MHATHOKO 22 - KETHOLESI KESAO N.T. (BSI)

Paul Council mhüjülü kevo

¹ Pü po kesü, thümako, asazüjürako, uponeko, amezi tsühi nekoce apo po kesü reni süte.

² Uko pü Hebrew jülü po ketala uko kemekre zü zikuta.

³ Pü poti, I Jew thüma püzo, Tarsus lü amenuyi, Cilicia lü nadepü, sizori I Gamaliel phece ametha püyi, uponeko zho rele vetsütso ti pü amethasü, Jihova ceco arha thi ketamipü neko tsüdo thi kebako bi.

⁴ I mimethi meni de dokhri mu phapü thejü cekolü sü thepu mi sheri mu thenomi sheri.

⁵ Thevo kezhoo sheri azhopo süo seba, mu mehiko metü sheri; I uko celü lesi kethoko püyi, side ta Damascus lü vo, uko tüphapü Jerusalem lü vori tolezino, uko mejo ketola.

⁶ I revü vo kezüce kehetülu Damascus meno vorita, metha kevepü tüyo ava vekrü akhü metülü.

⁷ I retu cejü kita, mhafüpü ace poti, Saul, Saul, dipüla no (amethimeni) ameshu ta?

⁸ I püfü kelakesü, Niepoo no sopü? Pü ace poti, I Jisu Nazareth mi, no pü methi ketao

⁹ Azü ketako keve süo ngo mu mpe ta, vele uko füphra ace kepoko semo.

¹⁰ I poti, Niepoo apo kedipü thita? Niepoo ace poti, Tasüte, ta Damascus lü kite, sülü npo thi ketoko metüpü nce posüto.

¹¹ I mhapüri ngo mota zapozale keve süola, azü revü ketakopo abe cepü Damascus lü ki.

¹² Ananias thezholü hümetsü ketamipü, Jews mi sülü kehüko püpo meve yo tipü.

¹³ Ace vori, thayi de acepoti, asazüo Saul, mhangoyi tate. Sütülü I mhangoyi, püpesü.

¹⁴ Pü poti, upotsa neko Rüo I kedapü pümedo seyi, mu npo Kejutho Kemesa-o ngo mu püfü se süte.

¹⁵ Kekrelamori npo thüma metüko ce nkese kengo pü zhopo thisü ketola.

¹⁶ No dipüla thothü bata? Tasü de jülo püyi tate, side nkephomako khrü kemesa vate, Niepoo za cüpü.

Paul ketsüpü Gentiles koce kesü

¹⁷ I sala ta Jerusalem lü vode kereshücelü kecho thi kebace, I züda rengu ta.

¹⁸ I Jisu ngosü, pü ace poti, rekri tasüte de tamhazi Jerusalem cupra tate kekrelamori uko no azhopo kethi reni yiho tila.

¹⁹ Niepoo I Synagogues kolü nkemelü miko vü mu tüpü thejü kethi uko metü seba.

²⁰ Stephen dokhri püza mekrü kebace I ri sülü tha, püpo satari ve keti amedo ketala, pü kedokhriko füne khapü ace mezü.

²¹ Pü acepoti, Rede tapra tate, kekrelamori I nketsüpü thethi kemecura Gentiles koce sü ketola.

Paul mu Roman khazhonu kekhrüo

²² Jü hiko po keba ketso uko kemekre de püfü reniyi, süsa uko se meto de poti, thüma hio po cejülü tatate, püpo hü keba mesü mote.

²³ Uko se mu ufüko kelhu, süsa nyopha kelhupü tükhralü sü zita.

²⁴ Krapi kezhoo püzü kezhomi celü votano posü, püvü de pü ketso süno posü, sübi kedipüla uko pü metsu bateshi keti seyi ketola.

²⁵ Uko thiyi pü kero kethiko khi püpha kebace, Paul krapi kezhoo tha kebaoce poti, Roman thüma mejo kemopü vüde ketso ti thezho me?

²⁶ Krapi kezhoo süse kesüce tavo ukopi kezho-oce posü, “Menu yite, no thi kebako, thüma hio Roman mipü tila.”

²⁷ Uko pi kezhoo tavori de püce poti, Ace posüte, no Roman mi me? Pü posala sü, Ile.

²⁸ Kezhoo puce pode, I presa kekropü ukekha kedi hio khriyi. Paul puce po kesü, Vele I kekha kedilü a menuyi.

²⁹ Rekri pükha süva de tata, pü ketso tokebalü, mu kezhoo ri mpeta kekrelamori pü tüpü pha kevala, pü Roman le ziti se keyi sa.

Paul Council mhüjülü ketha

³⁰ Süsanha dipüla Jews miko Paul mejo ta sheri seyi ketola pü phrüsü side thevo kezhoo mu Council lü kebako metüpo vorino posü, Paul züvori uko mhüjülü sü.