MHATHOKO 13 - KETHOLESI KESAO N.T. (BSI)

Barnabas mu Saul ni ketsü kesü

¹ Tsühi, Antioch kehulü sajukepo mu kemetha sheri ba, hiko biti: Barnabas, Simeon pücüpü Niger siyo, Lucius Cyrenemi, Manaen Herod kede balü kebamipü, mu Saul.

² Uko Niepoo zhopo thi mu mevo kebace, Kemesa Rüpü poti, Saul mu Barnabas ni kho kekre vate alano, mhatholü achoyi thi ketola I uni cüyi.

³ Uko kecho thi mu mevo bade ube chopü uniyo sü, side uni ketsü süva.

Apostleko Cyprus lü zhopo kethi

⁴ Kemesa Rüpülü uni ketsü kesüsa uni ta Seleucia lüvo de rutho khi Cyprus lü vota.

⁵ Uni ta Salamis lü vori tice, uni Jews kehuce Synagogues kolü Jihova jü zhopo thivo, uni yitholü John (Mark) ri züta.

⁶ Uni tavo cejü rethi tsokemo Paphos lü vori, mipüza Bar-jesus Jewmi zü kesüyi, kemedasaju kepo thenyümi.

⁷ Pü Sergius Paulus khro kezho mipü, mhakese mipü, pü Barnabas mu Saul ni cüsü de unice Jihova jü reni nyüde.

⁸ Kemedu keti mipü Elymas (pü zatho cebi) vori uni zü thatha, kekrelamori kezhoo (pro-consul) po unifü reni mo mu kemelü lü vori mo ketola.

⁹ Süsa Saul (püza thopü Paul thi ketao) Kemesa Rüpü pü chupü pümhüpü püpe türüsü.

¹⁰ Kedove medamedu keta, no therü kesuo nu, no kemezi metsu mu ngomu ketao, no Niepoo cho kemezi mu keveko thi mesu ketalü ukethüyi ho zome?

¹¹ Hihe, tsühi Niepoo be n yo kutato, no nmhü cetato, pütühu no nace ngomo tato. Sizisü metha kemhü mu kezü püyo vota; humipo pübece püchotha de püzü votano phuta.

¹² Süsa kezhoo sü süo ngode püngo thita mu Niepoo zhoko kengola melü ri yita.

Paul mu Barnabas ni ta Antioch lü Pesidia lü vota

¹³ Paul mu püzüko Paphos lü reyipra ketasa ta Perga lü Pamphylia lü vota. Vele John (Mark) ta sala Jerusalem lü vota.

¹⁴ Vele uni Perga lü ta Antioch lü Pisidia lü vorita. Uni deoba nha ta kereshücelü lü de bayi.

¹⁵ Thezho lesiko mu saju kepoko phri kevasa kereshücelü kezhoko uni ketsode poti, Ne usazüjüramiko mhace ketarho ti jühu thümako ce posü nyü ba tisa po süri veho.

¹⁶ Süsa Paul süthayi, pübepü ukoce chosü de poti, Ne Israel thümako, ne Jihova reshü ketako, neko afü reni süte.

¹⁷ Jihova thüma hiko potsa neko kedayi, uko Egypt lü sekemo thüma thi ketace pü uko phu rekrüsü, pübo kerekrü khipü uko zü prasü.

¹⁸ Tütse heda mesüpü uko nhatsalü kemezhe.

¹⁹ Pü rüna thüna meka va Canaan lü, pü cejü süko kezapü uko tsüsü, heshe heve kethilü.

²⁰ Süsalü tütse krada mu hepüngupü copemi khapü ukotsü, tavo Samuel saju kepoo ketso.

²¹ Süsalü uko kedepü menyüta, Jihova Saul, Kishmi pü uko tsüsü, Benjamin shuye, tütse hedapü püpo kede thi.

²² Pü kha kevasalü David po uko kede thi; zhopo kha kesü I David ngo yite, Jesse nu amelü bi ketipü, pü akelüko thikhrü yito.

²³ Hio salü Jihova Jisu kha Israel mi Kelakeyio thisü, pü hijü popü kemeta bi.

²⁴ Pü kevori mhüjü John thelü redekeyi jülo pü Israel thümako tsü.

