MHATHOKO 26 - KETHOLESI KESAO N.T. (BSI)

Paul Agrippa mhüjülü pümezi kepo

¹ Süsa Agrippa Paul cepoti, No ntho nmezi poyi keve khri süho. Paul pübe chosü, de püfü kelasü.

² I nmhüjülü kethahi arüve, Agrippa kedeo, kekrelamori I Jews miko amejo kebako nmhüjülü atho popü nce süyi ve ketala.

³ Kekrelamori no Jews miko zhorele se meve kebala risa, süla sügü sühe afü reni süte.

⁴ Akehü azho rele akhresace ashuyelü I Jerusalem lü hü ketaceri, Jews miko metü seba.

⁵ Uko zhopo khasü ketosa I Jews mi zhorele kemetsütho lü hü, hako Jews mi nanilü Pharisee kehülü.

⁶ Jihova hako potsa nekoce popü kemeta kemeri la I tsühi jünyo ketiti balü ba.

⁷ Reshu de popü hako shuye kerikena koce kesü vori keto kemeri la tüso tüzü metsü Jihova reshü tayo. Kemeri hiola Agrippa kedeo Jews miko a mejoba.

⁸ Kedipü bide Jihova kesami thi merhü kesü sizi yiveta keti lüpü neko vedi batho?

⁹ Sübi, I sheri akelüce mhakekro thipü Jisu Nazareth za metsuti mesüle thisü.

¹⁰ Süko I Jerusalem lü sheri thisü, kemesamiko tüpü thejüthi, thevo kezhoko celü keku khiyide, mu uko dokhri ketilü I a medo le I ri posü.

¹¹ I tsükenu uko methi synagogue kolü, ukopo Jihova zhoshü, I azho shüshu de uko metsu, I uko hupü thethi sekemo nadekolü sü.

Paul pülü kede keyi kepo

¹² Süla I thevo kezhoko celü keku ngo keyila ta Damuscus lü kizü.

¹³ Kehe tüluce, Hihe, kedeo, tüyo kevepü I ngosü, nace ceri veku tipü, keve süo akhü metü mu azü revü ketako metü va vekrüta.

¹⁴ Hako metü retu cejü tsüta, I mhafüpü ace kepo se, “Saul, Saul, no dipüla amethiba? N phepü tsahu meshüti nla rü zoto mome?”

¹⁵ I püce poti, Niepoo, No sopü? Pü pokesü, I Jisu no pü methi ketao.

¹⁶ Vele tasüte, side npheyo tha yite, kekrelamori mha hihila I nmengosü, npo mha hiko zhopo thi ketola, mu nmese mengo sü ketoko ri.

¹⁷ Npo thümako kelayi mu Gentiles miko kelayi ketola n ketsü süzüho.

¹⁸ Uko mhü khakhrisü, mu kezülü redekhi kevelü vori ketola, mu Satan celü ta Jihova ce vori ketola, side uko kephoma vakeyi ngo yito, kemelü lü uko thi mesa keyiko kalü khapü tsüsü keto ayoba.

Paul püzhopoko po kesü

¹⁹ O Agrippa kedeo, I tüyo zümho kengo füzü thimo tamozo.

²⁰ Vele theralü süko khapü Damascus lü kebako mesesü, Jerusalem lü, Judea khüko metülü, mu süsa Gentiles koceri, ukopo thelü redeyi de ta Jihova ce vori ketola, side ukopo thelü rede ketabi mhatho thiyi ketola.

²¹ Kekrelamori mhatho süola Jews miko kereshücelü atüyi de dokhri vato süte,

²² Jihova akhrühi kesülü tha ketso kezhomi ceri mu keniko ceri zhopo thi tazo, mha kekre mo veli Moses mu saju kepoko vori tole popü kemeta kozo.

²³ Christa vorito de therao kemezhe süto side kesako dolü rhüla sü keratho thito, pü kevepü thümako mese mengo süto, side pü Gentiles kori mese süto.

Paul Agrippa po melüyi tano pokesü

²⁴ Pü mhasüko po kesüce Festus jüpo meto shude poti, Paul no mhaseshu ketala no ntülü ba mode melo bate.

²⁵ Vele pü poti I melo bamo Festus mhakese kemenuo; vele I rhorhüpü jütho mu kemetse jüko po bazo.

²⁶ Kekrelamori kedeo sheri mhahiko seba I akekha bamode pü mhüjülü jüpo kebala; akelüce mhahiko pü mhüjülü resü reva keti bamozo: kekrelamori I keresükü kolü thiba mo tila.

²⁷ Kedeo, Agrippa no saju kepoko melü yome? I sekeba no melü tayo.

²⁸ Süsa Agrippa Paul ce poti, no dopülü athipü Christanmi thita tomehe.

²⁹ Paul posala kesü, Rekri sheri mo sheri, nlebi mori tha afü reni kebako metü abi keto I Jihova ce choba, rophapü abe phapü kebahi zo kemosa.

³⁰ Pü mha hiko po kesüsa kedeo sütha yita mu Angh, mu Bernice sheri sütha yita, püzü kebako metü.

³¹ Uko takre pra ketasa, ukotho kerethisü, Thüma hio sa keshü, mori thejüthi püphapü meta zü mozo.

³² Agrippa Festus cepoti, Thüma hio khasü varive, mhace pü Caesar ce chosü moto süze.