MHATHOKO 6 - KETHOLESI KESAO N.T. (BSI)

Mi shurü kedapü choyi kethi

¹ Hitüce pü sajiko kro prari ketala Greekmiko Hebrewmiko yo panyo süta, kekrelamori uko nopü sameko rele lümo ketala tüsonha mha keza tilü.

² Süsa mi kerikenako saji makroko cüsü de ukoce poti, hako Jihova jü khameta de mizlü renaba ketosü püco bamo.

³ Azüneko, süla neko dolü thüma keve thüna phuyite, Kemesa Rüpü uchu keti mu mhase timi, uko süko po mhatho hilü peyi ketola.

⁴ Vele hako zono kecholü mu zhopolü hatü khasü bazoto.

⁵ Jü süo thüma metü unüta, uko side Stephen kedayi, Kemesa Rüpü uchupü mu kemelü keve; Philip, Prochorus, Niconor, Timon, Parmenas, Nicolas (Antioch mi Greek mi vele Judah zho zü ketami) hiko kedayi.

⁶ Süko züvo apostleko mhüjülü sü, side uko ubechopü ukoyo süde kecho thisü.

⁷ Jihova jü makehe keye vota, thüma kekro Jerusalem lü saji thishu vorita, thevomi kekro ri kemelü jüzü thi vorita.

⁸ Stephen keku mu kemelü neshu, de zasi ungo mhathoko thipü thümako dolü süta.

Stephen tü keyi

⁹ Side thüma kropü synagogue lü Ukekhakedi Cyrenemi, Alexandriami, Ciliciami mu miko Stephen zü keprüli bata.

¹⁰ Vele uko püzü ketüyi hota kekrelamori mhase mu Kemesa Rüpü lü pü mhapo ketakola.

¹¹ Süsa uko kemekhrülü thümahu hüsü de ukopo poti Hako pü Moses jüko Jihova tha keti sele sizita.

¹² Side uko thümako hüsü, mu mehiko, lesi keseko, pü metsu vorita; side pü tüzü methi kehulü vo.

¹³ Kemeda zhopo thi de poti, thüma hio thethi kemesahio mu thezho thalice.

¹⁴ Kekrelamori hako pü kepo sewe, Jisu Nazareth mi thethi hio thimesu vatole zi, mu Moses zho khapü uketsüko thikede vatolezi.

¹⁵ Methi kehulü kebako metü püpe türü thipü bata, püzü kengoce tüyo choyimi zü bide ngota.