MARK 6 - KETHOLESI KESAO N.T. (BSI)

Nazeret lü Jisu müla küta

¹ Süsa sülüno tasü putho Pu rüna vorita, mu Pu sadziko Pu samüdzita.

² Süze kürülüzho vori küyice, Pu Synagogue lüno mi mütha süta, mu Pu khü küse kükro u malhü thi die sü, hi-ohi dipühce no mha hikohi ngoyi ta la?

³ Mu mhase dibi zo ti püh pu prü die Pu po Pu be süh die küku mhatho hikohi ri thiyi talaha? Hi-ohi süh rükre-o zo, mu Mary nu James mu Joseph mu Judah mu Simon neko sazüh-o zo mome? Sülize Pu lipü nekori hice u züh ba zo mome? Zita.

⁴ Sülize süko Puyo uko lü kükrita. Süsa Jisu süko yisü, sadzüküsemi püh putho pu rakhülü mu putho pu shühyiemi mu putho pu cekrolü zo kümosa thürho di mozo, zita.

⁵ Süze Pu pube yo püh küthimi hu thi küsührho küsüko zo kümosa pu sülü.

⁶ Küku mhatho thi zo mota, mu süko lü kürüh la Pu malhü thita.

Jisu-e müthaküyi kürikünako kütsüh küsü

⁷ Süsa pu rünakolü whi die mi mütha, süze Pu kürikünako cipüh puce süyi die puko mi künana kütsüh sü, mu müsakümo rüpüko mhu küku kha puko prü

⁸ Puko küthü libi sa lakho, mori tsükhrüda, mori u shephalü rakathiko mhapühri püta hi nosü.

⁹ Süri puko po pheku püyi, eli bola küna süh hi nosü.

¹⁰ Mu Pu süko yisü, neko kühopühra vo zori tasü cepühlü lü küyice thüthi sülü no talata kümothe ce sülü ba zoyi te.

¹¹ Mu kühorari mi neko zühyi muta mori neko zhopo rünyi muta lize mi mhuzü no thaka püh thisü kütola neko sülüno ta prari küzü ce ne pheyo nyophu ri kükhu dü vate, zita. I nekoce potü süto, zünyo küti küto nha rüna süo ceri Sodom mu Gomora rüna nyi rülee yhieyi veku zoto, zita.

¹² Süsa puko ta pra die mi po thülü küdeyi no die povota.

¹³ Süze puko thürüküsü kükro ri huva, mu tier püh su küzüko künhü sü die süko thi münü sü.

John mi dzülu khaküsüo süh dzüh

¹⁴ Herod küde-o Jisu za müle süri küta se küyi ce; Pu yisü, John mi dzülu kha küsüo la süri ba kütala küku mhatho hikohi Pu yono thi bate zita.

¹⁵ Mu kükreko-e, Pu Elijah zo zita, mu humi sü pu sadzüküsemipüh mori sadzüküsemi dolü mipüh ta zo zita.

¹⁶ Süri Herod süo se küsüse pue sü; hiohi John I pu pi ve küvao zo, pu rhüla sürite; zita.

¹⁷ Süo sü Herod pue yiyi küta pu sazüh-o Philip cemi Herodiapü la mi kütsüh püh John tüyi die phapüh küdü celü mata.

¹⁸ Kükrelamori, John-e Herod yisü; No n sazüh-o cemi yiti thüzho mo zi küta la.

¹⁹ Mu Herodia-e zü süo se püh pu nümo die pu dokhri küva lü bata; eli thiyi süta.

²⁰ Kükrelamori, Herod-e John hi kümathomi mu kümüsami püh mu pu mha kükro thi küsüko se die pu nü bayo mu pu müprüh bayo tila.

²¹ Mu püh tü püh vori küyi, süosü Herod-e pu kümünu tüso nha pu khro mhaküseko, riwhümi küzhoko mu Galileemi mülhiko la tülhü püh küsüh sü.

²² Süze Herodias nupü ta lüri die rüzü püh Herod mu pu züh kübako nü thi küsüce küdeoe rülipü yisü no dipüh yinyi sheli ace shote I thipüh nprüto; zita.

²³ Sidie pu rüshu zodie sü, no ace mhakühopühri shote, a küdeba kütüpüh ri püh n prü zoto, zita.

²⁴ Sücesü süpü ta pra die puzu yisü, apo dipüh shota? Zisü, mu pue sü John mi dzülu kha küsüo pi shote; zisü.

²⁵ Süsa pu rükri küde-o ce lüri diesü; npo John mi dzülu kha küsüo pi püh mükhu pühlü sü püh vori a prü no die shoyo; zita.

²⁶ Mu küde-o pulü su shühta, süri pu zü phrasü küva la mu pu züh kübako la pu rülipü müla mota.

²⁷ Süsa küdeoe pu rikhumi püh kütsüh mha sü die pupo John pi püh vori nosü.

