MARK 2 - KETHOLESI KESAO N.T. (BSI)

Jisu lasami püh thi küsürho küsü

¹ Süsa ri zho hu sa Jisue Capernaum lü lüri, mu thümakoe Pu celü vori ba küta seyita.

² Süsa thüma kükro vori künguyi ta, mu thüma krori küta la cekha kütso ri uthi di zota, sidie Pu süko ce züo püh posü.

³ Süsa pukoe lasami püh mida po kükrepüh die züh puce vori.

⁴ Süze pukoe thüma kroo la Pu müno voriyi sü küta la Pu küba müdü tülü cetu hopha sü die pu ziyo yono pu püh kürünu sü.

⁵ Jisu puko kümülü ngo küsüce lasao yisü, anu, n küphomako va n prü vaho, zisü.

⁶ Süri lüsiküse süce kübakoe utho ulü lüno sü;

⁷ Dipüh la hiohi Poo kütha zü poyo shi? Poo zo kümosa sopühn mi küphoma va süyi veta? Zi bata.

⁸ Süzisü mütha, Jisu Pu rupü lüno lüdoko seyi die puko yisü, dithi die nekoe ne lüno mhahikohi lüdo bata?

⁹ Lasao yisü, N küphoma va n prü vaho, zi küsü mori sü die nzi püh shotayi te, zi küsünyi dipüh-o po rüyi kuta?

¹⁰ Eli puko Thümanuoe cejüo yo küphomako ri vasüyi küve kuku ba küti seyi küto la pue lasao ce.

¹¹ I nce po süyo, sü nzi pühyi die ta n celü votate, zisü.

¹² Süsa pu vapühlü sü pu zi pühyi die mi mütü mhuzülüno taprata, sidie mi mütü po u malhü thi die Poo shu die sü, hae mha hizi küti ngomozo, zita.

Matthew (Levi li kütio) ci küyi

¹³ Süsa Puta dzüküzho shico vo ta, mu thüma kro mütüri ta Pu ce vori, sidie Pu süko mütha sü.

¹⁴ Mu Pu tavo küzü se, Pu Alphaeus nu Levi-e khazhanu kükhrü celü badie ngo küyice, pu n yisü, Asa müdziyite, zisü, mu pu ta Pusa müdzi ta.

¹⁵ Süsa Jisu pu celü mhati tozu die vo ba küyice, khazhonu kükhrümi küphomami kükro ri vori die Jisu mu Pu sadziko züh bayi, kükrelamori puko thüma kükrota mu süko Pusamüdzi ta.

¹⁶ Süze lüsiküseko mu Phariseeko Jisue khazhanu kükhrü mu küphomako züh die mhati küba ngo sü die Pu sadziko yisü; dipüh la Pu khazhonu kükhrüko mu küphomako züh mhati mhakra yo la! Zita.

¹⁷ Jisu sü sesü die puko yisü, küsührhomi daru küsemi süh mori ve, süri küthimie süh mosü, Ie kümathomi ci mori küphomami po thülü küdeyi no küvori zo, zita.

Mvo küti dzüh kütso küta

¹⁸ Sücesü John sadziko mu Phariseeko sadzikoe mvo ba, mu pukoe vori die Pu yisü, dipüh la John sadziko mu Phariseekoe mvo yo, mu nsadzikoe mvo yo mo la zi die kütso ta.

¹⁹ Jisu puko Zü küla die sü, Zhosao cebülü küba nunekoe zhosao puko züh kübalüno mvo ba tayo ma! Zhosao puko züh küba the pukoe mvo batayi kündi.

²⁰ Putü vori to, sücesü mi puko celüno zhosao züh ta küta nha pukoe mvo tato.

²¹ Mipüri khü küsapü khü kügwü yo mükhu yomo, süzi lize khü küsao khü kügwüo cekhro pü tayo, sidie pa müsu ku tayo.

²² Mipühri khubühzü küsa püh thigibüh kügwülü sü yomo, mhaceno süzi lize khubühzü küsaoe thigibüh-o püpha vato, sidie khubühzü krüh prari ta mu thigibüh ri müka vato, süri mi khubühzü küsa püh thigibüh küsalü süyo.

Mi kürülüzho dzüh kütso küsü

²³ Kürülüzho püh nha Pu tasü ata yiko püthü vo zürü. Pu müthaküyikoe ata siko mürhü shudü ta.

²⁴ Süsa Phariseeko Pu yisü. Yhie puko dipüh la kürülüzho nha thüzho kümo thiyo zo la! Zita.

²⁵ Pu süko yisü, Neko David-e dibi die pu mu pu züh kütako müri kütace;

²⁶ Abiathar pethiküzhoo tüce, Jihova rüsucelü lü die pethiküzhoko zo kümosa kükremi po ti küti thüzho kümo mi mhüngo küthi tsükhrüdao khi tiyi mu püh pu sadziko ripo ti shi küti phi mayo mo me!

²⁷ Sidie Pu süko yisü, Thüma la kürülüzho thi küsüzo: kürülü zho la thüma thisü mo.

²⁸ Süzilize, thümanuoe kürülüzho mhuri nyepo zo zita.