MARK 15 - KETHOLESI KESAO N.T. (BSI)

Pilate mhuzülü Jisu ne küti küta

¹ Süsa tüsoyi mütha küswüh-o rüna sekrükühukoe kühu püh ci sü die pethiko mu lüsiküseko mu müthi kühu mütü Jisu phayi die Pu züh vo Pilate ce süva.

² Mu Pilate Pu kütso die; no Jewmi küdeo me? zisü. Pu pu zü küla die; No po küsüo sü zo, zita.

³ Mu sekrüküzhoko mha kükro püh Pu müzho; eli Pu mhapühri küla muta.

⁴ Süla Pilate Pu kütso la die, no mhapühri po lho zo me? Yhie mi mha di dü püh püh n mü Zho bata? zita.

⁵ Süri Jisu mhapühri küla mo zo kütala Pilate pu malhü thita.

Jisu guva nodie zü kha küsü

⁶ Sülie thünye Pühlü mi puce küzü püh kha u prü nodie sho lie süo kha küsü thüho ta.

⁷ Sücesü Barabbas li küti püe mi sorkari kümütsu mhatho thi küsüce midokhri küva la tü püh süko zühn kha küma püh ta.

⁸ Süze thümakoe ta khori die Pilate po hizü thi küvori bi die thi püh puko prü no die sho sü.

⁹ Eli Pilate pukoce; Apo Judako küdeo püh neko küprü neko müdoto me? Zi die kütso.

¹⁰ Kükrelamori, sekrüküzhooe Pu phimu die tü küsü se küba la.

¹¹ Süri sekrüküzhokoe pupo Barabbas püh puko prü sü noti makroo hüsü.

¹² Süri Pilate puko zü küla die, sülize apo Jewmi küdeo püh dipüh thi vata? Zisü.

¹³ Mu pukoe se müto zodie sü; Pu püh guva te; zita.

¹⁴ Eli, Pilate lasü; Pue dipüh küjo thi küva la ta? Zi la sü. Süri puko se müto ku die sü; Pu püh guva te, zilata.

¹⁵ Süla Pilate makroo nü thi küva lü die Barabbas kha puko prü va, mu pu Jisu vü sü die Pu püh guva nodie kha puko belü süva.

Riwhümiko Jisu püh küthükrüh küta

¹⁶ Süsa riwhümiko Pu züh sheticelü lüta. Sidie puko kro mütü ci künguyi.

¹⁷ Sidie müreda küti khü püh Pu whü sü, mu tsahu küde pirüh thiyi die püh Pu piyo sü.

¹⁸ Sidie pukoe; Jewmi küdeo, thi te; zi die Pu külu.

¹⁹ Mu pukoe tükhrathü püh Pu pi vü, mhütsa püh Pu va, mu nükü prü Pu külu, zi.

²⁰ Sülize puko Pu püh küthükhrüh küva sa, Pu khü müreda kütio khiva die Pu Pu khü püh Pu yo sü. Sidie pu gu va küto la Pu züh prari ta.

²¹ Süsa pukoe Cyrene püh Simon, Alexander mu Rufus nyi poe yi lüno vori küzüce pu kümu thi püh Pu kruso püh.

²² Sidie puko Pu züh die Golgatha puco mi pikhuro li küti pühlüvori.

²³ Süsa pukoe hezo püh daru thi küva mir pü püh Pupo kra nota, eli Pu kra mu ta.

²⁴ Sülize pukoo Pu püh gu küvasa, Pu khüko püh somi zalü prari teshi die cethi khüle thi.

²⁵ Mu sücesü bavüdo süh-olü Pu püh gu va.

²⁶ Mu u pilü Pu kümüjo zü tho die, Jewmi küdeo; zi die tho püh ma.

²⁷ Sülize pukoe kürügomi küna; püh Pu zaco mu püh Pu veco zi die püh pu sa gu.

²⁸ Sücesü kütholüsilü; Pu püh thüzho küvarhüko saphiyite zi küti züo ti tsühyi.

²⁹ Sülize thüma pheliphe ti mütü pingü die; Hu! No kürüsuceo dorhü va die zho süh nha thi la kütoo.

³⁰ N tho n külayi die cross yono ta kirite; zi die Pu thata.

³¹ Süsa bi sekrüküzhoko mu lüsiküseko ri Pu krünyi die huhu yisü, Pue kükremi külayiyo, eli putho Pu külayi lho; zi bata.

³² Khrista, Israelmi küdeo! Pupo tsühi ri cross yono ta kirite, hapo ngo die mülüyi küto la; zi bata. Süze pu sa gu pü küba nyi ri Pupo müsü ta.

³³ Süze bavüdo shorüholü no vo thüci kütso zühbüh pü bata.

³⁴ Süsa bavüdo thüciolü Jisu se müto die sü; Eloi, Eloi, lamasabakthani, puco a Jihova, no dithie a khava la ha? Zita.

³⁵ Süsü se sü die u shice kübako humie sü; Co! Pu eli ci züta ho; zita.

³⁶ Süsa mi püh-e ta vo mha kümütsü khü püh kükhro zü mütsüyi die püh tükhrüthü yo süyi die püh pu po kra tozuta. Sidie sü Elijah vori Pu pühyi to ma lho shelhi pesüyi; zita.

Kra mhu küzhoo Pu zhopo thi küta

³⁷ Sülize, Jisu müyi müto sü die Pu rüpü khasü va.

³⁸ Sücesü, kürüsucelü khü u pilü lüno prü u phe kütso kro küna thita.

³⁹ Mu riwhümi kra mhu küzhooe rapeco ba die Pu se müto sü die Pu rüpü khasü küva ngo küsüce; Hiohi Poo nu kütho zo; zita.

⁴⁰ Sülize thünomi kümücu lüno tha die pe kübako; Magdalin Mary, James mu pu sazüh-o nyi zu Mary Jose mu Salome;

⁴¹ Pu Galileelü kübace Pu shoyi thi küvoriko; mu mi kükro Jerusalem lüno Pu züh khori.

⁴² Süsa thüva vorita mu kürülü tüsozhola mha küsüh mo küsu mhüzüce;

⁴³ Arimathiami Joseph thürho küpü, krüta mu pu thori Poo küde küvori müri tayo küti püh thüpu shüh die vori Pilate ce Jisu mo sho.

⁴⁴ Süsa Pilate-e Pu satü ta me moshi küti se küto la, kra pi küzhoo ci sü die pu sa küta tü puce kütso.

⁴⁵ Sidie krapi küzhoo celü setü küyi bi die pu thümoo püh Joseph prüva.

⁴⁶ Sülize pu linen khü khriyi mu Pu mo püh kiri die linen khüo püh küzüyi die Pu püh vo tsüpüh ho küma mhakhrelü va. Sidie kütsü phu küla püh mhakhre ta müka va.

⁴⁷ Mu Magdalin Mary mu Joseph ne zu Mary unyi Pu püh kükhrüh thi ngo.