Matthew 12 - KETHOLESI KESAO N.T. (BSI)

Jisu-e kürülüzho nha Phariseeko kürhe küta

¹ Sütücesü Jisu-e kürülü tüso nha tasü mi yi püthü vozü ru, Pü müthaküyiko müri küta na atalha krüh mürhühti too ta.

² Eli Phariseeko sü ngo sü die, Pu yisü, Yhei, N sadziko kürülüzho nha ri thüzho kümo thiyo zo, zita.

³ Eli Pu süko yisü, neko David mo pu sadziko-e müri kütace dipüh bi die;

⁴ Jihova celü lü die pethiküzhoko libi zo kümosa; puri mo pu züh kütako ri po ti küti thüzho kümo rüsucelü mi mhüngo küthi tsükhrüda-o tiyi ta shi küti phi mo zo me?

⁵ Mori pethiküzhoko dibi die kürülüzho nha kürüsücelü kürülüzho thüzho varhü zori puko küjo di, süzi küti thopüh kümüzü neko phi mo zo me?

⁶ Süri I nekoce posü to, kürüsüce ceri zhoku küti püh thüthi hilü ba; zita.

⁷ Süri nekoe I rüsu küthi mori phikümüzhe anüku, zi küti co-o seba yo lize nekoe küjo küdi püh müjo tayi lho moru; zita.

⁸ Kükrenamoli, thümanuo kürülüzho mhu ri nyepo zo küti na, zita.

Besami püh thi küsührho küsü

⁹ Süsa Pu sülüno ta pra die tasü puko sinagog celü lü;

¹⁰ Sücesü, Yhei u be sa kütami püh sülü ba, Mo puko Pu müzho küto na Pu kütso die; kürülüzho nha mi thi küsührho küti thüzho me? zita.

¹¹ Mo Pu süko yisü, ne dolü humi tüko püh ba die süo kürülüzho nha rütu khuholü lü kütace pu vo süo süsa püh pari tayo kümo sopüh ba?

¹² Sülize thümae di thüdupüh tüko ceri pu ma rüh kuta? Süna kürülüzho nha ri mha küve küthi thü zho zo, zita.

¹³ Süsa Pu thümao yisü, n be sho püh parite, zisü, mo pu sho püh pari; süce süo ri thi mve püh kükreco bi va.

¹⁴ Süsa Phariseeko ta pra die vo puko dipüh bi die Pu dokhri va toshi küti thüdo rhü küka süta.

Küda küyi cetao

¹⁵ Sücesü Jisu süo seyi die sülüno ta rüde ta; mo thüma kükro Pu sa müdzi vota; mo Pu süko mütü thi küsührho sü.

¹⁶ Sidie Pu süko po Pu dzüh püh mi müse hino die puko kükha va.

¹⁷ Sidie thazü Isaiah sadzüküse-o po:

¹⁸ Yhe, a cetao, I pu kü da küyio, I pu kükhrü thoo, alüzori pu ngo a künü-o; I a Rüpü kha Pu yo süto. Sidie Pu thüco thüpe thi püh mülükümoko ka süto.

¹⁹ Pu mi züh kümürha mori küphüse ri tayi Iho, mori shopü sholiko lü ri mipo Pu khü selho.

²⁰ Pu sheco-o po kuyi ta kümothe, tükhrü prühlipre küzü pühri cephro valho, mo Pue metobüh kükholo ne püh zori brü mhü valho.

²¹ Sidie shühyieko po Pu zalü u kümüri ne die lhüto, süzi püh kümüta züo thi tsühyi.

Mi Jisu yisü Beelzebub li küta

²² Süsa mi thürüküsü po u züh küta u mhüce mo züpokütho püh züh Puce vori, mo Pu süo thi küsührho süva, süsa pu züri po mo mha ri ngo parita.

²³ Sücesü thüma mütü u malhü thi die sü, hi-ohi David nuo zo mo me? zita.

²⁴ Süri Phariseeko süo se sü die; Thüma hio thürüküsüko küde-o Beelzebub küku süh zo kümosa thürüküsüko huyiyo mo, zita.

²⁵ Jisu puko lüdo seyi die puko yisü, küde kühopühri putho pu püphro ta lize katayo; mo rüna mori ce kühopühri putho pü püphro ta lize thayi yo mo.

²⁶ Süze Satan tho Satan hu ta lize putho pu püphro vazo, sülize dipüh bi die pu küde thayi veta?

²⁷ Mo I-e Beelzebub küku süh die thürüküsüko huyo lize, neko nunekoe sopüh küku süh die süko hu yo la? Süna puko süri die neko sheco thita to.

