Matthew 21 - KETHOLESI KESAO N.T. (BSI)

Jisu müle mülu sü Jerusalem Iü küvo

¹ Süsa püko Jerusalem müno vori küzüce tasü Olive cejüthu co Bethphage lü voriyi; mo Jisu müthaküyi mi küna kütsüh sü die;

² Nenyi tasü nenyi rüpeco küba rünao lü lüyi sülü lü mütha mi gadapü püh mu pu nupü sa püh küma ngoyi toho, sünyi phrühyi die züh a cie vori te.

³ Mo thüma kühopühri nenyi kütso lize, Nyepooe hinyi süh mosü züle; zi die po süte, Sülize pu sünyi kütsüh sü vazo toho.

⁴ Sülize hiohi thi küyice thazü sadzühküseo po püh kümüta.

⁵ Neko vo Zion nüpüce po süte, Yhie n Küdeoe mününui die gadapü püh, püco gadapü nuo yo bayi die nce vori züho, zidie po püh kümüta züo tsühyi küto na, zisü.

⁶ Sidie müthaküyinyi vo die Jisu pünyice po küsü bi die thiyi.

⁷ Sidie gadapü mo pünu nyi süh vori die puko khü püh sünyi yo khra sü die Pu po süo bayi.

⁸ Süce makroo u ukhüko püh shodelü khra sü, kükrekoe sühco rho püh shokhrasü.

⁹ Süsa thümakro Pu mhüzüco kütako ri Pu saco kütako ri se die, Hosanna, David nuo. Nyepoo za süh vori küzüo yhievetho, Hosana kürükrüthoo; zita.

¹⁰ Sücesü Pu Jerusalem lü lüri küyice rüna mütü mülümüli die sü; thüma hihi sopüh ta ha? zita.

¹¹ Süsa thüma krooe sü; Hiohi Galilee lü küba Nazareth lüno küvori sadzühküseo Jisu zo, zita.

Jisu Kürüsuce thi kümüsa küta

¹² Süze Jisu kürüsucelü lü die sülü mha zhüh mo mha khri küba mütü huva mo rüka küle küba miz mütü mo thürüvünu zhuh küba mütü phüla kügü va.

¹³ Sidie Pu sükoce po die, A ce püh küshoce thi to, zi die tho püh müta, eli nekoe süo püh kürügomi ce thi ve, zita.

¹⁴ Sücesü mhücemi mo pheyhomiko kürüsucelü Püce vori, mo Pu süko mütü thi küsührho tso sü.

¹⁵ Eli pethiküzhoko mo lüsiküseko Pu mha u malhü mhatho thi küsüko, mo natsimiko mo khresa rülimiko kürüsuce shi mhüko mütülü se die; Hosana David nuo, zi küba ngo sü die püko ro shüh die, Pu yisü;

¹⁶ No pukoe dipüh po ba shi küti seba me? zita. Süna Jisu puko yisü; Izo; nekoe payhoko mo no kübako talü no n küshüh thi mve lotsüh süzo zi küti mhapüh ceri phi mo zo me? zita.

¹⁷ Süsa Pu puko kha va die tasü Bethani rüna lü vo die sülü bata.

Jisu shedübo rüshü küva

¹⁸ Sütücesü Pu küshüh-o rüna tala sü rüna nadeo lü la vori küzüce; Pu müri ta.

¹⁹ Süce Pu shoshice shedübo püh ngo sü die ta süce vori, eli pu se pühri ngo mo die pu nyi libi küba zota, süna Pu süo yisü thayogwino n se pühri ji sa hi tate, zisü. Mo süzi sü mütha shedübo süo sa rügwi ta.

²⁰ Mo müthaküyiko süo ngo küsüce püko malhü thi die sü, dithelüno shedüboo rügwi ta she he? zita.

²¹ Jisu püko zü küla die sü, l nekoce potü süto, Mhaceno neko rüsüh rüna külho kümülü ba lize; neko shedübo hio yo thi küta libi mori neko cejüthu hio ri yisü, no ta rüde dzüküzholü lü tate; zisü zori süo thiyi zoto,

²² Süze neko mha kühopühri thiyi küto mülükhro die sho lize süko ngoyi zoto, zita. Jisu ktikü dzüh kütso küta

²³ Süsa Pu kürüsucelü vori die mimütha kübace, pethiküzhoko mo thüma do lü mülhiko Püce vori die sü, no dipüh küku süh die mha hiko thiyo la? Mo sopühno küku hiko püh n prü sü la, zi die kütso ta.

