Matthew 19 - KETHOLESI KESAO N.T. (BSI)

Jisu küthikünyimiko thi küsührho küsü

¹ Süze Jisu zü hiko pothü küva sa Pu Galilee lüno tasü Jordan rü shi Judea mü rhelü vorita.

² Mo thüma kro küzho shuh püh Pu züh vori mo Pu süko mütü thi küsührho sü.

Thüno thüpü kükho küva ta küsü

³ Sücesü Phariseeko Püce vori Pu müdephi die sü; mipüh-e mha kühopüh nari pü cemi kha küva thüzho me? zita.

⁴ Pu sükoce po die sü, süprühlü thüma thi küsüoe thüpumi mo thünomi thi sü.

⁵ Mo Pu po die, hihi na thüpuoe pupo puzu khava die pu cemi züh püh thita to; sidie unyi küzüh thipüh thi tato.

⁶ Süna punyi mi küna thisa mota die küzüh thipüh thi tato. Süsü na Jihovae thi küsa sü küvao thüma po brükho vahi te; zita.

⁷ Süko Pu yisü, Sülize dipüh na Moses-e thazü u nopüne va küva lüsi khasü die pu khava no küti po süa? zita.

⁸ Pu sükoce po die, Nekolü kükhrikürüh na Mosae neko po u cemine khava no küsü zo, eli süprühlüe süzi sümo; zita.

⁹ I nekoce po süto, thüma kühopühri kürügü kürüzü na zo kümosa pu cemi kha va die thüno kükre yi lize pu rügü rüzü ta zo; thüma kühopühri pu kha küvapü yi lize pu ri rügü rüzü tazo, zita.

¹⁰ Pu müthaküyiko Pu yisü, thüma pu cemine yo süzi tayo lize ceyo kümoe veku; zita.

¹¹ Eli, Pu pukoce, küku kha u prü küsümi zo kümosa thüma zü hio zühtso küyi di.

¹² Kükrenamoli thüma ceyo mo küta hi humi uzune valüno münu püh vori tayo, humi thüma müdolüno süzi tayo, humi tüyo küde na u tho u ceyo thi mu tayo; thüma kühopühri zü hihi zühyi küvemi po zühyite; zita.

Jisu galiphi püh natsimiko küprü

¹³ Sücesü mi Jisu po pu be shopüh nyi die sho süno die natsimiko züh Puce vori; eli Pusadziko süko küthita.

¹⁴ Süri Jisu po die, Natsimiko po ace vorite, mo süko kha hite; Kükrenamoli, tüyo küdee süko züzo tina.

¹⁵ Sidie Pu be shopüh süko yo süsü die Pu sülüno ta la ta.

Künemi püh vori mha kütso küti

¹⁶ Sücesü Yhie, Mipüh Püce vori die sü, Kümütha keveo I küshothe kürhüh ngoyi küto na mha küve dipühpüh thi mosüa? Sidie kütso.

¹⁷ Süce Pu süo yisü; No dithi-e a yisü küveo liyo la? Mipüh zo kümosa küve kükre di; süosü Jihova zo, süri no kürhühlü lünyiyo lize, no zü khaküsüko thi mo zühyi te, zita.

¹⁸ Pu kütsola die, dipüh-o ta? zisü. Jisu po la die; No mi dokhri sü, no rügü rüzü sü no mi rügo sü, no kücezü zhopo thi sü,

¹⁹ Npo nzu rhoyite, süze no n sühzanumi khrü püh ntho n kükhrü biyite, süzi püh kümüzüko zo, zita.

²⁰ Khresao sü Püce, I a natsilüno mha hiko mütü thimo züh sürite, dipüh ba sa lua? Zita.

²¹ Jisu sü püce, No vezhosüyi nyi lize vo die n mha n züko zhüh püh küdimiko prü vate, sülize noe tüyo n cene neyi tato, sidie vori a sa müdzi tate, zita.

²² Süri khresa hio zü süo se küyice pu thü susa die tata, kükrenamoli pu mhaküne shüh mi kütina.

²³ Süsa Jisu müthaküyiko, yisü, I nekoce potü süto, künemi püh tüyo küdelü lü küto rüh shüh zo.

²⁴ Sü sari I nekoce potü süto, Künemi püh Jihava küdelü lü küto ceri ut püh po thüprüh celü lü küta rüyiku zoto.

²⁵ Sücesü müthaküyiko zü süo se puko malhü thiri ta die sü, süzi ta lize sopühno külayi veta? zita.

²⁶ Süsa Jisu puko pe türü die sü puko yisü, Thümae hihi thiyi rüh zo, eli Jihovae mha mütü thiyi vezo, zita.

²⁷ Süsa Peter Pu zü küla die sü, Yhie ha mha mütü khatso va die n sa müdzita te; mo ha dipüh ngoyi ta? zita.

²⁸ Jisu pükoce po die sü, I nekoce po süto, Thümanuo Pu küde zapozale küthi balü ba die mha thi küsala küti tüce, neko ri küdeba kürikünalü ba die Israelmi shühye kürikünako ne küti to, zita.

²⁹ Süze thüma kühopühri, aza na uce ukro, mori u sazühzüra, u lipüne, mori u pone, mori u cemine, mori u zune, mori u tü u cejü kha küva mi pu südü thükra ngo layito, mo pu küshothe kürhüh ngoyi to.

³⁰ Süri kürami kükro nu tato, mo künumi kükro rata to zita.