MHATHOKO 7 - KETHOLESI KESAO N.T. (BSI)

Stephen kehuce kepo

¹ Süsa thevo kerekrüo pü ketso de poti, mha süko ketho zome?

² Pü poti, thümako mu asazü jürako, aponeko, reni süte; Jihova zapozale kethio upotsa Abraham mengosü, pü Mesopotamia lü kebace, pü Charran lü kehü mhüjü.

³ Püce poti, n rünalü mu n cekrolü tapra tate, de ta cejü I thapü nmeka sü ketolü vo tate.

⁴ Süsa pü ta Chaldean cejülü vori, de Haran lü hü bata. Püpo sa ketasa, Jihova püpo rede tavo tsü keba thethi hiolü hüta.

⁵ Sülü kalüzhü mhapüri khapü pü tsümo, phezi düpüri khasü mozo; sizo sheri jükha kesü püpo süo yitole sisü, püshupüye pori, süketso pünu di.

⁶ Jihova püce kepo, nnuneko cejü sekemolü revüvotato; uko tavo mijü thitato, side mipo uko meshu süto tütse kradapü.

⁷ Shuye nekopü thejü kethio I pe süto, Jihova posü, süsalü uko taprarito, side thethi hilü achoyi thito.

⁸ Pü yikerü khapü uko tsüsü; mu Abraham Isaac ngoyi, zho tütha nha püyi rüsü: Isaac Jacob menuyi, mu Jacob upotsaneko mi kerikena menusü.

⁹ Upotsaneko püngo ukorode Joseph tüpü zhuva Egypt mice, vele Jihova püzüta.

¹⁰ Pü kemezhe zori pü kelayi, mhase pü pütsüsü mu Pharoah Egypt kedeo po püngo unüyi, side püthipü Angh thisü Egypt cejü metülü mu pücelü zo sheri.

¹¹ Egypt mu Canaan cejü metülü kemekre vorita, kemezhe shuta, upotsaneko keti kekra ngoyi hota;

¹² Vele Jacob sekeyi Egypt lü ketico bati sesü, pü uponeko ketsü sü therao va.

¹³ Va kenalü Joseph püpü püjürako mesesü, Joseph cekroko püvo Pharaoh mengosü.

¹⁴ Joseph uko ketsüpü pücekroko mu püpo Jacob cüyi ta, mi hethüna püngu.

¹⁵ Süla Jacob ta Egypt lü kita, side sülü püri mu upotsaneko ri sülü sata.

¹⁶ Uko mo püvo Shechem lü khrüva, Abraham mhakhre thi Hammor nuneko ce presapü khri keyi thilü.

¹⁷ Vele jüpopü kemeta pütü tso keyice, Jihova Abraham ce popü kemetajü, thümako ma kro sürita Egypt lü.

¹⁸ Kede kekrepü Joseph sekemopü sürita.

¹⁹ Pü ushuye yo thedo püde uponekopo ununeko kegüdü vanota, side ukopo sata ketola.

²⁰ Pütü sülü Moses menuyi, züve rizo, tekhri sü püpo celü theküba.

²¹ Püpü kegü düva, süce Pharoah nupü pü püvo pünu thide theküyi.

²² Moses Egypt lü mhaseko seyi, jülü sheri mu mhatholü sheri kushu.

²³ Pü tütse heda ketace pümelülü tavo pücekroko Israel miko pesü nyüsata.

²⁴ Mipü meshu ba keta ngode püsa thasü ketilü Egypt mipü kekhu va.

²⁵ Pükelüce pü cekromiko Jihova pükhrühi süde uko kelakeyi seyi totho ziri uko süo seyi mota,

²⁶ Süsanha pü tavo uko mhüngo thisü mu mikena kezheba ngo, pü unipo kezüveta nyüde unice poti, azüneko neko sazüjüra zole, ditole hunehu nükemo thiba?

²⁷ Vele mipü püzanuo nümo thikebao tasü Moses khupü düva, de poti, sopü nthipü hani ne mpe hani kekha keti thisü?

²⁸ No adokhri va tolime? No ndo Egypt mipü yo thi kesübi.

²⁹ Süsa jü hio keselü Moses takhi Median cejülü ta vota, sülü thepumi kena menuyi.

³⁰ Tütse heda tso ketasa, tüyo Niepoo choyi mipü Sinai cejütuyo nhatsalü sübopü meto keba melipülü püzü kerethi.

³¹ Moses süo kengoce püngo thita, pü taphe süo petole menophe, Niepoo füphra pü meseta.

³² Sülü poti, I npotsaneko Rüo, Abraham Rüo, Isaac Rüo, mu Jacob Rüo. Süsa Moses meprüpü reshüta, side pe mpe ta.

