Matthew 20 - KETHOLESI KESAO N.T. (BSI)

Khübüh yilü mhathomiko dzüh

¹ Süze tüyo küdee mipühne küshüh-o rüna sü die vo mi po pu khübüh yilü prü mhathi küto na zhokra thüma küphu bizo.

² Mo sücesü pu mhathomi süko züh die pühnha dulili tozu die küpoyi die süko po puyilü prüta.

³ Süsa pu bavüdo süh-o lüri ta vorü thüma kropüh mhapühri thimo die lhethothilü küba ngoyi.

⁴ Süna pu sükoce nekori a khübüh yilü prüte, süze I neko po didüpüh ngoyi zü sheli püh neko prü tomo; zisü die süko ri po taprüta.

⁵ Süsa pu bavüdo shorüh-olü ri mo thüci-olüri sübi die mi kütsüh sü.

⁶ Süsari pu bavüdo küripühkri-olüri rühu pradie kükre kropüh kümükrethi die tha küba ngoyi die süko yisü; Neko dithi die zhotü mhapühri thi mo die hizi bata la? Zi die kütso sü.

⁷ Süko pu yisü, kükrenamoli mipühri ha zho khri kümo na zo, zita Pu süko yisü; nekori ayilü prüte, süze ne didüpüh ngoyi zü sheli püh ne prüto, zisü.

⁸ Süsa thüva vori küyice yi nyepoo pu shoyiko yisü, mhathomako ciyi die künuthoo lü voikürathoo kütso puko zho püh prü süte, zisü.

⁹ Sücesü ba küripühkrilü u zhokhri küyiko ri vori die püko mipüh dulili ngo ve thiyi.

¹⁰ Eli prü, kürathoko vori tice, pukoe mice ri kroku ngoyi küto müri ba, eli puko ri mipüh dulili ngo küyi zo.

¹¹ Süna puko süo ngo küyice, puko nyepo thüma küve süo yo panyo die sü,

¹² thüma vori künu hikohi bavüdo püh mha küthi zo, süri noe süko püh ha zhotü tüna külü hie kümüzhe die mhathi kütako dümi te, zita.

¹³ Eli pu süko mipüh yisü, A züh-o; I n yo kükri shemo ho, No azüh duli püh lüno kütakhoyi mo me?

¹⁴ N züo pühyi die tata te; I püh n küprü bi die püh künutho hiko ri prü zoto.

¹⁵ I atho a mha püh a müdo thi küti thüzho mo me? I ve küti na no ango püh n mhü külo te me? zisü.

¹⁶ Süsü bi die künumi rata to, mo kürami nu tato; Jisu Pu süh dzüh küpo va süh-o

¹⁷ Süsa Jisu Jerusalem lü kho küzüce, müthaküyi kürikünako züh kre ta die Pu sholü süko yisü.

¹⁸ Yhie, Uko Jerusalemlü kho züe, mo mi thümanuo tüpüh pethiküzhoko mo lüsiküseko belü süto, sidie Pu müzho die Pu dokhri vano tato.

¹⁹ Sidie Pu püh mülükümoko belü sü die mi po Pu krühnyi, pu vü mo Pu püh cross yono gu vato.

Zebedee nu nyi zu küsho

²⁰ Süsa Zebedee nü nyi zu pu nunyi züh die Puce vori die shetüprü Pu rüsu die Püce mhapüh sho.

²¹ Mo Pu süpü yisü, No dipüh sho nyi yo la? zisü. Süpü Pu yisü; No anu nyi hi mipüh po n küde balü n zaco mo kükreo po n veco zi bayi küto thi a prüte; zita,

²² Eli Jisu po la die sü, No sho küzüo se die sho ba mozo, Nenyie I kra too küba heo krayi ve me? Mori I baptaiz thipü kübao lü nenyi ri baptaiz thiyi ve me? zita. Punyi sü, hanyi sü thiyi ve zo, zita.

²³ Pu sünyi yisü, Nenyie I kra too küba heo sü krayi vezoto kütho, mo I baptaiz thipü kübalü nenyi baptaizthiyi vezo, Eli nenyi po a zaco mori a veco ba küto sü a müdo mo süri süosü khapüh a Po tho kha prü tozü küsüh kümütao prüto, zita.

²⁴ Sücesü mi küriko süo se küsüce puko unyi sazüh züranyi yo puko lü rüdata.

²⁵ Mo Jisu puko cipüh Puce süyi die sü, neko se bato: Mülükümomi küdenukoe mi mhu künyepo küso bayo, sidie kükumi po püko mhü kükhayi tayo.

²⁶ Eli neko dolü zoe süzi tayi lho, süri neko dolü somi-e küzhotho thinyi yo sheli sümi po neko thüküo thiyite.

²⁷ Mo neko dolü küratho thinyi yo kütio po nekodolü cetao thiyi te.

²⁸ Süsü bi thümanuo ri mi po Pu shoyi thi toa mori mi shoyi thi tozü mo thüma kükro pho rha kütona Pu kürhühro khasü tozu die küvori zo.

Jisu mhücemi küna thi nave küsü

²⁹ Süsa püko Jericho lüno ta pra küzüce, thüma kro küzho püh Pu züh tata.

³⁰ Sücesü Yhie, mhücemi küna shoshice ba die Pu sü sholü vori küzü se südie, müyi müto die, Yhie, Nyepoo no David nüo, ha phimüzhe süte zi bata.

³¹ Süri makroo pünyi po kümükre bata no die pünyi küthi ta; Eli pünyi se küyieku die, No Nyepoo David nuo hanyi phimüzhe zo süyi, zi bata.

³² Sücesü Jisu thayi die unyi cisü, sidie unyi yisü dipüh thipüh ne küprü nenyi nüta? zisü.

³³ Unyi sü, Nyepoo, hanyi mhü po mha ngoyi zhe zita.

³⁴ Süna Jisu unyi phimüzhe die unyi brü sü, süzi mütha unyi mhü mhangoyi ta die Pu sa müdzi ta