MARK 13 - KETHOLESI KESAO N.T. (BSI)

Jisue kürüsuce müka va küto jüh küpo

¹ Sidie Pu kürüsucelü lüno tapra küzüce, Pu müthaküyiko Puce, Kümüthao yhie, Kütsüko ri mu ceküthiko ri dibizo die thita shehe! Zisü.

² Jisu Puko zü kül; a die; no ce künye hiko ngo bame? Kütsü phu kütu va mo die pühri po küpiba pü bayi lho, zita.

Mha kübü küti mu kümüthi vori küto

³ Sülize Pue kürüsuce rüpeco Olive cejütu yo ba kübace Peter, James, John mu Andrew uko mükhrüh Pu kütso diesü;

⁴ Mha hikohi dipüh küthice tato sheli hace po süte; mu mha hikohi thi tsüyi ta to küzüce dipüh püh bata? Zi die kütso ta.

⁵ Jisu puko khü küla diesü; mipüh pori ne shu kütse züh tata mo küto la münuyite.

⁶ Kükrelamori. Thüma kükro aza lün vori die; I no zo; zidie mi kükro shu züh tata to tila.

⁷ Süri neko thüri küthi mu riwhü khü küpo küzüko se küsüce neko lü kühoküro thita hite kükrelamori, mha hikohi vori moyi lho zo tila; süri thülao molu.

⁸ Sücesü shühye püh shühye püh mütsü, mu küde püh küde püh phimu süri to; mu thüthi kükrekre tiko lü ceyice süto, mu thükre mu kümüzhe kütiko süri to, mha hikohi kümüzhe püh kümüre thi küto thürako zo.

⁹ Süri neko tho ne rüle peyite. Kükrelamori, mi neko tü püh müthikühukolü mu Synagogko lü süto. Mi neko tsali vüto sidie aza la mu puko mhuzülü zhopo püh thi sü küto la mi neko züh die küzhoko mu küdeko ce voto.

¹⁰ Süsheri züyiküveo püh shühyie mütü ce posü mürato.

¹¹ Süri mi neko züh ta vo neko kha püh mi belü küsüce, nekoe dipüh po teshi, mori, lü teshi küti müdo die ne lü künyi thi hite. Eli bavüdo süo lü npo dipüh pono zi sheli süo poyite; kükrelamori, nekoe mori Kümüsa Rüpü tho po ba zo tila.

¹² Sücesü u zürao tho u sazüo tüsü mi po dokhrito, mu upo tho unu tüsü mipo dokhrito, mu ununekoe ukrüneko mütsu süri die mi po süko dokhrito.

¹³ Mu a za la mipo neko mütü mütsü to, süri hie zo tha thüla tso küyio külayi to.

Kümüzhe shüh küto

¹⁴ Süri Daniel sadzühküseo popu jüh po püh kümüta; mhava mürho zo küto kümütsü thi zo kütioe ta vori putha zü kümolü tha küyi ngo küyice, sücesü phiyo kütimi po se kükreyi te; sülize Judealü kübako po ta sü cejütuko yo vo tayi.

¹⁵ Mu cejütuyo kübako po celü mha khiyi tolizu die cejü kiri hite.

¹⁶ Mu yilü kütako po u khüne khiyi tozu die rürüh la vori hite.

¹⁷ Süri sütüceko sü u nulhüpü ba mori unune no kübako kümüzhe shüh zoto.

¹⁸ Eli neko ta küto tü sü po tüsühce mo küto la sho bayite.

¹⁹ Kükrelamori, sütüceko sü kümüzhe püh Pooe mha mülhü küsü prühlü no vori tsü kütsori südüsü kümüzhe küti di mu hisa ri süziyi külho thizo to tila.

²⁰ Mhaceno Nyepooe tüsozhoko thi müzü sü mo tipühthilize, mipühri külayi lho tazo mütse, Süri küda küyiko zhozhi külü la Nyepooe tüsozhoko thi müzü süto.

²¹ Mu sülize thüma kühopühri neko yisü, Yhie, Khrista hice ba mori lice ba zi zori mülü hite.

²² Kükrelamori, kücezü Khristako mu kücezü sadzühküseko süri die zasiko mu u malhü mhathoko thi püh mi kato, sidie thiyi küvethe küda küyiko ri shu züh rütse tato.

²³ Süri nekoe münuzo yite, Yhie, I müzümüra lü mha mütü püh nekoce posü vaho.

Thümanuo la vori küta

²⁴ Süri kümüzhe küti tüsozho süko sa nace zühta to, mu khri ri pu küve khasü mu tato.

²⁵ Mu thümiko rüra tato, sülize tüyo kukuko sü küna vato.

²⁶ Sidie ukoe Thümanuo kuku mu zapo zale thi die kümhülü no vori küzü ngoto.

²⁷ Süsa Pu Pu shoyimi kütsüh püh cejü küla lüno vo tüyo küla kütso tükhra dako lüno Pu küda küyiko phu künguyi to.

Shedübo yono kümütha zü kha küsü

²⁸ Shedüboo yono neko züveo seyite, Pücoko müzü layi die pu nyi nyisa thü prari küzüce, nekoe tülü tate, ziyo.

²⁹ Süsübi neko ri mha hikohi thi vori küta ngo küyice, süsü müno tüte, cekhace bate, zi küti seyite.

³⁰ I nekoce potü süto, mha hikohi thi vori ta kümothe, tsüdo külhüko hi mhapühceri di ta lho.

³¹ Tüko dita to, eli azüko mhapühceri di tayi lho.

³² Süri tüso süo mu bavüdo süo la zoe Poo zo kümosa tüyo shoyimi mori nuo zori mipühri semo.

³³ Münu bayite, khü mu la mu sho ba zoyite, kükrelamori, nekoe di küthice to sü se kümo la.

³⁴ Mipühnee rüna kümüprüh pühlü vota küzüce küku kha püh pu cetako mu mhatho u thütsüh püh süko prü sü mu ceko kükhüo po mha pe münu ba no sü va ta küta bizo.

³⁵ Süla neko khü mu la bazo yite, kükrelamori, nekoe ce nyepoo dipüh küthi ce vori tosü se kümo la, thüva to me, müso tülu to me, modie thüvü kükhu to me, küswüho to shi se kümo la.

³⁶ No züh küzülü Pupo mha vori die n ngoyi tamo küto la.

³⁷ Khü mu la ba zoyite, zi küsü hi nekoce ri mu kükreko ce ri mütü po süho.