MARK 16 - KETHOLESI KESAO N.T. (BSI)

Jisu rhühla küsü mu Pu tüyo sü küta

¹ Süsa kürülü tüsozhoo vota küzüce Magdalin Mary, Jokob ne zu Mary mu Salome ukoe pühvo Pu künhü küto la mharüh küthünyi khiyi;

² Sidie kürlü zho sa tüsozho küra nha küshu rüna nace prari küzüce pukoe mhakhrelü vori.

³ Mu pukoe uko tho küpo die, Sopüh po uko la mhakhre talü kütsüo phu sü ta? Zi zü.

⁴ Eli pukoe to süri tice utsüe rütu küta ngoyi, kütsüo nyeritila.

⁵ Mu ukoe mhakhrelü lü tice, khresami püh khü müga rütsa ti be die thüzaco ba ngo. Süla uko malhü thita.

⁶ Eli pu ukoce, müprühite, nekoe mipo Pu gu küva Nazarenemi Jisu phuzü, eli Pu rhühlasüte, Pu hilü ba mote, neko tho Pu püh küma thi pe phi; zita.

⁷ Eli neko tavo die Pu müthaküyiko mu Peter ce po süte, Yhie! Pu neko züra Galileelü vota ho; nekoce po küsü bi die neko sülü Pu ngoyi toho; zita

⁸ Süsa uko prari die mhakhre lüno rükri tata, mu puko u künü pu rüsü zota. Sülize puko müprüh pu huhu rüthi mota.

⁹ Süze kürülüzho sa küra nha pu rhühlasü die ta vo pue pu yonu küsü rüpü thüna hu küva pü Magdaline Mary mhüngo thi müra sü.

¹⁰ Süla süpü tavo die Pu züh ba küvoriko kra mu ulüsü kübako ce posü.

¹¹ Süri Pue rhühba mu süpü mhüngo thi küsü sü se küsüce mülüyi mota.

¹² Mha hiko sa Pu rünalü vo die Pu rhi kükre tilüno mi küna mhüngo thisü.

¹³ Mu pukoe ta vo die kükreko ce posü, süri süko ri mülü mota.

¹⁴ Künuco pukoe vo rülü kübace Pu ta vori mi kürikpünako mhüngo thisü mu puko lü kürüh la puko lükhuta, kükrelamori, pukoe mi kükremi Pu rhühlasü küta küngoko süri mülü kümo la.

¹⁵ Pu uko yisü, Neko cejü mütülü vo die züyiküveo püh thüma mütü ce po süyi,

¹⁶ Kühopüri mülüküyi no dzülu pü küyio külayito, vele kühopüri mülüyi kümoo müjo vato.

¹⁷ Mülüyi mülüküyiko yo zasi hiko tato; Puko aza lü thürüküsuko huyi to, uko khü küsa süh mha poto,

¹⁸ Uko tünyhi khi pühyito; ukoe thürüh krayita zori uko va müsu valho, uko küthimi yo ube shosü lize süko sürhoyito, zita.

¹⁹ Pu ukoce züpon sü küva sa, Pu züh tüyo khota, sidie Poo zaco bata.

²⁰ Mu pukoe ta vo die kühopühra ri zhopo thi vota. Nyepoo puko züh mhathi mu zasiko yono züo thi kümütü vota.