MARK 14 - KETHOLESI KESAO N.T. (BSI)

Jisu yo ngomu do rhü küta

¹ Sülize zhoküna sa cühküpra nye mu khre khasü kümo tsükhrüda küti nye nye to Bata; mu sekrüko mu lüsiküsekoe küdoda die Pu tü püh dokhri va küto rhü bata.

² Eli pukoe sü; thümako mha kübü küta kümüprüh la thünye nha su, zita.

³ Sülize Pu Bethani lü Simon lepraküthio celü rülü kübace thünomi püh tir rüh küve uma kürüh alabaster büh püh püh vori die dophayi die rüh püh piyo sü.

⁴ Sücesü humi unü mo die sü, dipüh la tir müka püh hi tala?

⁵ Kükrelamori, hihi püh duli krasüh küzü khriyi die püh küdi kütsakhu mi vaphi süyi ve zoe. Zidie ukoe süpü yo münyota.

⁶ Eli Jisu sü, pu kübühi. Neko dipüh la pu küyhu bala? Pu a la mha küve thi sü zoe.

⁷ Kükrelamori, küdimie neko züh ba süh yo, mu nekoe kühopü tüce ri puko La mha küzüve thinyi lize thiyi ve zo; süri I neko züh ba sühyi lho.

⁸ Pue thi küzü dü thiva zo; Pu müzü müra a kükhrüh ne la tir püh amo künhü sü to küvori zo.

⁹ I nekoce potü süto, cejülü züyiküve hio püh zhopoh thi sü küto mütülü thüno hipü mhathi küsü hi kürükra ri sapo zoto, zita.

Judas Jisu tüsü küto küpo küyi

¹⁰ Süsa Iscariot Judas kürikünako mipüh, Jisu tüpüh sekrüko belü sü küto rhü die puko ce vo.

¹¹ Mu süo se sü die puko nü die raka püh pu prü küto uzü khasü. Süsa pu dibi lie Pu tüsü to shi küti ri bata.

Jisue Pu sadziko züh die cühküpranye nye küyi

¹² Sülü khreyisü kümo tsükhrüda küti nye thüra nha puko cühküpra nye konuo dokhri küyice Pu sadziko Pu kütso die, no cuhküpra nye nye küto la hako po dipühceo küsüh küsü n müdo ta? Zisü.

¹³ Süze Pu müthaküyi mi küna kütsüh die unyi yisü, nenyi ta nadelü lüyite, sülize mipüh ü lekhu püh pü küta sühyi toho, pu sa müdziyi te.

¹⁴ Mu pu kühopühra lü zori, nenyi ce nyepoo ce; kümüthaoe, A po asadziko züh die cühküpranye nye kütola rüso ba diceo bala? Zidie kütso ü le, zite; zisü.

¹⁵ Sülize Pu müsozu cebüh künye pühlü khü khra sü die küsüh püh küma tha nenyi ka toho. Sülüsü uko la küsüyi te zita.

¹⁶ Mu Pu sadzinyi ta nadelü prari küyice, pu unyi ce po küsü bitü die ngoyi, sidie nnyi puko la cühküpranyeo küsühyi.

¹⁷ Süsa thüva ce Jisue Pu sadzi mi kürikünako züh voriyi.

¹⁸ Sidie uko ki bayi die mhati kübace, Jisue sü, I nekoce potü süto, neko dolü mipüh a züh mhati kübao atü süto, zita.

¹⁹ Süsa puko u lü su shüh die mi püh püh Pu yisü, süosü I me? Ive thita.

²⁰ Eli, Pu uko zü küla die sü, süosü kürikünako mi püh ube püh a züh mükhu pühlü süh kübao zo zita.

²¹ Thümanuoe Pu jüh tho püh kümüta bi die tata to. Süri Thümanuo tüpüh mi belü küsüoe tse! Thiyite! Kükrelamori, thüma süo münu püh vo kümoe pu la veku to murü; zita.

