Matthew 17 - KETHOLESI KESAO N.T. (BSI)

Jisu Pü külhü thi mükre küta

¹ Süsa zho shorüh sa Jisue Peter mo James, mo sü sazüh-o John züh Pü sa die süko züh kre cejüthu kürükrü pühyo vota.

² Sidie Pu puko küngoce Pulhü thi mükreyita, mo Pu küve nace küve bita, süze Pu khüne ri müga püh vekrü ta.

³ Sücesü yhie, Moses mo Elijah nyi pükoce vori die Pu züh kürüthi ta.

⁴ Süce Peter Jisu zü küla die sü, Nyepoo uko hicehi ba küta uko na vezo tole; No n müdo lize uko hicehi pro süh thiyi to khe, pühnha, püh Moses na, mo püh Elijah na; zita.

⁵ Pü züpo küthalü kümhü vekrü küti püh vori die puko jü püyita; mo Yhie! Kümhü süo lü mha khü püh vori die: Hihi anu a khrüo zo, anüthoo sü Pu zo, neko Pu khü rünyiyite zita.

⁶ Mo müthaküyiko zü süo, se küsüce rütu prü cejü thorüh pü züta, mo müprüh püh kümüre thita.

⁷ Sücesü Jisu vori puko nyidie sürite, mo müprüh hite, zita.

⁸ Süze puko mhürho küyice, Jisu libi sa mipühri ba sa mota.

⁹ Süsa puko cejüthu yono kiri küyice, Jisu piko yisü, Thümanio küsalüno rhühla süri ta kümothe neko mha küngoo püh mipüh ceri pohi te; zi die pota.

¹⁰ Sülize müthaküyiko Pu kütso die, sü; sülize dipüh na lüsiküsekoe Elijah po vori müra mozo sü li die poyo la? zita.

¹¹ Süna Jisu puko zü küla die sü, Elijah vori die mha mütü thi mve la zoto kütho.

¹² Eli I neko ce potü süto, Elijah hizü vori tazo, süri mi pu seyimo die pu yono puko müdo thi vazo, süsübi thümanuo ri puko belü kümüzhe to; zita.

¹³ Süsa müthaküyikori Pu John mi dzülukhaküsüo dzüh pukoce küpo lüyi.

Jisu thürüküsü po ü kübü küta püh thi küsührho küsü

¹⁴ Süsa puko thüma kroo ce vori küyice, mipüh vori die tüprü Pu mhüzülü shetü püyi die;

¹⁵ Nyepoo anuo phimüzhe süyi, Kükrenamoli pu thürüyosü thi die kümüzhe shüh tate, mo pu tsükünu rütu melü ri lü mo tsükünu dzülü ri prü tata tele.

¹⁶ Mo I pu züh n sadziko ceri vori, eli puko pu thi küsührhoyi lhote, zisü.

¹⁷ Süsa Jisu pola die sü, Yhie! Neko kümülü küdi mo küthothiyi külho shuhyeko, apo zho dithe güh neko züh bata? Apo zho dithe püh neko yo sügüsühie ba ta? Pü züh vorite, zisü.

¹⁸ Süsa Jisu küsü rüpüo küthi sü, süce pu sülüno ta parita, mo sütü lüsü natsi süo sührhoyita.

¹⁹ Süsa müthaküyiko u tsühkre Jisu ce vori die sü, Hako dipüh na pü huyi mo ta? zita.

²⁰ Jisu puko yisü, Neko mülü kümo nazo, I nekoce po süto, neko kümülü gakresi dü pühri ba lize neko cejüthu hio ce po die, no thüthi hilüno ta rüde lishico phe tate, süzi sü zori süo rüde ta zota, mo neko na mhapühri thiyi külho di tazoto.

²¹ Süzizosheri, mha hikohi küsho kümvo lüno molize ta prayi yomo; zita.

Jisu Pu tho Pu süh dzüh küpo

²² Süsa puko Galileelü balu tice, Jisu puko yisü, thümanuo tü püh mi belü sü vato.

²³ Sidie puko Pu dokhri vato, süri Pü zhosüh nha rhühlasü tato, zita. Süna püko mütü ulü sü shüh ta

Kürüsuce khrü kha küsü

²⁴ Sidie puko Capernaumlü vori küzüce tükhrü khrüyo kütimiko Peter ce vori diesü, neko kümüthao khazhonu khrü khrüyo mo me? Sidie kütso ta.

²⁵ Mo pü sü, I, khrü sü yozo; zisü. Süsa pü celü lüri tice, Jisu püce; Simon, no dipü bi die lüba? Küdenukoe somimi celü khazhonu khrüyoa? Püko tho puko nuneko yo me rüsomi ce khrüyo la? zisü.

²⁶ Peter püce po die, rüsomiko celü zo, zisü, Jisu sü, süsa püko nunekoe u kükha di vesüh, zisü.

²⁷ Utho süzizosheri, püko lü thi müsü küva kümüprühna; no dzüküzholü prü die n khüsüprüh kügü süte, sidie no khu vori kürathoo tüyi die puta cega süte, sülize no rükathi püh ngoyi to; mo süo püh vo ana ri mo nna ri khapüh süko prü vate, zisü.