MARK 7 - KETHOLESI KESAO N.T. (BSI)

Jisue lüsiküseko mu Phariseeko künga küsü

¹ Sülize Phariseeko mu Lüsiküseko humi Jerusalem lüno tavori Puce künguyi.

² Mu pukoe Pu sadziko humi ube mütümo die tsükhrüda ti küba ngo die thata.

³ Kükrelamori, Phariseemiko mu Jewmi koe mülhimiko zho müdzi die ube mütü kümothe mhati mhakra yo mo tila.

⁴ Süla pukoe lhethothi kolü ta die vori lize puko khrü kümüsa va kümothe mhati mhakra yomo. Süzo kümo ukrü zho kükre kükrori ngopüh züh tayo: süko ukhu uhe mu ule, müsüh püh küthi mhabühko mu mez kükhrü biti zhoko züh tayo.

⁵ Süsa Phariseeko mu lüsiküsekoe Pu kütso die; dipüh la n sadzikoe ube mütümo die mhati die pethimi zhoko varhü tatale? Zita.

⁶ Pue süko zü küla die sü; Isaiah sadzühküseoe neko küthürakütiko hila; hihibi die tho nve shüh püh müta. Thüma hiko u takhülü a rhoyo, eli uko lün azüh kümücu tayo.

⁷ Ukoe thüma celün ngo küyi kümütha züko püh mi mütha die uko a rüsu thüdo thi tayo.

⁸ Nekoe pooe khaküsü zhoko khava die thüma celün küyie püh küvori zhoko: sükosü le mükhu tühe khrü küti zhoko mu süsübi küti kükro züh tayo, zita.

⁹ Mu Pu puko yisü, Nekoe netho nezhoko züh ba küta la Pooe zü khaküsüko khava vayo.

¹⁰ Mosae poküti, Npo nzu rhoyite, mu upo uzu rüshu kütio posa tate, ziyo.

¹¹ Eli nekoe po küti; mhaceno mipühe pupo mori pu zu yisü; Korban te, süosü acelü nve küyi müsühko püh Poo prüve zi küsüce puyo mhapühri thi mota die pu khasü vayo.

¹² Mu süo pupo puzu la mhapühri thisü mo tayo.

¹³ Sidie ne zho kha küsüko la Poo züko khi püh puco küdi thiva yo, Mu nekoe süsü bi ti kükre thi tayo.

¹⁴ Sidie Pu makroo ci püh Puce süyi die sü, mütüko a khü rünyiyi die seyite;

¹⁵ Shozuco no thüma lü lütiko pühri thüma va mürho vayomo, eli mha pu lüno küprariko sükosü thüma va mürho vayo.

¹⁶ Thüma kühopühri uni ne die rüniyi kütomi po rüniyite, zita.

¹⁷ Süze Pu thüma kroo lüno tasü ce pühlü lü küyice Pu sadzikoe züve süo co kütso ta.

¹⁸ Mu Pu süko yisü, nekori mha se kükreyi mozo me? Shozuco no püh thüma lülü tikoe thüma va mürho va yomo.

¹⁹ Kükrelamori, sükosüe pu mülü lü mo die pu vadelü vo tayo, sidie mha mütü thi kümüsa va die putho pusho müsühlü laprari tayo küti nekoe se mo me?

²⁰ Mu Pue podie; thüma lüno küprari kosü mi thi mürho vayo.

²¹ Kükrelamori, thüma lüno küprari kosü, lüdoküsu, kükhrüküzüh küti, kürüzü.

²² Küdokhri, kürüyo, mhakümüho, ugwiküne, küphoma külü, müho münyi küti.

²³ Mi ngo umhü külo, Poo kütha, kümüko, kübado, mhaküsü hikohi mütü thüma lüno prari die thüma thi müsu vayo.

Syrofanicismi pü püh thi küsührho küsü

²⁴ Sülize Pu sülüno süri die tasü Tyre mu Sidon taralü voriyi. Sidie Pu cepühlü lüri küyicie mipühri po senyi mota, süri Pu rüsü kündi ta.

²⁵ Kükrelamori, Pu küvori sesü die, thünopühmi püh Pu nupüe küsu rüpü po kübü küta pü püh vori die tü Pu phelü prüta.

²⁶ Thüno hipüe Syrofonicia yemi Greekmipü püh, pu Jisu po pu nupü yo thürüküsü rüpüo huva no die mülo büh ta.

²⁷ Süsa Jisu pu yisü; natsimiko po mügu mürate, kükrelamori natsimi lüva khiyi die kügü püh tüshiko mhuzülü sü küti vemo tila, zita.

²⁸ Süri süpü Puce po la die sü, süri Nyepoo, tüshikori mez khrolüno natsimi lüva kürako pati yo zo le, zita.

²⁹ Mu Jisu süpü yisü, zü hio la no tavo tate, küsu rüpüo n nupü lüno ta prari taho, zita.

³⁰ Sidie pu celü vori tice küsu rupüo punupü lüno ta prata die pu püh thüzi lü müzü küta ngoyi.

Niji mu züpo küthomi püh thi nve küsü

³¹ Li cono ta la sü Decapolis püthü sü Galilee dzükütü co voriyi.

³² Sücesü mi uni rüji mu Züpo küyidu küta mi püh züh Pu ce vori die Pupo Pu be püh punyi sü no die shota.

³³ Süla Pu makroo dolüno süo züh prari die, Pu becine püh pu nicelü süyi mu mhütsa sü die pu meyi nyi sü.

³⁴ Sidie tosü tüyo pe die mühi sü, sidie süo yisü “Ephphatha” puco veyi tate, zisü.

³⁵ Süzi sü mütha pu ni veyi die mha khü seyi ta, mu pu meyi ri veyi die Züpo utü thiyi ta.

³⁶ Mu Pu puko po püh mipühceri pohi no sü, eli Pu uko po püh pohi noku mu ukoe püh po küthi sakuta.

³⁷ Sidie pukoe u malhü thizo die sü; pu mha mütü thi nve süve, Pu niji miri po mhakhü seyite, mu züpo kethomiri po züpoyite, zita.