MHATHOKO 18 - KETHOLESI KESAO N.T. (BSI)

Paul Corinth lü kevo

¹ Hisalü Paul Athens lü ta Corinth lü vota.

² Sülü mipüza Aquila tipü Pontus lü menuyi, sümhüjüce pücemi Priscilla zü Italy lü voriba. Kekrelamori Claudius Jews metüpo Rome lü tata no po ketala, Paul süla tavo püni zü kesü.

³ Pü hetho kerhü tila pü tavo uni celü bata, kezüde mhatho thibata; uko mhatho lizo jüfü ce kethimi.

⁴ Pü sabath tüsonha Synagogues kolü Jews mu Greek miko zü kemeli de uko rethibayo.

⁵ Silas mu Timothy ni Macedonia lü tavori, Paul Jews koce Jisu sü Messiah zoketi posüba.

⁶ Uko pümetsu ketala mu püzhoshu ketala püfüyo keta kerhoko kekhusü de ukoce poti, Neko zapo neko piyo, I zono mesazo, hisaco I Gentiles koce votato.

⁷ Pü sülü (synagogue) tata, mipüza Titius Justus lizitio celü vo bata, pü Jihova kereshü mipü tila, puce synagogue zü keduba.

⁸ Crispus synagogue lü kezhoo, pü cekro züde Niepoo melüyi, Corinth mi thüma kekro melüyi mu jülo püyi.

⁹ Niepoo tüzülü zümholü Paul cepode, Mha mpe hite, vele jüpo süte mu kemekre ta hite.

¹⁰ Kekrelamori I nzü bazoho, mipüri nmethi meni vaho, nade hilü athüma kekro ba tila.

¹¹ Pü sülü tütsepü mu pütsü bata, uko dolü Jihova jüko pü uko metha sü.

¹² Gallio Achaia lü kezho (proconsul) thiba, Jews miko Paul metsu sürita side pütüzü sheco kezhoo cevo.

¹³ Thüma hio mishupü Jews mi zho kemolü Jihova reshüno sizi tate.

¹⁴ Hice Paul püta chopü posü to kezüce, Gallio Jews koce poti, mhace kekri keti thezho kevarhü mhatho kesü hu lize, I neko Jewko züde mha ketito.

¹⁵ Vele jükola mori theza kola, ne thezho rele kola zono nekotho peyite; kekrelamori I sübi ti kola sheco thiho.

¹⁶ Side pü sheco balü uko huva.

¹⁷ Süsa Greek miko Sosthenes, synagogue lü kezhoo tüpü shecoba mhüjülü vüva. Gallio mhapüri süo la pülüni mota.

¹⁸ Paul pütühu sülü ba side süsalü pükroko khava, ru thopü Syria lü vota, Priscilla mu Aquila ni sade; Cenchrea lü püpi thava kekrelamori pü reshupü thi meta tila.

¹⁹ Pü ta Ephesus lü vori, side sülü uni khamezüva, vele pü ta synagogue lülü, de Jews kozü mhakepovo.

²⁰ Uko püpo pütühu uko zü mha kepo süno choba, vele pü basa mota.

²¹ Vele pü uko zü kekhota sürho bate side, ukoce poti, thenye hio I Jerusalem lü ba moze su; vele I sala tavorito nekoce, mhace Jihova medo lize. Süsa pü Ephesus lü ru thopü tata.

²² Pü tavo Caesarea tsoyi de ta Jerusalem lü kho tavo kehucelü kebako kelüsü, side ta Antioch lü kita.

²³ Pütühu sülü ba, süsa ta Galatia mu Phrygia rünako lü vo, side kemelü miko thi kethepu shusü.

Apollo yitho

²⁴ Jew mipü püza Apollo, Alexandria lü pümenuyi, jüpo kese shupü, ketho lesi se meve shu, ta Ephesus lü vori.

²⁵ Thüma hio Niepoo zhorele kolü metha pü ketamipü, pülüni kene shupü, pü kepo keti kolü metsü mu Niepoo zhüko metha menu shuyo, pü John jülo kepüo zhoko kese lebi.

²⁶ Pü thepu shude Synagogue lü jüpo sü, Aquila mu Priscilla ni püfü renisü, uni püzü unice voriyi, side Jihova choko povacho pü pücesü mesa meshosü.

²⁷ Pü ta Achaia cholü vota ketoce, kemelü kroko lesi thopü sajiko tsüsü, püzüyi node; Pü ta kevorice tavo uko khrühi shusü, ngokemezhelü melü keyiko.

²⁸ Kekrelamori pü methi mhüjülü Jewko hüpü ketho lesiko popü uko mekasü, Jisu sü Khristao (Messiah) zo.