Matthew 23 - KETHOLESI KESAO N.T. (BSI)

Lüsiküseko mo Phariseeko rüle küsü po küsü

¹ Süsa Jisu müthaküyiko mo thüma krooce mha po die:

² Lüsiküseko mo Phariseekoe Moses balü bayo.

³ Süna pükoe dipüh püh nekoce po sheli süko thi mo zühyite; süri puko bi tahi; Kükrenamoli puko mha poyo eli thi mo zühyi mo tina.

⁴ Pukoe, thüpüh kümüsiko da püh mi bokayo sü die mipo püyo, eli puko tho zoe ubecine ri püh süko nyi külüri süyo mo.

⁵ Süri puko mhatho küthi mütü ri mipo ngo küto na thiyo küti zo; süzomoli puko kütholüsi züboko tho mülemülu püh u süh thi pu tayo, mo puko khü mhüko thi kümünye pu tayo.

⁶ Sidie puko tülhüko lüri thürho ba kürako phu die bayo; süze synagogko lüri thüba kürükrü mo thürho bako phu die ba küti püko nüyo.

⁷ Mo Ihethothikolü ri mipo puko külü, mo mipo puko yisü, Rabi, Rabi, zi die puko ci küti püko nüyo.

⁸ Eli, neko zoe mipo neko püh Rabi puco kümüthao zi die cihi, kükrenamoli Khrista libi neko kümüthao zo, mo neko mütüko sazühzüra zo.

⁹ Süze cejü hilü mipühri püh neko po lie cihi. Kükrenamoli tüyo küba neko poe püh libi zo.

¹⁰ Sülibizomoli, mipo neko yisü krütako lie cihite, Kükrenamoli Khrista libi neko krütao zo tina.

¹¹ Süri neko dolü küzho thoo sü neko cetao thitato.

¹² Kükrenamoli, thüma kühopühri pütho pu lü kürükrüyo kütio thi kürünu vato, eli pütho püthi kürünu yo kütio thi kürükrü vato.

Jisu küthürakütiko müjo küsü

¹³ Süri küthüraküti lüsiküseko mo Phariseeko, nekoe thiyite! Kükrenamoli nekoe mipo tüyo küdelü lüyi küto khayo tina, nekoe neko tho ri lü mu mo kükremi po ri lü nyiyo mo tina.

¹⁴ Nekoe Tsee thiyite, Neko küthüraküti lüsiküseko mo Phariseeko! Kükrenamoli, nekoe samepüko ce müzo tiyi tayo, mo küthüra die küsho thi müshoyo, süna nekoe miceri kümüjo rüh ku küti ngoto.

¹⁵ Nekoe tsee thiyite neko lüsiküseko mo Phariseeko, neko küthüra kütiko, kükrenamoli, nekoe mipo Jewmi zho zühyi küto na dzüküzho mo cejü mütü whi tayo; mo mipüh po süzi küyice nekoe pu thipüh neko dü küna mezao nune thi vayo.

¹⁶ Nekoe thiyite! Neko mhüce shothako, Nekoe po die; Kühopühri rüsuce po püh rüshu küti zoe mhapühri zo mo, eli kühopühri kürüsucelü sunako po püh rüshü lize pue mi po küpümi tazo küti na, süzi yo,

¹⁷ Kümülo mo mhüceko. Ka sunako me mo die süko thi kümüsayi küta kürüsuceo zhoku ta?

¹⁸ Süze kühopühri rüsubao po rüshu lize, süsü mhapüh ri zomo, süri kühopühri süyo küba mhanyoko kha püh rüshu thi küvako po rüshü lize pu jo ta zo, ziyo.

¹⁹ Neko kümülo mo mhüceko. Ka mha khapüh rüsu thi küsüko me süko thi kümüsa küsü rüsubao zhoku ta?

²⁰ Thüma kühopühri kürüsuba süh rüshu lize pu süo mo sülü küba mütü süh rüshu vazo.

²¹ Mo thüma kühopühri kürüsuce po die rüshu lize, süo mo sülü küba mütü po die rüshu ta zo.

²² Tü po rüshu lize pu Jihova küdeba mo süo lü küba mütü sa po die rüshü tazo.

²³ Neko küthüraküti lüsiküseko mo Phariseeko, nekoe thiyite! Nekoe nyeprü, dunia mo shitsüh za kürizapüh khasüyo eli nekoe thüzholü Jüko ceri mosüku küti kümüzi sheco, mi phikümüzhe, mo kümülü hihibi kütiko kha vayo; hiko ri thi zü tüzo, süri kükreko thimo ta zü mozo.

²⁴ Ne mhüce die shotha yo kütiko; Nekoe velhanekoe donya vayo, eli utko müzoyi tayo.

²⁵ Neko küthüraküti Lüsiküseko mo Phariseeko, nekoe tsee thiyite! Kükrenamoli, nekoe tühe mo mükhu shozüco thi kümüsa vayo, eli ulükue mi mha mükhü küti mo küzüküye küti po chu pu bayo.

²⁶ N mhüküce Phariseeko, tühe mo mükhu lüku thi kümüsayi mürate, sülize shozüco ri müsa tato.

²⁷ Neko küthüraküti lüsiküse mo Phariseeko, Nekoe thiyite! Kükrenamoli, nekoe mhakhre mhuzu nyhi kümüga küma bizo, eli ulükue küsami roko mo müsakümo po chu pu küba bizo.

²⁸ Neko shozu thüma küngoce zoe pe kümatho zo, eli neko lüe küthüra küti mo thüzho kümo lünyiko po chu pü bayo.

²⁹ Neko küthüraküti lüsiküseko mo Phariseeko, nekoe thiyite! Kükrenamoli nekoe sadzühküseko mhakhre thi süyo mo kümathoko mhakhre tho küzüve süyo.

³⁰ Sidie nekoe sü, mhaceno ue uko po neko tüce Ihü küti püh thi lize ukoe sadzühküsemiko za püh uyo süpü tata mo to mo rü; süziyo.

³¹ Süzi die nekoe neko tho neko yisü sadzühküsemi küdokhrimi nuneko thi die poyo.

³² Süze neko ri neko poneko bi die thiyite.

³³ Neko tünyhiko, neko nyhibvü shühyeko, neko dibi die Gehenna mezalü ne müjo kütoo thürayi ta?

³⁴ Süna Yhie! I sadzühküsemiko, mhaküsemiko mo lüsiküseko kütsüh püh nekoce süto; sidie neko süko humi dokhrimo tüpüh guto, mo neko synagogko lüno humi tüpüh vüto, sidie nade lilü puko müthi münyi to.

³⁵ Sidie Abel kümathoo za kümükrüh lüno vo rüsuce mo rüsuba nyi dolüno neko pu dokhri küvao Baraka nuo Zakaria za kütso cejü hilü kümatho mütü za po neko piyo vorito.

³⁶ I nekoce potü süto, mha süko mütü tsüdo thüma hiko yo vorito, zita.

Jisu Jerusalem va kürükra

³⁷ Yhie! Jerusalem, Jerusalem, sadzühküseko dokhri küti mo mi kütsüh püh nce küsüko kütsü püh süko va kütio, vükrüe pu nuneko kükü küngu püh pu si khro süyiyo küti bi I va ditsu dithüdü püh n nuneko ci künguyi nyi süa? Eli, neko tho mute!

³⁸ Yhie! Neko ce va kümüthu püh n prü va die pe sa mo tato.

³⁹ Süzomoli, I nekoce po süto, Nekoe Nyepoo za süh vori küzüo yhevetho zi die po kümothe neko a ngo sa lhote; zita.