Matthew 9 - KETHOLESI KESAO N.T. (BSI)

Jisu lasami püh thi küsührho küsü

¹ Süsa Jisu püzu püh lü bayi die tasü Putho Pu ra vota.

² Sücesü Yhie! Mi lasami püh püh pu zilü süyi die rhapüh Puce vori: sücesü Jisu puko kümülü ngo sü die Pu küthi-o yisü; Anu n zü veyite, n küphomako va n prü va ho, zita.

³ Sücesü lüsiküseko humi ulülü no sü, thüma hio Jihova tha yozo, zibata.

⁴ Eli Jisu puko lüdoko seyi die puko yisü, Neko dipüh na ne lülü mha küsu müdoyo la? zita.

⁵ N küphomako va n prü vaho; zi küti küpo mo sü die tayite, zi küti küpo nyi dipüh-o po rüyikuta

⁶ Eli neko po thümanuo cejü hilü ri mi küphoma va süyi küve küku ba küti seyi kütona; si die Pu lasao yisü; sü nzi pühyi die ta n celü vo tate, zisü.

⁷ Süsa pu sü die ta pu celü vota.

⁸ Süze makroo sü ngo küsüce puko malhü thita, sidie Jihova küku süsübi küti püh thüma küprü na Pu shuh ta.

Jisu Matthew ci küyi

⁹ Süsa Jisu sülü püthü vo küzüce Matthew li küti-oe khazhonu kükhrü balü ba die pu ngoyi; mo Pu süo yisü; A sa müdzi yite, zisü. Süsa pu ri sü die ta Pu sa müdzi ta.

¹⁰ Süsa Pu hi tozu die lü celü ba küyice khazhonu kükhrüko mo küphomako kükro vori die Jisu mo Pu sadziko züh bayi.

¹¹ Sücesü Phariseeko sü ngo sü die müthaküyiko yisü, Neko kümütha-o dipüh na khazhonu kükhrüko mo küphomako züh mhati mhakra yo la? zita.

¹² Eli Jisu süo se sü die puko yisü, küsührhomi daruküsemi süh mori ve, eli sükoe küthimi na zo; zisü.

¹³ Neko vo die I-e rüsuküthio mori ngokümüzhe anüku, zi püh kümüta züo co seyite. Kükrenamoli, I-e kümathoko mori küphomako po thülü küdeyi küto na küvori zo.

Mvo küti mütha küsü

¹⁴ Süsa John sadziko-e Puce vori die sü, Dipüh na hako mo Phariseeko tsükünu kümvo yo, mo n sadzi ko-e mvo yo mo-a?

¹⁵ Jisu pukoce po die; zhosao celü küba nunekoe zhosao puko züh kübalü no ulü su die thükri thi batayo me? Eli tüsoko vori to; sücesü mi puko celü no zhosao züh tata ze puko kümvo tato.

¹⁶ Süze mipüh ri khü, küsa cekhro püh kügwü mükhu yomo, kükrenamoli püh mükhu küsü khü-oe kükreo cekhro pü tato, sücesü cekhro mürüh ku vato.

¹⁷ Mori mi khubühzü küsa püh thigibüh kügwükolü sü yomo, Kükrenamoli mhabüh süo ga ta to, sidie khubühzü ri rüla mo thigibühri müka vato. Süri mi khubühzü küsa püh thigibüh küsalü sü mayo, süze künanyi mükrü püh mayo.

Mülhimi püh nupü mo Jisu khüphre nyi küsüpü

¹⁸ Pu sükoce mha hiko po kübalü, Yhie, Mi mhu küzho thi kütami püh vori Pu rüsu die sü, a nupü tsü cehi sate, süri no vori die n be sho püh puyo sü zote, süze pu rhühyi ta zoto.

¹⁹ Süsa Jisu sü die Pu mo Pu sadziko küzüh süo müdzi vo ta.

²⁰ Sücesü Yhie, thünomi tse küriküna thüza krüh ta kütapü püh Pu sacovori die Pu khüphre nyi sü.

²¹ Kükrenamoli pue, I Pu khünyita zori nyi sü lize müsayi ta zoto, zi die lü küta na.

²² Eli Jisu rüh pra pu ngoyi die pu yisü, rülipü n züveyi tate, n kümülü tho nthi kümüsa lotsüh vaho, zisü, mo sütü lüsü thünopü müsayi ta.

²³ Süze Jisu mülhi süo ce tsoyi die thümako lila khu mo münyo münyi pu küzü ngoyi die;

²⁴ Pu süko yisü, neko thüthi müra süte, kükrenamoli rüli hipü sa tamo; eli züh züzo, zita. Süri süko Pu krühnyi bata.

²⁵ Eli thümako rüdü küta sa Pu celü lü die süpü be cesü, mo süpü süri ta.

²⁶ Süsa mha hio dzüh cejü süo lü mütü sevo ta.

Jisu mhücemi küna thi küsührho küsü

²⁷ Sidie Jisu thüthi sülüno tata küzüce mhücemi küna-e se zo die Puce; No David nuo, hanyi phimüzhe zo süte, zi bata.

²⁸ Süze Pu celü lüri tice, mhüce nyiri ta Puce lüri, mo Jisu unyi kütso die sü, nenyi I mha hihi thiyive li küti mülü tü me? Zisü. Unyi sü, izo, Nyepoo, zita.

²⁹ Süsa Jisu unyi mhü brü die sü, nenyi kümülü bi die thi küyi yo thiyi te, zisü.

³⁰ Süsa unyi mhü mhürho parita; mo Jisu unyi yisü, nenyi püh mipüh ceri po hite, zisü.

³¹ Eli unyi tapra tice Pu dzüh kümüle süo püh rüna sülü mütü küza vota.

Jisu thürüküsü po kübü pü kütami püh thi küsührho küsü

³² Süsa puko tapra küzüce, Yhie! Mi thürüküsü po u kübü küta zü po küthomi püh züh Puce vori.

³³ Sidie thürüküsüo hu küvace, süo züri po yita, mo thüma kroo u malhü thi die; mha hihi bi küti Israel mi cejülü ngo mo zolu, süzita.

³⁴ Süri, Phariseekoe sü; Pu thürüküsuko küde-o züh die thürüküsuko hu küta zo, zi die pota.

Jisu thüma kroo phimüzhe küta

³⁵ Süsa Jisu rüna nadekolü mo natsühkolü whi die puko synagogueko lü mi mütha mo tüyoküde züyiküve po püh mice sü, süze thüma dolü küthi künyi lünyiko thi küsührho vota.

³⁶ Eli Pu thüma kroo ngo küsüce, puko ngo püh Pu lü müzhe ta, kükrenamoli puko tüko u kükhü küdi bi müza mo küzaküze ta küta na.

³⁷ Süsa Pu müthaküyikoce po die, rüce-e krophi, eli, mhathomi-e tsari zo, zita.

³⁸ Süna neko yi Nyepoo po mhathomi kütsüh sü kütona shote, zisü