Matthew 25 - KETHOLESI KESAO N.T. (BSI)

Rülimi küri püh küzüve küsü

¹ Sücesü tüyo küdee rülimi phosüh küri u metobüh püh vo zhosao sho müri küti bizo.

² Puko mi pühngu udo ve; mo mi pühngu udo su.

³ Mo udo küsukoe u mütobüh püh küyice püko metobühlü u mezü khasüyi mota.

⁴ Süri udo küvekoe u mezübüh ri mo u metobüh ri pühyi.

⁵ Süce zhosao vori münu kütace püko mütü rünyi die züh prüta.

⁶ Sücesü müsotülu mi se die, Yhie zhosao vori züho, neko vo pu züh küsühte; zisü.

⁷ Süce rüli süko mütü süri die u metobüh lo kütso ve thiyi.

⁸ Süce udo küdikoe udo küveko yisü, ne mezü hu püh ha prüte, ha metobüh mhü tazü mo, zita.

⁹ Süri udo küvekoe lasü, süziyi süte, kükrenamoli süzi va lize uko mütü tsomo tato; ne tho vo die tir küzühmi celü khri küyi-e veku tato, zita.

¹⁰ Sidie pukoe khrito vo küta dolü zhosao vorita, mo kürüdepü ba kütakoe zhosao züh die nolü Ihülü lüta, sidie cekha khayita.

¹¹ Süsaco rüli kükreko ri vori die sü, Nyepoo, Nyepoo khri hako prüte, zisü.

¹² Eli Pu süko khü küla die sü, I nekoce potü süto, I neko semo, zita.

¹³ Süna neko khü mo la bazoyite, kükrenamoli neko thümanuo küvori tüsozhoko mo pu bavüdo se kümo na.

Cetami süh püh küzüve küsü

¹⁴ Süzomori tüyo küdee mipühne rüvüh rüna kümücuh pühlü vota küzüce; pu pu cetako ci püh püce süyi die pu celü mhako küza püh puko mülü küsü bizo.

¹⁵ Sücesü pü süko mipüh püh thiyi küve küsüra die thoküprü pühngü püh mipüh prüsü, kükremipüh küna kha prü, kükreo püh kha prüsü; sidie pu rüvüh ta.

¹⁶ Süsa thoküprü pühngu ngo küyioe süko süh vo tülhe thi die, thoküprü kükre pühngu prayi.

¹⁷ Sübi die küna ngo küyio ri vo südü küna mveyi.

¹⁸ Eli thoküprü püh ngo küyioe vo die cejü sü prü die pu nyepoo mha sü püh küva müta va.

¹⁹ Süze tülhü ta die ceta süko Nyepoo la vori die puko ci sü die puko lhe kütso.

²⁰ Sücesü thoküprü pühngu ngoküyio pu thoküprü kükre pühngu sa püh vori die sü; Nyepoo no thoküprü pühngu püh a prü süe, mo Yhie! I kükre pühngu sa mve yi ve; zisü.

²¹ Süsa pu Nyepoo pu yi sü; “tso süe no ceta küve mo küzüthoo, no mha küdopühlü ri zütho ba küyi na I n po mha kükrolü künyepo to; no ri vori die n Nyepoo züh n nü bata te;” zita.

²² Süze thoküprü küna ngoküyio ri vori die sü, Nyepoo no thoküprü küna püh a prü süe, mo Yhie! I sü mhü thoküprü küna mve sayi te, zisü.

²³ Pu Nyepoo pu yisü, “tso süe no ceta küve mo küzüthoo, no mha küdopühlü ri zütho ba küyi na I n thi püh mha kükro mhu künyepo süto, ta vori die n Nyepoo züh nnü bayite,” zita.

²⁴ Süsa thoküprü püh ngoküyio vori die sü; Nyepoo no thüma nlü kürüh shüh püh ti I seyo; no prüh sü kümo ra ri rühyo, mo nyira sü kümo ra ri pa Küngu tayo;

²⁵ Süna I müprüh die n thoküprüo püh vo cejü khro küva püh müta ho, Yhie! N zü sü hice ba zo; zisü.