²⁵ John püthoko tso ketasa, neko apü sopüle lüba? I püo mo. Vele Hihe, mipü asaco vorizüho, I pü pheku sheri phrüyi sümo le.

²⁶ Thümako, sazüjürako, mu Abraham nuneko, neko dolü somi Niepoo khri mpe tayo sheri, neko ce kelakeyi jü hio khasü züho.

²⁷ Kekrelamori Jerusalem lü kehüko mu kezhoko püse kemola, mori saju kepoko jü deoba metsü phri kebako sekemola, thajü popü kemeta thitsü sü ketola pü mejova.

²⁸ Uko pü mesa keshü ngoyi mo zo sheri püpü Pilate-e mhüjülü dokhri vano sita.

²⁹ Uko thajü popü kemeta jüko thitso kevasa, süyo pü pükiri, püvo mhakhre pülü khrüva.

³⁰ Vele Jihova kesalü püphü merhü süte.

³¹ Tüsozho kekro pü minhüngo thisü, Galilee lü püzü Jerusalem lü kevoriko, pü kengo zhopo kethiko zo.

³² Hani neko ce kenü theju keve pü po süyo, thajü upotsa neko ce popü kemetako.

³³ Jihova u uko nuneko ce posüze, popü kemeta jüko thi kesü Jisu phü merhü süte; Cheleko kenalü thopü metati bi, “No anu, tha yowilü I nmenu sü teho.”

³⁴ Kesalü püphü merhü sü ketasü, sasa hote, hioju thopü metati “I David kekhrüpü nkhrü süto.”

³⁵ Chele lesida kekrelü poti, “No n Kemesao po kesa ngoho.”

³⁶ Kekrelamori David Jihova medolü pütülü kehüko choyi thi, zü züte, püponeko züde züte, kecekere thite.

³⁷ Vele Jihova püphü merhü kesüo kece kere ngomo.

³⁸ Süla asazüjürako, mu thümako neko seyite, thüma hio yono kejo vakeyi khapü neko tsüsüte.

³⁹ Pü melü keyiko metü mha metülü thi kemezi yito, Moses zholü uthi kemezi yiho ta ketalü.

⁴⁰ Süla menu yite, saju kepoko dipü popü meta sheri neko yo vori mo ketola.

⁴¹ Pete, ne mhalü kerejo ketoko, nengo thiba ka tate, kekrelamori netüce I mhatho thisü, mhatho süo neko püri melü mote, humi nekoce posü zo sheri.

⁴² Paul mu Barnabas ni tata kezüce thümako unipo theju süo deoba nha posasü no zita.

⁴³ Kehu lata kezüce Jews miko mu Judahmi kemoko nani zü ketako Paul mu Barnabas ni sameju ta; side uni ukopo Jihova ngokemezhelü tha metüyi no uko tarho sü.

⁴⁴ Süsanha nadelü thüma metü tavori kenguyi de Jihova jü renita.

⁴⁵ Vele Jews miko makro tavori ketala uko rota, jü süko Paul pokesüko metsuta, ketherüti po mu zho shüta.

⁴⁶ Siri Paul mu Barnabas ni thepu shude poti, Jihova jü popü neko ce sü mera ti mesüzo, vele neko se mu ngo zori melümo ta lize neko tho lüyi tate, kechothe kehü ngoyi shümo ta tisa, hani ta Gentiles (Jews kemoko) ce vo tato.

⁴⁷ Kekrelamori Niepoo hani cepoti, nekopo Gentileko mhüjülü kevepü thi tato, nepo cejü valakolü kelakeyi thi ketola.

⁴⁸ Gentileko hio sekeyi ce uko nüta, uko Niepoo jü thi mele melu süta, kechothe kehü kedapü kemeta kekro kemelümi thiyi.

⁴⁹ Niepoo jü keyepü sükhü sümhü metüko süva.

⁵⁰ Vele Jewko kemelü keve mu ukhakesü thenopüko lü tho mesu süta, nadelü thüma kemele miko Paul mu Barnabas ni methi to süta, mu uni hupü jükezho khü kolü süva.

⁵¹ Vele uni pheziyo renyoko kekhupü süko metsu sü, mu uni ta Iconium lü vorita.

⁵² Sajiko kenüpo uchupü mu Kemesa Rüpü lü hüta.