, püta taga chemo.

³³ Püthi zhoshu kesülü kemezilü thimo, somi pü nushünuye poyi veta? Kekrelamori pü kerhüro cejülü khipü tate.

³⁴ Phoveo Philip cepode, saju kepoo sopüju poba? Pütho püju me mode thüma kekre ju poba?

³⁵ Süsa Philip püta taga de püce poti, lesi sülü shudü thide po, side Jisu ju posü.

³⁶ Uni cholü tavo kezüce, jü süce keba ngoyi; phoveo püce poti, Hihe, hice jü bale, apo jülo kepü khati bamotho?

³⁷ Philip püce poti, no nmelü metü khi melüyi ta tisa no jülo püyive. Pü poti, Jisu Khrista Jihova nuzo, I melüte.

³⁸ Pü gura gari po thayite zisü, uni kenani ta jülü lü, Philip mu Phoveo ni, side püpü jülo püsü.

³⁹ Uni jülü taprari, Kemesa Rüpü Philip khipü tata, phoveo püngo samota, mu pü cholü pünü rechü de ta vota.

⁴⁰ Vele Philip tavo Azotus lü mipo püngoyi, pü ta kevo nadekolü zhopo thi vota, tavo Caesarea lü tsoyi kemothe.