Matthew 4 - KETHOLESI KESAO N.T. (BSI)

Jisu mvo küti, Pu küdo küta, mo Pu ku küyi

¹ Süsa Jisu-e Satan po pu küdo tozu die Rüpüo po Pu hüzüh nhatsalü vota.

² Mo Pu tüsozho hieda mo tüzühzho hieda mvo kütasa Pu müri ta.

³ Süsa küdo küti-o Puce vori die sü, No Jihova nuo zo lize kütsü hiko ce po sü die süko po tsükhrüda thiyite, zita.

⁴ Süri pu süo küla die sü, Thümae tsükhrüda libi na mori Jihova talü küpari zü kühopüh ri na rhühyi to; zi küti thopüh müta, zita.

⁵ Süsa Satan Pu züh rüna kümüsao lü vo die Pu po kürüsuce pilüyo bayi.

⁶ Sidie Pu yisü; No Jihova nuo lize, ntho rütu prüte, kükrenamoli, Pu na Pu shoyimi mülü sü die, kühopühtüce zori n po rütu prü kütsü-püh yori n phe rha mo küto na puko be püh n rhapühyi tato, zi küti thopüh ma küti na.

⁷ Jisu puce po die, no n Nyepoo Jihova küdo sü, zi küti tho püh müta zo, zita.

⁸ Süsari, Küsüo Pu züh cejüthu kürükrü shüh pühyo vo die cejülü küdeko mo sülü thüshühthürhoko thapüh Pu ka:

⁹ Sidie Pu yisü, No tüprü a rüsu to lize I hiko mütü püh n prüto, zita.

¹⁰ Süsa Jisu puce, Satan no tatayi, kükrenamoli, no n Nyepoo Jihova libi rüsu mo Pu shoyi libi thiyi mosü, zi die tho püh kümüzü na.

¹¹ Süsa küsüo Pu kha va die tata, mo Yhie, Tüyo shoyimi vori die Pu khrühi yita.

Galileelü Jisu mhatho thürako

¹² Süsa Jisu mi John tüpüh küdücelü sü küva seyi die ta sü Galileelü vota.

¹³ Sidie Pu Nazareth khava die tasü Zebulun mo Naphtali nyi taralü dzüküzho shice Kapernaumlü vo lhü bata.

¹⁴ Süosü Isaiah sadzühküse-oe po püh kümüta:

¹⁵ Jordan rüshi prüh küvo Zebulun cejü mo Naphtali cejü küsa mo Naphtali cejü dzüküzho sho Galileemi mülü kümoko;

¹⁶ Thüma küzühlü kütako küve küzhopüh ngote; süze cejü küsa mo pu khrilü kübako yori küve prarite; zi müzü.

¹⁷ Süyogwino Jisu mi mütha shühdü die, nelü küdeyite, tüyo küde münoto ba küta na, zita.

Jisu khukütümi mi da ci küyi

¹⁸ Süze Jisu Galilee dzüküzho shice ta vo küzüce Pu mi küna sazühzüra nyi Simon Peter liyo kütio mo pü sazüh-o Andrew unyi khuma püh dzüküzholü kügü ta die ngo, kükrenamoli unyi-e khukütümi zo küti na.

¹⁹ Mo Pu unyi yisü, A samüdziyite, I nenyi po thüma kütümi thito; zisü.

²⁰ Süzi sü mütha unyi khüma kha mha va die Pu sa müdzi ta.

²¹ Süsari Pu sülüno ta vo küzüce sazühzüra mi kükre küna Zebedee nu James mo pu sazüh-o John unyi unyi khuma mükhu ba die ngoyi, mo Pu unyi cisü.

²² Süsa unyi unyi po mo püzu-o khamha va die Pu sa müdzita.

Jisu mi mütha mo mi thi küsürho küsü

²³ Sidie Jisu Galilee cejü mütülü rühu die synagogueko lü mi mütha mo küde züyi küve dzühpo mika, mo thüma dolü küthi künyi lünyiko thi küsührho sü.

²⁴ Sücesü Syria cejü mütülü Pu dzüh po kümüle shüh vota; momi küthikünyi kükrekre kütiko, küsü rüpü po u kübü kütako, mülo kütako, lasako, mo thürüyozü mütü züh Puce vori mo Pu süko mütü thi küsührho sü.

²⁵ Süna Galilee lü mo Decapolislü mo Jerusalem mo Judea cejü lüri mo Jordan rü shico thüma krodepüh Pu sa müdzi tata.