Matthew 11 - KETHOLESI KESAO N.T. (BSI)

John pu sadziko kütsüh püh Puce küsü

¹ Süsa Jisu-e müthaküyi kürinkünakoce zü potso küva sa Pu sülüno tasü rünakolü vo mi mütha, mo mha popüh mika to vota.

² Sülize John küdücelü ba die Khristao mhatho dzühko se küsüce pu sadzimi küna kütsüh sü die, Puce:

³ No vori to kütao sü me, mo die hapo kükre püh müri la bata? zi die kütso ta.

⁴ Jisu unyi khü küla die sü, nenyi vo die John ce nenyi küseküngoko püh po süte;

⁵ Mhücemi mha ngoyi bate, pheyhomi sho tayi, leprami müsayi, nyijimi mha khü seyi, küsami phu müsüyi, mo küdimiko ce züyiküveo püh posü bate.

⁶ Mo thüma kühopühri mhapüh nari ayo jotayo kümomi yheve tho.

⁷ Süsa unyi ta küta sa Jisu-e John dzüh püh thümakro-o ce po shühdü die puko yisü, neko nhatsalü dipüh pe tozü die pra la? Tükhra-e vo tükhrü hü küna küsü püh me?

⁸ Süri nekoe dipüh pe tozü die pra-a? Thüma u khüne kümha süh kütimi püh me? Yhei, Thüma u khüne kümünü mo kümha sühyo kütimiko-e küdemi cekolü bayo;

⁹ Eli neko dipüh pe tozü die pra la? Sadzühküsemi püh me? I nekoce potü süto, sadzühküsemi ceri zhoku küti püh zo.

¹⁰ Kükrenamoli pu dzüh popüh kümüta: Yhei, I nmhuzülüno a shoyi-o kütsüh süto, mo pu n mhuzülüno n shoko küsüh süto; zipüh kümütao sü pu zo.

¹¹ I nekoce potü süto, thünomi yo Ihü küvoriko dolü John mi dzülu khaküsüo ceri zhoku küti süri mozo, süri tüyo küde balü künyithoo zo sheri pu ceri zhoku.

¹² Süze John tülüno vori tsüdo kütso mi tüyo küde phu murimu tate, mo murimu küyimi süo püh uzü thiyi bate.

¹³ Kükrenamoli John vori kümothe sadzühküsemi mütü mo thüzhoo ri sadzühküse zü po vorizo.

¹⁴ Mo neko ri süo ngoyi nyiyo lize, hi-ohi vori too küta Elijah zo ho.

¹⁵ Uni künemi po rünyiyi te.

¹⁶ Süri tsüdonumiko hi püh dipüh bi lie pota? Süsü natsimiko-e lhethothilü no mürü thi die huhu yisü:

¹⁷ Ha lila khusü; eli ne-e nasu mute ha-e thükri thisü eli ne-e krayi mote, zidie po küsüko bi zo.

¹⁸ Kükrenamoli, John vori die mi züh mhati mhakra mo rü, mi pu yisü thürü küsü zühyo lizita.

¹⁹ Thümanuo vori die mi züh mhatimhakra zo, süri puko Pu yisü, Yhei, U coyhu kürüh mo khubüh zo büh, thüsoküyiko mo küphomoko khretho-o sü, zita. Eli, pu nuneko yono mhaseo küve tha süyo.

Mülü kümu rünako

²⁰ Sücesü Pu Pu küku mhatho thi shüh küsü rünakolü thülü küdeyi kümo na Pu süko tha shühdü die sü:

²¹ Tsee! Chorazin, no thiyite! Tsee! Bethsaida, nori thiyite! Kükrenamoli, mhatho küzho thi puh nece küsüko hi bi die Tyre mo Sidon nyi rünalü ri thisü lize puko-e thazütho gakhrokhü mo nyogwü süh die thülü küdeyi tato murü.

²² Eli I nekoce posü to, kütso küto tüso nha-e ne rüle ceri Tyre mo Sidon rülee yhieyi veku to.

²³ Süze no Kapernaun, n tho nthi kürükrü püh tü tso bate me? N khipüh prü mezalü sü vato. Kükrena moli, n celü mhatho küzho thi küsüko hi Sodomlü ri thi sü lize Sodom-e tha kütso ri balu to murü.

²⁴ Eli I nce posü to, kütso küto nha-e n rüle ceri Sodom rülee yhieyi veku ta zoto.

Vori rülüyi no die ci küsü

²⁵ Sücesü Jisu-e küla die sü; Apo, tü mo cejü mhu Nyepoo, n müza ve; Kükrenamoli, no mha küsekülüko mhuzülü mha hiko küva püh müta die püh payhoko müsemüngo küsü na.

²⁶ Süzi Kütho, Apo, no n mhuzüce zo-e hizi küti n müdo küta na, zita.

²⁷ Apoo tho mha mütü kha pün a prü süve; Poo zo kümosa mipüh ri nuo seyo mo; mori nuo tho tha püh müsemüngo sü zo kümosa mipühri Poo seyo mo.

²⁸ Neko kümüzhe mo ne püh müsi küta khüko ace vorite, I kürülü khapüh sümi prüto.

²⁹ Neko a kadu püyi mo a celü mhaseyite, kükrenamoli, I a zho ve, mo ko mo, kitina, süzi lize nelü kürülü ngoyi to.

³⁰ Kükrenamoli, a kadu pü rüyi, mo apüh ri pü mbro tina.