MHATHOKO 25 - KETHOLESI KESAO N.T. (BSI)

Paul kedeo cecho lesü

¹ Tsüzo Festus ta State lü vorita, zhosü salü pü Caesarea lü ta Jerusalem lü vori.

² Süsa thevo kezhoo mu Jews dolü kemeleko tavo püce Paul metsu keti posü, mu tüshe chosü.

³ Püpo uko nüthisü de Paul metsu ketola, püzü Jerusalem lü kino zisü, size uko cholü pü fü ba pü dokhri va ketola.

⁴ Vele Festus ukoce poti, Paul khapü Caesarea lü metamo zesu, pü rekri ta sülü vo ketola.

⁵ Süla neko dolü humi azü takite pü mejo keto mha kesuhu püyo mhace ba süze.

⁶ Pü tüsozho keri pü uko dolü relüba, süsa pü ta Caesarea lüki, süsanha tavo pü jünyo keti balü bayi de Paul züvorino posü.

⁷ Pü tavori tice Jews miko Jerusalem lü kiri tiko tavo pü metuyi, side Paul yo mha kesu kekropü pümejosü, süko kethozo keti bamozo sheri.

⁸ Pütho pümezi kepolü, Jews mithezho püri varhümo, mori kereshüce sheri thi merhomo, mori Caesar sheri metsu mo, mhapü lüri I kevarhü thimo.

⁹ Vele Festus Jews miko nü thinyüta, de Paul ketso, no Jerusalem lü kho tome? Mha hiko amhüjülü keti ketola?

¹⁰ Süsa Paul poti, I Caesar sheco bayo tha, sülü ashe keti kesü mesü, I Jews mila mhakesu püri thimo ti no setüba.

¹¹ Kekrelamori I mhace kejo hu thiva sakeshü thita süze I sata sheri mumo, vele mhace uko amejo keba ngoyi moze, thüma püri akhapü uko tsü vaho, I Caesar ce choyo.

¹² Süsa Festus Council zü kevasesü de poti, no Caesar cecho kebabi, no Caesar ce kho tato.

Festus Agrippa kedeo ketso keti

¹³ Tüsozho husa Agrippa kedeo mu Bernice ta Caesarea lü kiri Festus kelü ketola.

¹⁴ Tüsozho kekro sülü bade Festus Paul ju popü kedeo ce sü, Felix thümapü phapü khametale.

¹⁵ I Jerusalem lü kebace Jews thevoko mu mehiko ace poti, uko pü mejo va nyü bale.

¹⁶ I ukoce po kesü, pü mesa va keto mhüjü püpo pümezi pomo de mesa keva sü Roman zhomo, pükemejoko zü mhotsu kesü de mhatho kesu dipü thiva sheri popü mejo sü kemosa.

¹⁷ Süla I hice kevori sanha thothü mozode sheco balü bayi, de Paul zü vori no posü.

¹⁸ Pü kemejoko tavo thayi, akelüce uko mhapüri mejo keshü khi vorimo.

¹⁹ Vele uko sizitari sehomo ziti utho uko dolü mipü Jisu zile tipü, pü sata vele Paul poti rhütazo side pota.

²⁰ I mha süpü setü mo tila I pü ketso de püzü Jerusalem lü kho püne keti lize.

²¹ Vele Paul Augustus po reni tole chota, süla I pü khapü Caesar ce sü ketola kha metate.

²² Agrippa Festus cepoti, I atho thüma süo reni sü nyüle; Püpoti, sodo no süo reni rive.

Paul zü Agrippa mhüjülü kevo

²³ Süsanhasü, Agrippa mu Bernice ni keretso shupü lüri, sheco balü, krapi kezhoko, nadelü kemele miko, Festus kepolü Paul zü vori.

²⁴ Festus poti, Kedeo Agrippa mu thüma hice hako zü kebako, neko thüma hio ngoba, Jews makro ace (Caesarea) mu Jerusalem lü sheri, hice sheri, thüma hiopo hübasati mesü mole.

²⁵ Vele I ngo keyi pü sakeshü mhatho püri thimo, mu pü sheri Augustus cecho ketala I pü khapü püce süvaze.

²⁶ I mhapüri thotüpü aniepoo ce kesü bamo. Süla I püzü vorizü, baho sheri nmhüjülü, O Agrippa kedeo, uko pü ketso kevasa I mhahu thosü rive ketola.

²⁷ Kekrelamori thejü mipü pükemejo thasü mozo keto sü püco bamo.