²⁶ Pu Nyepoo pu yisü, no küthüro mo mhathikümütsü cetao, I tsava sü kümora ri rühyo, mo nyira sü kümo rari pa Küngu tayo ti no se kütho tomo!

²⁷ Sülize, no a rüka püh vo kalemi celü sü mati müsüh süze I vori tice a rüka mo pu pra küsa ngo küyi müsüh,

²⁸ Süna neko pu celüno thoküprüo khi püh vo thoküprü küri kübao prü vate.

²⁹ Kükrenamoli, mha pu belü kübao kha püh sa süto; mo pu kro küthikuyi to, süri thüma kühopühri mha pu belü ba kümoo pu belü kübao ri khi püh tata to kütina.

³⁰ Süze neko mveyi kümo cetao kügü püh shozu küzühlü sü vate, sülüno kra mo uhu thüzhe pü bato.

Mi kütso küto thüla nha

³¹ Süze thümanuo zapozale thi die Pu shoyi kümüsako mütü züh Pu sa küvorice sücesü Pu zapozale küthi küde bayo bato.

³² Mo thüma lünyi mütü züh vori Pu mhüzülü Künguto. Sidie tüko kükhümi-e tünyiko dolüno tükoko la kreyi tayo küti bi die Pu mi kho kükre püh la küna thi vato.

³³ Pu tükoko püh pu zaco süyito süri tünyikoe püh Pu veco sü vato.

³⁴ Süsa Küde Pu zaco kübako yisü apo galiphi püh neko küprüko, neko voridie cejü thiyi prühlüno küsüh püh kümüta kedebao gwüyite;

³⁵ Kükrenamoli I müri tarü neko mhapüh apo ti, I thüri tarü neko mhapüh apo krayi, I rüsomi thi tarü neko a müsoyi;

³⁶ I müthu tarü neko khümüne püh a whü, I mhathi tarü neko vori a tükhrüh mo I küdücelü ba rü neko ace vori tina.

³⁷ Sücesü kümathoko Pu khü küla die sü, Nyepoo, No di küthice müri ta die hako mhapüh nva thisü, mori thüri ta die hako mhapüh npo kra la? zito.

³⁸ Mo küdi küthice no rüsomi thi ta die hako n zühyi, mori müthu ta die hako khümüne püh n whu süa?

³⁹ Mori di küthice no mhathi zü mori küdücelü ba die hako nce vori la? zito.

⁴⁰ Sücesü küdeo puko zü küla die sü, I nekoce potü süto, neko a sazüh künyitho hiko mipüh yori thi küsüsa ayo thi küsü bizo, zitato.

⁴¹ Süsa Pu Pu veco kübakoce po die, neko rüshu küpüko, neko tasü küshothe me, thürüküsüo mo püshoyiko na küsühpüh kümüta lü vo tate;

⁴² Kükrenamoli, I müri tarü, neko mha püh apo timo, I thüri zürü neko mhapüh apo kramo;

⁴³ I rüsomi thi tarü neko azühyi mute, I müthu tarü neko khümüne püh a mbemüne mo, I mhathi zürü mo I küdecelü barü neko vori a pe mo, zita to.

⁴⁴ Süsa sükori Pu isü, Nyepoo, diküthice no müri zü, mori thüri zü, mori rüsomi thi zü, mori müthu zü, mori süzü, mori küdecelü zü die hako n ngo die n thükü sü mu ta la? zito.

⁴⁵ Süsa Pu süko zü küla die, I nekoce potü süto, nekoe künyitho hiko yori thisü mo küta sü a yo ri thisü mota zo, zita to.

⁴⁶ Sidie puko po tasü küshothe kümüthilü vo tato, mo kümathokoe küshothe kürhühlü vo tato.