Kürükraco küti

²² Sülie uko mhati kübace, Jisu tsükhrüda pühyi die galiphi sü, sidie cethi püh uko prü sü. Sidie sü, püh tiyite; hihi amoo; zisü.

²³ Süsa Pu tühe püh die galiphi küsü sa püh puko. Prüsü, mu uko mütü süo püh krayi.

²⁴ Süze Pu uko yisü, hihi aza, thüma mütü la mükrüh küsü zütsühzükho küsao;

²⁵ I neko ce potü süto, I Poo küdelü khubühü küsao Krata küto tüsoo tso kümothe khubühbo yono küprari se pühri mütha sayi lhote, zita.

²⁶ Süsa tsale püh thiyi die puko tasü Olive cejütuyo kho ta.

²⁷ Süze Jisu puko yisü, Tho püh kümüta bi die neko mütü tsüzi ayo jota tato; I tüko kükhüo vüsü to mu tükoko ta kütsapu ta to; ipüh ma; ita.

²⁸ Süri I rhülasü küta sa neko züra tasü Galileelü vo tato;

²⁹ Eli Peter Pu yisü kükremiko mütü n yo jota to zori I lho; zita.

³⁰ Mu Jisu Pu yisü, I nce potü süto, tha, tsüzi thüvü khu künao küta mhuzü no vasü aza po mu tato, ita.

³¹ Süri pu pu he hie thiku die sü, A po nzüh sa mosu ta zori I mhapühce ri n müla valho zo, zita. Mu puko mütü ri süsü bi die pove thita.

Jisu Gatshemane lüno sho küti

³² Süsa puko tasü Getsemane li küti thinyi pühlü vorü, mu Pu Pu sadziko yisü; I shoba kütace neko hice bayite; zisü.

³³ Sidie Pu Peter, James mu John uko züh Pu sa vo, süze Pu Pu lü kümüzhe püh kümüre thita.

³⁴ Mu Pu sükoce, I alü kümüzhe vo sata to bate, neko hice ba die khü bayite; zita.

³⁵ Sülize Pu tüzaphe die tüprü cejü zürüh pü die; thiyive to lize bavüdo süo püh Pu thürü va no die sho bata.

³⁶ Sidie Pu sü; Aba Apo! No mha mütü thiyive zo, tühe hio püh a thürü vate, süri a müdo mori n müdo thiyite, zita.

³⁷ Süsa Pu ta pheri die puko züh küzü ngoyi, Süla Pu Simon Peter yisü, no zühzü zo ma? No bavüdo püh ri a züh khü bayi lho ta me?

³⁸ Neko müdo küphi lülü ta mo küto la khü mu la bazo yite, Rüpüoe thinyi bazo, eli uthioe thathite, zita.

³⁹ Süsa Pu sala phe die küra küsho bi die sho la bata.

⁴⁰ Sülize Pu la pheri tice pukoe züh züzo die ngoyi, kükrelamori, puko mhürhoyi lhozo kütala. Mu uko Pu zü külayi küto do ri seyi mota.

⁴¹ Süsa Pu va süh-olü la vori die puko yisü, tsüe zühyi mu rülüyite, tsüsa tsüh te, pu bavüdo sü vorite. Yhie! Thümanuo sü tüpüh küphomako belü süva to bate.

⁴² Süri die uko tavo ta khe, Yhie! Atü sü kütoo sü müno vorite, zita.

Jisu tü küyi

⁴³ Süzisü mütha, Pu zü po balu tilü, Judas kürikünako mipühe sekrüko, lüsiküseko mu mülhiko celüno zesho mu sühdü küpüh thüma krode püh züh vorita.

⁴⁴ Pu tüsü kütoe müzümüra züsi püh puko prü die, I Pu mbo sü kütoo süo zoho, Pu tüyi die münu vota te; zi püh müzü.

⁴⁵ Süsa vori mütha ta müzi Jisu ce vori die sü, kümüthao kümüthao, zidie Pu mbo sü.

⁴⁶ Süsa thümako u be püh Puyo sü die Pu tüyita.

