MHATHOKO 4 - KETHOLESI KESAO N.T. (BSI)

Peter mu John ni methi kehu mhüjülü tha

¹ Uni thümako ce jüpo kebalü thevoko, kereshüce kekha ketiko, mu Sadducees uni cevori.

² Jisu kesalü rhüla sü keta uni popü thümako metha ba keta sepü uko nümo shuta.

³ Uko tavori de uni tüpü tüso süsanha ketso khapü bata, kekrelamori theva ketala.

⁴ Vele thüma jüo reni keyiko melüyita, piphi thüma süko nye püngu.

⁵ Sü sanha uko mipi kekha ketiko, mehimiko, mu mhakeseko tavo Jerusalem lü kenguyi.

⁶ Anna pethi kezhoo, Caiaphas, John, mu Alexander, mu thevoo cekroko.

⁷ Uni khapü uko dolü metsulü sü, de uni ketsoti, neni kedipü kekulü mori sopü zalü mhatho hihi thisüta?

⁸ Süsa Peter Kemesa Rüpü po püchu püde poti, ne thüma kekhayo tiko mu Israel mehi miko.

⁹ Mhace neko tha tüso hilü hani mhatho keve thi pü renga keta thüma hiyo kesü senyü lize, dipü colü pü thimeve süta sheri.

¹⁰ Neko metü seyite, mu Israel miko metü, Jisu Khrista Nazareth mi zalü ho, neko püpü gu kevao, Jihova püphü merhü süte, pü zalü thüma hio neko dolü vede tha bate.

¹¹ Jisu hio neko cekethiko pü kha keva tsüo süo khipü pükülü tsüo thiketao.

¹² Kelakeyi mharapüri ta mozo, kekrelamori tükhro thüma dolü kelakeyi thüza kekrepüri tamo zo tila.

¹³ Tsühi uko Peter mu John ni kethepu ngo de lükeyi uni mhasemo mu maho mizo side uko ngo bata, uko sekeyi uni Jisu zütayo.

¹⁴ Kerenga thümao uni zü tha ketha pe de uko mhapüri pü uni mejo keto thiyi suta.

¹⁵ Vele uko po kesü unipo kehu khü prata no sü, side utho uko dolü kerethi bata.

¹⁶ Uko kepode uko uniyo kedipü thita? Kekrelamori ungo mhatho kemelepü thipü Jerusalem lü kehüko mese mengo süte; mu uko süo mole sizi yi hote.

¹⁷ Vele süo keyepü thüma dolü süsa mo ketola, uko uni kethi kedü va khe; unipo thüza hio posapü mipü ceri sümo ketola.

¹⁸ Uko uni cüsü de unice poti Jisu za posa ho mu pü mi metha ri hino sü.

¹⁹ Vele Peter mu John ni ukofü kelasü de poti Jihova mhüjülü püfü kereni ceri nekofü kezü pütüku tome moshi, nekotho lü phite.

²⁰ Kekrelamori ha zowe ha kese kengo mhathoko pomo taho.

²¹ Uni kethikedü kevasa uni kha süva, uniyo kemejo thiyi su ketala, kekrelamori thüma krokola; thümako metü Jihova chu zapozale thibata, mhatho thi kesüo la.

²² Kekrelamori kerenga thüma süo püyo zasi mu ungo mhatho thi kesürho kesüo pü kehüzho tütse heda ketala ri sa.

Kemelümiko kethepu la kecho kethi

²³ Uko khasü kevasa uni ta ukromice vota, de tavo ukoce thevoko mu mehiko unice dipü pota sheri metüpü posü.

²⁴ Uko süko sekeyice metü lüpü thide se Jihova ce süta, uko poti, Niepoo no Jihova zo, tü mu cejü thi kesüo, jü kezho mu sükolü ketako metü.

²⁵ No nthekü David talü kepo, dipüla therüna miko ulü reda baya, mu thümako kemethu lü baya?

²⁶ Cejülü kedemiko uthalü tha, mikekha ketiko vo kebupü, uko Niepoo metsu toli, mu pü Khristao (Messiah) sheri.

²⁷ Kekrelamori nade hilü Herod mu Pontius Pilate-e kenani, Judah kemoko pü Israel thümako sa, uko kezüde ntheküo Kemesa Jisu metsu, no kenhü keyio.

²⁸ Kekrelamori nbepü thisü toli süculü lü mu rhüpü ketako.

²⁹ Tsühi Niepoo uko thedü füko pe süte, thepu de poyi keto khapü ntheküko tsü süte.

³⁰ Nbe chopü thi kesürho keyi zasiko mu ungo mhathoko nnu kemesa Jisu zalü thisü ketola.

³¹ Uko side kecho thi kebace uko keba thethilü renata, uko metü Kemesa Rüpü po uchu de uko thepulü Jihova jü po tata.

Kemelümiko umha uzhü kha zhürhü thita

³² Melü keyi makro kezüde thipü phopü mu lüpü thita, mori uko mhakebakopü utho uzhüle siti pori mota; vele mhakebako khipü zhürhü thita.

³³ Apostleko keku kezhopü Niepo Jisu rhülasüketa zhopo thita, ngokemezhe uko metüyo ba shuta.

³⁴ Mori uko dolü kedi ketsakhu basa mota, kekrelamori uce mu ucejü kebamiko zhuyi ta, mha zhu keyiko presa pü vori.

³⁵ Süko püvo apostleko phelü sü, kezapü mipüpü khimo kesubi uko tsüsü.

³⁶ Joses püza tho kedepü Barnabas thi kesüo, (püco thelü tho kemenü nu); pü Levi mipü, pü Cyprus rünalü vori.

³⁷ Pü cejü kebao zhuyi de presa pü vori de pü apostleko phelü sü.