²⁸ Mu pu tavo die küdücelü no pupi veyi die püh mükhu pühlü süh vori küde-o prü sü, mu pu süo püh rülipü prü sü, mu rülipü süo püh vori puzu prüva.

²⁹ Süsa müthaküyiko pu dzüh sesü die ta vo pu rüngüco khi pühvo mhakhre pühlü khrüva.

³⁰ Süsa müthaküyiko Jisu ce vori die puko dipüh thisü sheli mu dipühpüh po mütha sü sheli mütü po püh pu ce sü.

³¹ Süze Pu sükoce po die, neko tho ta kresü mi ba kümo thi lü vori die rülü zayite; zita. Kükrelamori thüma taküta mu küvori krori kütala puko mha küti türi di zo küta la.

³² Sidie puko püzu pühyo no tasü mi ta kümora vota.

³³ Süze puko tata küzü ngo sü die makroo humie Pu seyita, sidie rüna mütülü no uphe ta puko züra vo die vori pu ce künguyi ta.

³⁴ Süze Jisu-e tapra thüma kroo ngo küsüce Pu lü müzhe ta; kükrelamori, süko tüko u kükhü küdi kro bi küta la, sidie pu mha kükro püh süko mütha shühdü ta.

³⁵ Süze tüsozhoo vo khrüh kütace Pu sadziko ta puce vori die sü, hicehi thüma lhüyo kümo thipüh zo, mu tsü münuri tazü-e.

³⁶ Puko kütsüh püh u kümütu yikolü mu rünakolü sü die puko po mhahu khriyite, kükrelamori, puko mhapühri ti küto ba kümo la, zita.

³⁷ Pu süko zü küla die sü, nekoe püh puko po tiyite, zita. Mu süko Pu yisü, hako po vo die tsükhrida raka kraküna ma khriyi die püh puko po ti tome? Zita.

³⁸ Süsa Pu puko ce kütso die, neko tsükhrüda didü ba, vo die pete, zisü.

³⁹ Mu puko-e se küyice, pühngu mu khu küna le! Zisü. süsa Pu thüma mütü po ki nha kümüjo lüno u krokro thidie bayi nosü.

⁴⁰ Süsa puko ukro thükrakra mu hie pühngungu die bayi.

⁴¹ Sidie Pu tsükhrüda pühngu mu khu künako khi pühyi die tosü tüyo pe die galiphi sü. Mu Pu tsükhrüdako cethi sü die Pu sadziko po khapüh puko mhuzülü sü, sülize, Pu khu künanyi cethi küza püh mütü prüsü.

⁴² Sidie mütüko ti die mügu ve thiyi.

⁴³ Sülize puko-e kürako mu khu ti kümüshoko shi küngu pü becerha küriküna phuyi.

⁴⁴ Süze tsükhrüda süko ti küyiko thüma nye pühngu müsüh.

Jisu dzü mhu ta küvori

⁴⁵ Sülize pue thümakroko kütsüh sü kübace Pu sadziko po püzu lüno ta zü lüshico Betsaida lü vo ta nosü.

⁴⁶ Mu pue süko züh kükho kü ta sa küsho thi too tasü cejütuo vota.

⁴⁷ Mu thüva tülü dpüzu-o dzükütü mütsulü tata. Mu pu pu lübi cejü küso lü bata.

⁴⁸ Sülize Pue tükhra kürüh puko mütsu die khra zü kütala dpüzu-o tho rühri zü küta ngo sü, mu Pu tüzüh-o rikhu küvale dao müsühce pukoce vori nyisa die dzü mhuyo no t a vori zü.

⁴⁹ Süri puko-e Pu dzü mhuyo ta vori küsü ngo sü die Pu yisü thürümi püh ta lizu seta.

⁵⁰ Kükrelamori, puko mütü Pu ngo die re ta, süla Pu rükri puko rüthi die sü, Nieko nüyite, I no zoho müprüh tahi, zita.

⁵¹ Sidie pu Tasü dpüzulü pukoce kuri, mu tükhra-o lata; süsa puko unü mu u malhü thita.

⁵² Kükrelamori, puko-e uko lü rüh ta die tsükhrüdakoyo mho u malhü thi küsüko co seyi mo kütala.

Genezaret lü u malhü mhatho thi küsü

⁵³ Süsa puko tasü Ganezaret cejüce dzükütü shi kuyi.

⁵⁴ Mu puko püzu lüno ta prari küyice thümako pu se mhaita.

⁵⁵ Sidie süshi sümhü rünakolü mi küthikünyimiko püh thüziko yo süyi die rha püh Pu kübathilü vori ta.

⁵⁶ Sülize pu rünalüri, nadelüri mori urari küvomütülü mi küthimiko püh vo lhethothikolü süyi die pu po u khüphreri püh süko nyi küsüri shota, mu pu nyi küyi khüo gwi thi nveyita.