²⁴ Süsa Jisu püko zü küla die sü, Iri nekoce mhapüh kütso to, mo nekori ace posü lize I ri dipüh küku süh die mha hiko thiyo shi küti neko ce po süto, zita.

²⁵ John dzülu khaküsüo dipühceo no vori la? Tüyono vori me? Thüma celü no vori la? Si die kütso sü. Sücesü püko tho püko dolü kürüthi die sü, uko Puce tüyono vori zo zisü mo Pu uko yisü, süze dithi die neko pu mülüyi mo ta? zita to.

²⁶ Eli puko sü, thüma celüno vori zo zisü to ri thümako müprüh, kükrenamoli, thümako pu yisü sadzühküsemi püh lizi die lüyo tina; zi bata.

²⁷ Sidie püko Jisu zü küla die sü, Hako poyilho, zita. Süsa Pu süko yisü I ri dipüh küku süh die mha hikohi thiyo sheli küti nekoce poyilho, zita.

Nu küna püh küzüve küsü

²⁸ Süri nekoe dipüh thili die lü ta? Mipüh-e pu nu küna ne, mo pu kürao yisü anu; no tha prü die u khübüh yilü mhathi te, zisü.

²⁹ Pu po die sü I prüyi lho; zita. Eli künuco pu lü küdeyi die prüta.

³⁰ Süsa pu vo mi künao ce süsü bi die po sü; süce pue sü, I prüto, nyiepoo, süzi sü die prü mo ta.

³¹ Sünyi sopüh-o pü nyi po müdo thi süa? Ukoe sü kürao zo, zisü; Jisu puko yisü, I nekoce potü süto, thüsoküyiko mo tükhrümiko neko züra tüyo küdebalü lü tato. Zita.

³² Kükrenamoli, John-e kümatho zho süh nekoce vori, süri neko pu mülüyi mu te, süri thüsoküyiko mu tükhrümiko pu mülüyi, Eli neko jüo ngo zori künuco pu mülüyi kütona ne lü küdeyi mu te, zita.

Yitemi kürüzü kro püh püh küzüve küsü

³³ Züve kükre püh rünyi yite; Thazü mipühnee khübüh yi püh teyi, sidie pu cokhakha püh süo mütuyi; süsari khübüh zü gü küto thüthi süyi, sidie pu rikhüba püh thi sü die khapüh yitemi kropüh mülü va die tasü rüna kümücu shüh pühlü vo ta;

³⁴ Süsa khübüh seko ra küyi tü vori kütace, pu süko rayiküto na shoyimi kropüh kütsüh püh yite süko ce süsü.

³⁵ Sücesü yiteko pu shoyi süko tüyi die mipüh vüva, mipüh dokhri va, mo kütsü püh mi kükre püh vava.

³⁶ Süsari Pu shoyi kürako ceri kroku ti kütsüh la sü, süri puko liko yo bi die thi lata.

³⁷ Süri künuthoo pu putho pu nuo kütsüh püh sükoce sü la die sü, puko ri a nuo sü rho mütse zo, süzi ba.

³⁸ Eli yiteko sü pu nuo ngo küsüce, püko tho püko dolü küpo die, Hiohi pu ka küyio zo, khe! Uko pu dokhri va die pu ka yiyi ta khe.

³⁹ Sidie puko pu tüzüh nhaphü pra die pu dokhri va.

⁴⁰ Süze khübüh yi nyepo süo vori tice, pu yite süko yo dipüh bi ta ta? zitsü

⁴¹ Süko puyisü, pu thüma küsü süko müka va die pu khübüh yi süko kha püh pütü tüce khübüh se mülhü püh prü sü küto yite kükremiko belü sü vato; zita.

⁴² Jisu puko yisü ce küthikoe kütsü kha küva tsüo mi süo khi püh u külü tsü küzhoo thite Hihi Nyepoo tho thi küsü zo, mo süosü u mhüngoce u malhü zo; zi püh kümüzü neko phi mo zo me? zita.

⁴³ Süna I nekoce po süto, neko celüno tüyo küde khi püh vo use pariyi küto shuye püh prü vato.

⁴⁴ Sidie thüma kühopühri rütu kütsü süo yo küprümi rhaphre vato, mo kütsü süo rütu kühopüh yori prü lize sümi nyophre püh nyophu thi vato, zita.

⁴⁵ Sücesü pethiküzhoko mo Phariseekoe Pu züve süo se küyice; puko na po bazo küti seyi.

⁴⁶ Süri puko ube sho püh Puyo sü tozü rhü küsüce thüma kroo müprü ta, kükrenamoli, puko Jisu yisü sadzühküsemi püh thiyo küti na.