³³ Süsa Niepoo püce poti, npheyo npheku phrü vate, kekrelamori no thakeba thethilü mesa tila.

³⁴ Athümako Egypt lü methi meni keba I ngo bate, uko panyo kebakori I se süte, süla I taki uko kelayi ketola kirizü. Tavote, I nketsüpü Egypt lü sü ketola.

³⁵ Moses hio uko pü mela kevao, sopü npo hako sheketi mu hako kekha keto thisü? Thüma süo Jihova pü ketsüpü uko kekha mu uko kela tozü, tüyo choyio sünhyo lü pü mengo kesüo bepü uko kela süto.

³⁶ Pü uko zü prasü, Egypt cejülü zasiko mu ungo mhathoko thipü mekasü, Kemere jü kezholü, mu rayho thilü tütse hedako.

³⁷ Hiohi Moses Israel mikoce po kebao, Niepoo neko Rüo neko dolü saju kepopü khapü neko tsü süto, abi tipü, neko püfü reni yite.

³⁸ Hiohi püzo, nhatsalü kehuko zü ketao, tüyo choyimi Sinai cejütulü jüpo kesüo, upotsa neko zü ketao, jüpo kese khapü utsü kesüo.

³⁹ Upotsa neko püfü zümu keta, sizo mori pü khupü düva, uko melüpü Egypt lü latsüta.

⁴⁰ Uko Aaron cepode, therü marheko thipü hako mhüjülü süte, kekrelamori Moses hio Egypt cejülü hako züpra kesüo püyo dipü bita sheri hako semote.

⁴¹ Pütü sülü uko methonepü thiyi, side uko kereshü thipü marhe reshüta, side ukobe mhathopü uko rechüta.

⁴² Vele Jihova ukoyo renüta, side uko khapü tüyo ketako reshüta, süo thajü saju kepoko lesilü thopü metati, O Israel cekroko, neko khonu kesamo khapü areshü tome, tütse hedako dolü nhatsalü ketace?

⁴³ Thiyi hozole, neko kereshüce thipü Moloch tsü, tüyo thenyüko rüo Raphan, neko therü hiko thipü reshü; süla I neko celepü Babylon saco süvato.

⁴⁴ Upotsaneko nhatsalü kereshüce zhopo thi vori, püpo thi süno püce kepoko Moses mengosü mu püpo uhü sübi thinosü.

⁴⁵ Upotsaneko Joshua züde süo püvori, uko Rüo shuyeko hu keva tüce. Süo khapü metazo tavo David ketso.

⁴⁶ Jihova David ngo pünüyi Jacob cekroko züde thethi pülü hü keto phu sünosü.

⁴⁷ Vele Solomon pula cepü thisü.

⁴⁸ Sizosheri Kerekrütho-o no thebepü kethi kereshücelü hü yomo, saju keseko kepobi.

⁴⁹ Tüsü akedeba, cejüsü aphezho, neko kedipü ce thipü atsüta? Niepoo sizipo, mori thethi ala kerelü dipü ba?

⁵⁰ Abe mha metü hiko thisü mome?

⁵¹ Neko neküyi kehoko umelü uni yirü kemoko, neko pütü metülü Kemesa Rüpü nümo thi süyo, neko potsa neko bi neko ri sizi süyo.

⁵² Saju kesekoyo nepotsaneko sopü methi kemo ba? Uko Ketho kemezio vori keto kepoko dokhri tsosüte, tsühi neko püpü zhu kevako mu pü dokhri kevakozo.

⁵³ Neko kedapü tüyo choyio thezho khakesüko thi mu zü ketola, vele neko thi mu züyi mote. (Ketsüpü Stephen zhe)

⁵⁴ Uko süko se kesüce uko melü thizode püyo uko hu thezhe püyi.

⁵⁵ Vele pü Kemesa Rüpüpo püchu püyi de tüyo pe türü bata, mu Jihova zapozale kethi ngosü, Jisu Jihova zaco keba ngo.

⁵⁶ Pü poti, Hihe, I tüko khri kesü ngo bate, Themanuo Jihova zaco sütha thate.

⁵⁷ Uko füphra meto shudeuko niko meka yita, ukometü kezü püthide püyo ta vota.

⁵⁸ Pü tüpü nade saco prata, ketsüpü püva, uko füneko khapü khresamipü phece kha mezü, püza Saul.

⁵⁹ Uko ketsüpü Stephen zhe, Pü kecho thide, “Niepo Jisu arüpü püyi tate.”

⁶⁰ Pü chütüyi, sesü, “Niepoo kephoma hio pü ukoyo sü hite.” Pü jü süo posü mu züta.