MHATHOKO 27 - KETHOLESI KESAO N.T. (BSI)

Paul ru thopü Rome lü vo keta

¹ Hako ru thopü Italy lü vo keto mepeyi ketace, Paul mu thejümi hu khapü Julius zitipü melüsü, pü Augustus kefümipü.

² Hako ta rulü lü Adramytium thethilü, side ta shudüsü, Asia khükolü, Aristarchus hako zü ketala pü Macedonia mipü Thessalonia lü.

³ Süsanha tavo Sidon tsoyi, Julius püzho veshude Paul po tavo püzümiko züde pü nüyi no sü.

⁴ Süsa hako ta sü Cyprus lü vota, kekrelamori tükhra hako vo ketoco vamo ketala.

⁵ Hako rulü ta Cilicia mu Pamphylia kolü vo de tasü Myra lü tsoyi Lycia lü nadepü.

⁶ Sülü hako füketao rupü ngoyi Alexandria lü ta Italy lü lüto kezü pü, sülü hako khasü.

⁷ Rele shude hako ru thopü tüsozho kekrosa tavo Cnidus tsoyi, tükhra hako metsu ketala hako ru thopü Crete khrilü ta Salmone lü vo.

⁸ Rüshude ruthopü tavo thethipü Fair Haven (kerelüthethi) tsoyi, süo Lasea nade zü kemeno ba.

⁹ Rutho keta pütü kekro mediva, mu hicehi rutho keti kemeche bashuta, mevo keti (Yon Kippur) vota, Paul uko tarhosü.

¹⁰ Uko cepoti, kezhoko, I sekeba ruketho lü kempe bate mu mhako ka keta zü kesüto, ruyo keta mhanyoko lebimo vele thüma sheri.

¹¹ Vele hako kefüo Paul fü kereniceri ruketho kezhoo, mu ru niepoo fü reni kuta.

¹² Ru relüthi sülü tüsütü cela thethi pütükemopü, süla makro kono rulü tavo Phoenix tsoyi ri ve tila, sülü uko tüsüce ba ketola. Thethi süo rurelü thipü Crete, meso mu mekhro nakro kevaco.

Jükezholü khrade

¹³ Mekhroco tükhra mehiba, uko kelüce uzhotülü uko ruthoyi keve thita lizu, uko ru phrüsü de ruthopü Crete kemenoce jükhüce keba thethilüvo.

¹⁴ Vele pütü choba kemolü khradepü vorita, Euroclydon khrade süo uko ru hüta.

¹⁵ Ruo hüyi ketala uko tükhra süo metsu yihota de tükhrapo pühüpü tata.

¹⁶ Cejü rethitso kemo kenipü Clauda khrilü ruthopü vozü, kedopüce hako ruyoketa büfüruko yo kuyi.

¹⁷ Ru fühako ha keyice rulü rophako pha kemetüyi, kemosa ru ta Syrtis (tesünyo) lü vo keta mpe tila; side tüsümethakeyi thegiro (anchor) phrü kerechusü de tasü.

¹⁸ Tükhrapo hako hüshupütata, süla süsanha mhakhapü kegüdüva depüpü thi kemejosü.

¹⁹ Zhosünha hakotho hako bepü ru kenhipü tata.

²⁰ Tüsozho kekro nace mori thenyü kori ngo mota, tükhra hako kehü ketsapü thimo, rhüyi keto kemeri sheri bamota.

²¹ Vele pütü kecho ketico bamo ketala, Paul süthayi de poti, kezhoko, neko afü reniyi ti mesü, Crete lü ru phrü kesü mesümo, size mhapüri medi vaho mu kemezhe ri taho.

²² Tsüsahi, neko nüyite, neko mipüri kesakedi thi saho ruo zo kemosa.

²³ Tsüzi tüyo Jihova choyimipü azü ketao, mu I pü choyi thi ketao acepoti,

²⁴ Mpe hite, Paul, no Caesar mhüjülü voto, Hihe, nzü revü ketako kelapü ntsü süto.

²⁵ Süla kezhomiko, neko nüyite, kekrelamori I Jihova kemelümi, acepokesübi sübi thisü zo ketola.

²⁶ Kehothi sheri uko kelhoupü cejü rethitsokemo pülü süvatoho.

²⁷ Tüsozho keridazi Adria jükezholü ruthokho thoki kebace, rukethoko lükeba tavo rünahu tsota zütho ziba.

²⁸ Jülüfü sekeyice botho (fathom) mecü keta lüba, süsa zace thefü ketsüsala sü, ziri keripüngu zota.

²⁹ Tavo ketsüro thoyi keta mpe tila ru tüsü ketola tsahu (anchor) da kehüsü, side sünha sülü relüta ketola.

³⁰ Ru kethomiko ukodo thide ru metha keyice büfüruko phrü kerenu süta, tsahuko kelhu kesüzhü.

³¹ Paul uko kefüo mu thipaheko cepoti, Thüma hiko rulü ba kemosa neko kelayi hote.

³² Süsa thipaheko kero dathüsü de rupo tata.

³³ Tüso prari kezüce Paul uko cepoti, neko mhati yite, tha tüsozho kerida teneko mhati kemo, khüta keta.

³⁴ Süla I nekoce posüyo mhahu tiyi te, kekrlemori neko sürhola, kekrelamori neko mipü pithari retu tahote.

³⁵ Pü jü sübi po kesüsa tsükhri tiyi, uko mhüjülü Jihova kemeza posü, pü tsükhri cephro süde khi tiyi.

³⁶ Süsa uko unüyi de mhatiyi.

³⁷ Hako rulü ketako thüma krakena mu hethüna shurü ta.

³⁸ Uko mhati keyi sa rupü thikemejova, ata kori kegüdüpü jükezholü süva.

Ru pro keta

³⁹ Keshulü uko cejü dipülü vota sheri semo, vele uko jükhü cejü kewhipü ngoba süla ru thopü sülü vo keto lüsü, mhace thiyi ve lizo.

⁴⁰ Uko rulü kero khiyita süce side füha pümesüsü, ru thopü kerelü thethi lü kebalü phe ketola.

⁴¹ Jükezho kena vo kesü kebalü lüta side uko ru cejülü bata, uvade taki cejülü thoyita de melü yi hota, vele ru saco thophrova jü rüphüpo.

⁴² Thipaheko kelüce thejümiko dokhri va keto rhüta, motisa uko jüvü de ta keta mpe ketala.

⁴³ Vele kefü kezhoo Paul kelakesü lüba tila uko khameta, ukopo jüvü kevemi jüvüpü cejü kesolü prata no posü.

⁴⁴ Humipo büfü rukolü tavo, mu kekre miko ru kepro kolü ta sizi. Sübide uko metü cejü kesolü pra tsoyi.