²⁸ Eli I Jihova Rüpü küku süh die küsü rüpüko huyo lize, süsa Jihova küde nekoce vori tazo.

²⁹ Süze mipühno puceri kükumi püh celü lü die pu tüpüh pha va müra modie dipüh bi die pu mhako mükayi veta? Pu tüpüh pha küva züh pu mhako khiyi küve zo.

³⁰ Kühopühn aceco kümoo a kümütsumi zo, mo thüma kühopühri a züh mha künguyo kümoo süh küho thi vayo.

³¹ Süna I nekoce posü to, küphoma kühopühri mo thüma kütha küho pühri va püh thüma prüto, eli Kümüsa Rüpü kütha-e vapüh thüma prü yilho.

³² Mo kühopühri zü po püh thümanuo mütsu küti zo-e vapüh pu prüto; eli kühopühri Kümüsa Rüpü küthami cejü hilü ri mo tüyo ri pu küjo vapüh prü yilho.

Nhase boo mu pu se

³³ Nhasebo-o thi mve sü die pu se ri po veyi, mo lize nhasebo-o thi müsü sü die pu se ri po süta; zite: pu se yo no pu bo ri seyi yo tina.

³⁴ Neko nyhibü shühyeko, neko vemo zo die, dibi die mhaküve poyi ta? Kükrenamoli mha pulü chupü küba bi die pu talü po pariyo tina.

³⁵ Thüma küve mi pu mülü mhabüh küvelü no mha küve püh pariyo, mo thüma küsümino pu mülü mhabühlü no mha küsü püh pariyo.

³⁶ Eli I nekoce posü to, kütso küto tüsonha-e thüma züthu zürü küpo mütü ri na puco lha küka la zoto.

³⁷ Kükrenamoli n züpo na n yisü müzi li zito, mo n züpo na n müjo ri vazo to tina, zita.

Mha zasi püh sho küsü

³⁸ Süsa lüsiküsemi mo Pheriseemi kropüh Pu yisü, Kümütha-o, ha n celü zasi püh ngo nyiyo le, zisü.

³⁹ Süri Pu süko zü küla die sü, küsü küthi mo kürüzü shühyeko-e zasiko rüda mo phuyo küti zo; eli Jonah sadzühküseo yono zasi thi küsüo zo kümosa zasi kükre pühri kha la süyi lhote;

⁴⁰ Kükrenamoli, Jonah-e tüsozho süh mo tüzühzho süh khu küzhoo vadelü küzü bi thümanuo ri tüsozho süh mo tüzühzho süh cejü mülülü züto.

⁴¹ Zünyoküti küto tüsonha Ninevehmiko süri die tsüdo nulhü hiko züh thato, sidie puko müjo to, kükrenamoli puko Jonah zhopo mülüyi die thülü küdeyi küta na; mo Yhei, Jonah ceri zhoku küti püh hice ba.

⁴² Zünyo küti küto tüsonha mükhroco küdepü süri die tsüdo numi hiko züh tha die süko müjo to; Kükrenamoli pu cejü kümüprühtholü vori die Solomon mhase zü rünyi küti na; süze Yhie! Solomon ceri zhoku küti püh hice ba, zita.

Müsakümo rüpüo la küvori

⁴³ Süze müsa kümo rüpüo thüma lüno pra kütace; pu kürülü thüthi phu die cejü küsokolü rühu ta tayo, süri ngoyi mota yo.

⁴⁴ Süsa pue sü I tala sü hizü badie pari küta celü la voto; sidie pu la vori tice ce süo müthu mo phro kümüsa mo kütso küzüve püh küma ngoyi.

⁴⁵ Süsa pu ta pra die pu ceri süku küti rüpü thüna zühyi die sülü vori die lhü tayo; süsa thüma süo rüle künuco-e küraco ceri sü thünao tayo. Tsüdo kürüzü numi hiko yori sübi zoto, zita.

Jisu ne zü mo Pu sadzühiko

⁴⁶ Pu thüma kroko züh kürüthi küthalü Yhei, Pu zu mo Pu sazüh neko Pu züh kürüthi tozu vori shozu thata.

⁴⁷ Süsa humi Puce, Yhei nzu mo n sazüh neko n züh kürüthi nyi die vori ceta tha ho; zisü.

⁴⁸ Eli Pu thüma Puce po küsüo yisü, Azu sopüh-a mo a sazüh neko somi-a?

⁴⁹ Sidie Pu Pu be shopüh Pu müthaküyiko ceco tha die sü, Yhei, Azu mo a sazühzürako sü!

⁵⁰ Kükrenamoli, thüma kühopühri tüyo küba Apoo müdoko thi mo zühyo kütiko sü a sazühzürako, a lipüneko mo azuko zo, zita.