MHATHOKO 19 - KETHOLESI KESAO N.T. (BSI)

Paul Ephesus lü kevo

¹ Apollos Corinth lü kebace Paul ta jükezho khükolü vo, side tavo Ephesus lü kemelümi hu bade ngoyi.

² Pü ukoce poti, neko melü keyice Kemesa Rüpü ngoyi me? Uko puce poti, hako Kemesa Rüpü tayo ti seri sü mole.

³ Pü posala kesü, neko sopü zalü jülo püyi la? Uko püce pode, hako John Jülo kepü zalüle.

⁴ Süla Paul ukoce pode, John jülo kepü sü, thelü rede keyi jülo khasü, pü poti, mipü asa vori kezüo melü yite sidepo, süosü Jisu Khrista le.

⁵ Uko süo sekeyice Niepoo Jisu zalü jülo püyi.

⁶ Paul pübe chopü ukoyo kesüce, Kemesa Rüpü ukoyo vorita; mu uko saju kopo mu fü kesalü mhapo zita.

⁷ Thepumi sülü kebako mi keri kena.

⁸ Pü tekhri sü sülü ba synagogue lü thepu shude jüpo, Jihova kede kethi popü mihü.

⁹ Thelü kekhri humi püzü kemelita mu methi kehulü choo po meshü ketala pü sülü kemelü miko zü tata, pü tüsonha Tyrannus hall lü mizü kemeli ba zota.

¹⁰ Tütse kena sülü bata, süla Asia lü kebako metü Niepoo Jisu jü seyi, Jewko sheri mu Greek miko sheri.

¹¹ Paul beyolü Jihova mha ungo kekro kerekri thisü.

¹² Süla püyo keta hanki (füne) zori mori füne püvo püni kesü zori, khipüvo kethi miko ni kesüsa kethiko menüta mu therü kesüko tata yo.

Sceva nu thepuko

¹³ Jews mi thüma kesuhu therü kesu huta, kesu rüpü miyo ketako ce poti, Niepoo Jisu zalü huyo, Paul zhopo thi ketao hako poyo.

¹⁴ Sceva siti mipü pünu thepumi thüna ba, Jewmi, thevo kezhoo, uko sübi thita.

¹⁵ Kesu rüpü ukofü kela kesü, Jisu I seba, Paul sheri I seba, vele no sopü?

¹⁶ Mipüyo kesu rüpü kebao, prüsü ukoyo vota, (uko cheta), ukoce kuku, mu uko meniva, süla uko rezayi mu mechü tata (ufüne nrhüta)

¹⁷ Theju süo Jews kori mu Greek miko sheri se kesüce, uko ngo thi mu mpeta; Ephesus lü kehüko metü se vota mu Niepoo Jisu zapo kemele shu süta.

¹⁸ Melü keyiko tavori de uko phrasü, hijü thi ketako püvo uko mekasü.

¹⁹ Kemedu ti lesiko pü cadu thi ketako khipü vorita, süko metü pü melü thüva thümako mhüjülü; mhama süko phri kesüce püma rakathi nye hepüngu (50, 000) mesüta.

²⁰ Hibide Jihova jü kushü mu ma mekro süta.

Kebu keti Ephesus lü süri keta

²¹ Mha hiko thi kevasa, Paul Kemesa Rüpülü lükeyi, Macedonia mu Achaia cutha sü Jerusalem lü vo keto rhüta. I sülü vo kevasa Rome lüri vo moze su.

²² Süla püzü keta mi kena ketsüpü Macedonia lüsü, Timothy mu Erastus ni, vele pü Asia lü pütühu thothü bata.

²³ Sümesü cesü süce mhakebü kebu damo, Choo la.

²⁴ Kekrelamori mipü püza Demetrius, raka rekremipü, Diana rüo thipü kereshücelü kesüla meve damo tari.

²⁵ Pü rekremiko cüpü puce süyi de poti, Kezhomiko, neko seba uko cene ngo keyi mhatho hiola.

²⁶ Süpi sheri neko metü kese kengo, Ephesus lü lebimo, vele Asia metülü, Paul hio thüma kekro thi rede keva, hikopü therü mole zite, uko bepü kethiko.

²⁷ Süla uko mhathoko kemethu thita keto kemechelü bate; sülebimo Diana kereshüce sheri mipo thalice va keto lü bate, pü züveko jü mesu vato, Asia lü sheri mu cejülü sheri reshü ketao.

²⁸ Uko mha süko se keyice uko lü reda shuta, de se metota, Ephesian mikola Diana sü zho shuwe.

²⁹ Nade metülü mhakebü phita, mu tavo Gaius mu Aristarchus ni Macedoniami Paul revülü zü vori kebani tüyi, uko metü kezü lüpü thi ta kehu thethilü lüta.

³⁰ Paul ta sülü voto kesüce kemelü miko püpo lü muta.

³¹ Asia lü püzümi kemeleko thüma ketsüpü püce süde püpo kehuthi lü lühino sü.

³² Humi mhapüpo, kekre miko kekre po side kehu sülü mha kebu shuta, mu metü khrüri kedipüla uko sülü vo kenguyita sheri püco seyi mota.

³³ Uko Alexander zitipü makro dolü züprari, Jews miko pü khapü mi mekasü; Alexander pübe chopü mice mhapo tolesü, thümako mhüjülü pümezi potole thayi.

³⁴ Vele uko püseti, pü Jew mipü, süla bavüdo kena mesü uko seta de Diana sü Ephesus mikola Kezhoo.

³⁵ Rüna kezholü kethoo miko kekha de poti, Ne Ephesus miko, Ephesus miko nadelü kehüko Diana therüpü kereshümi ziti sopü semo bata, marhe süo Jupiter thenyü yo retu kiri?

³⁶ Süo se kebala mipüri süo metsu keti kepo bamo, neko süla kemekre tate, kekri mhalü kemo mhatho thi hite.

³⁷ Kekrelamori neko thüma hiko zü vori, uko kehulü mizhü süketimi mo, mori neko rüpü sheri tha zhoshü bamo.

³⁸ Mhace Demetrius mu pürekreko mhahu panyo ti bali mha de kenyo to lize, thezho hepü meta zo, süla uko po hunehu yo panyo khipü vo shecoko ce umezi poyite.

³⁹ Vele neko mhace mhakekre ketso ba tisa thezho lüno kehulü kepo yito.

⁴⁰ Kekrelamori uko tha mhakebü keti la uko mejota keto kemeprü lü bate, püco kedi pülü makro kebu keta hio uko mezi poyi motato.

⁴¹ Pü hibi po kevasa kehu khava.