⁴⁷ Eli u shice küthako mipüh-o u zesho süzühyi die püh sekrüo cetao ni müta dü va.

⁴⁸ Süsa Jisu puko yisü, nekoe kürügomi kütü bi die zesho mu küthü süh vori zü me?

⁴⁹ I tüsonha neko züh kürüsucelü ba die mütha vorizo, süri neko atüyi mo. Eli, tsüe kütholüsi züo po tsühyi küto la hizi küta zo; zita.

⁵⁰ Süsa mütü Pu kha va die tata.

⁵¹ Sücesü khresamine püh-e linen khü püh pu phothu küzü pü die Pusamüdzi zü mu khresakoe pu tüyi.

⁵² Eli, pu pu linen khü khava die phothu die tata.

Müthi kühuolü Jisu ne küti küta

⁵³ Sülize puko Jisu züh sekrüo celü vota; mu sekrüko, mülhiko mu lüsiküseko mütü vori Puce künguyi.

⁵⁴ Süsa Peter kümücu lüno Pü sa müdzi vori die tazo sekrüküzhoo celü müthi kühu bolü lüyi. Sidie küzhoko züh ba die me shice putho pu hü mülü ba.

⁵⁵ Süsa sekrüko, mu müthi kühu Jisu dokhri va küto la Pu kümütsu zhopo phu; eli pühri ngoyi mota.

⁵⁶ Kükrelamori, mi kükro kücejü zhopo phuyi eli puko zhopoko kümha mota.

⁵⁷ Süsa humi süri cejü die Pu kümütsu zhopo po die sü;

⁵⁸ Pue po die, I thübe püh küthi rüsüce hi müka va die zho süh dolü thübe süh thi kümo kükre püh thi vato; zidie poti ha se le; zita.

⁵⁹ Mu hilü hi ri puko zhopo kümha mota.

⁶⁰ Süsa sekrüküzhoo mi dolüno süthayi die Jisu kütso die; No mhapühri küla sü lho zo me? Hiko dipüh po n mütsu tha la? Zita.

⁶¹ Süri Pu kümükrethi die mhapühri po mota. Süri sekrüküzhoe Pu kütso la die sü; No Khristao, thüjoküpüthoo nu me? Zisü.

⁶² Mu Jisue sü, Izo! Mu nekoe Thümanuoe kükuthoo zaco ba die tüyo kümhülu lün vori küzü ngoto; zita.

⁶³ Süsa sekrüküzhoo pu khü cekhro die sü, uko dipüh zhopo phu la sa ta?

⁶⁴ Neko ri Pue Poo kütha khü seyite, Nekoe dithili ta? Zisü. Mu puko mütü Pue sasü tazo lie Pu müjota.

⁶⁵ Sidie humi mhütsa püh Puyo sü, mu Pu zü whü va die dothü püh pu vü, sidie Pu yisü, sopühn nvü sheli hace sadzühzü po süte; zita, sülize küzhoko bezi püh Pu vü.

Peter Jisu phra mu küta

⁶⁶ Sücesü Peter süne ce bo mükhroku barü sekrü küzhoo cetapü pü kiri.

⁶⁷ Mu pu Peter me mügu küba ngoyi die pu petü die sü nori Nazarenmi Jisu züh tayo ze; zita.

⁶⁸ Süri pu mo lie sü; I semo mu n küpoco süri semo zo ho; zita. Sidie putasü zünyocebo saco prata. Sücesü thüvü khu ta.

⁶⁹ Süsari ceta süpü pungo la sü die, süshice tha kübakoce, hio ri puko zo; zita.

⁷⁰ Mu pu süri moli zita, mu putü husa süce küthakoe Peter yisü, nori puko zo küthozo noe Galileemi mu n züpo lün seyi te, zita.

⁷¹ Pü rüswu zo no po ketsü neko sopü po ba sheri I thüma süo se mo

⁷² Sücesü thüvü khu künao ta, mu Peter puce; no thüvü khu künao küta mhuzü vasüh A müla tato; zi küsü züo rükrayi, sidie süo lü die pu krata.