LUKE 8 - KETHOLESI KESAO N.T. (BSI)

Jisu Galilee lü mithi kesürho mu mi metha

¹ Hisalü, Jisu revü khi nadelü mu natsü kolüvo. Zhopothi kenü thejupo, Jihova kede popü mi metha, mu metha keyiko mikerikena püzüta.

² Thenomikori hu uko züta, therü-kesu rüpü mu kethilü ne thimenü kesüko; Mary Magdalene, therükesu thüna püyo tapra ketapü sheri ta.

³ Joanna, Chuza cemi, Herod kedeo celü mhanyoko kepe kezhoo cemi rita; Susanna mu kekremi kekro sheri ta, theno hiko mha khapü uko tsakhu khrühi ketako.

⁴ Thüma kekro vori kenguyita, rüna kolü ta Jisu cevori, pü jüve khi ukoce posü

Tsavaju

⁵ Yitemipü teso sosü toli tsü (tsava). Pü tehatsa pü prüsü, humi ta chodelü tsüta, süko mipo kedüva mu merapo tiyita.

⁶ Humi tsüroyo tsüta, mu süko cüsüri tice renyo kedila nacepo süko thsü mesa va.

⁷ Humi tatsahu tsalü tsüta, süko cüsüri tice tsahupo pügükhriva.

⁸ Humi ta renyo kevelü kiyi de use zhüyi, sekrapü kezü pü hiko po kesüsa, sesü, de poti, uni kenemi po reni yite.

⁹ Pü sajiko pü ketso de poti, jüve hio püco dipüta?

¹⁰ Pü uko ce poti, “nekola Jihova kede ketekhri tiko seyive, ti khasü te; vele kekremiko la jüvelü poyo. Kepe no uko peto vele ngoyi ho, reni sheri uko seyi ho (lüyi ho)”

¹¹ Jüve püco hibi, telha tsa sü Jihova jü.

¹² Chokhü tsüketako, jüo reniyi; therü kesu vorita uko melülü jüo khipü tata, kemosa uko melüyi mu kelariyito.

¹³ Tsürolü ki ketako, jüo reniyi, uko nüyi; süko ume bamo, dopü melüyi vele medo kephi kevorice retuta.

¹⁴ Tsahu dolü ki ketako, jüo reniyi de cüsüri vele cejülü zhoko, cesücene mu ukemenyü kopo uko royita de usezhüyi mo ketako.

¹⁵ Vele cejü kevelü kekiko, kejütho keve melü, jüo reniyi thi mu züyi; usezhüyi mu sügüsüheyi.

Metopü kejüvekesü

¹⁶ Mipüri metokhapü merhakhro süyomo mori kha thezikhro süho; vele khapü ubalü miva meve süyo, sülü kelüko mhango ketola.

¹⁷ Kekrelamori, khapü resü va yomo, mipo ngomo ketodo thide; mhakehopü püri khapü resü revayomo, püchozuco mipo ngomo toleno.

¹⁸ Süla no renimenuyite, kekrelamori khapü kebami tsüsüto, mhaba kemoo püyo kebakori pütatato,

Choro kesa

¹⁹ Süsa püzu mu püsazüko ta püce vori, vele uko talü püzü kesüyi hota, kekrelamori thümako kefüphi ketala,

²⁰ Humi püce poti, nzu mu nsazüko nphu voride chozu thale, uko nzü kesünyü bale,

²¹ Pü uko fü kelasü, de poti, azu mu a sazüko sü Jihova jü reniyi mu thisü keyi kozo.

Jisu jü repfü kethi züzi keva

²² Pünhapü püsajiko zü rulü tavozü, pü poti, uko ta jü kezho khü kekreco kukhe, side uko tavozü.

²³ Uko rulü tavozüri pü zürenyü ta, tükhrakhradepü vorita ruyo, mu uko ru jüpo chuyita; uko vekedi thita.

²⁴ Uko tavo pükesü de poti kemethao, kemethao, uko kata tozütele. Süsa pü cosüri, de tükhra-o kethisü, mu jürephü sheri; siri lazü zita, kemekre züta.

²⁵ Pü ukoce poti, neko kemelü dipüce ba? Uko mpe ketala uko ngo phita; de ukodolü kepoti thümahio zhorele dipü bita? Pü jü mu tükhra sheri kethi vati he, uko sheri püfü zü ketahi.

Gadera lü therü kesu ukebüketamipüyo hu keva.

²⁶ Uko tavo Gadarenes rüna tsoyi, Galilee peco;

²⁷ Uko cejü sülü tavo kezüc ethümapü therü kesu rüpüko ukebü ketamipü pütü kecho sizi tata, füne khimo, ce pülüri hüyomo; vele mhakhre kolü hütayo.

²⁸ Pü Jisu ngosü, de seta, de retuki pü reshüta, füphra metode poti, I n zü dipü thita no Jisu, no kerekhrütho Jihova nu? I ncechoyo, no amethi hite.

²⁹ Kekrelamori pü thümao celü tapra tano mesakemo rüpü ce posü ketala, tsükenu thegiro khapü püpha pübayo, mu tsahuko, po püzü nhatsalü vo tayo.

³⁰ Jisu pü ketsoti, “nza sopü?” Pü pokesü aza “legion” kekrelamori therü kekro pülü lü ketala.

³¹ Uko püce choti, püpo uko ketsü pü kerelü lü süva hino chota.

³² Süce thevo kekro cejütuyo nha patita, uko püce chode ukopo thevo kolü lütano chota. Pü süla uko ketsü süva.

³³ Süsa therükesüko thümayo ta thevokrode kolü lüta; side thevoko ta rechü thikhalü tsüta, de jülü uko mehü khri phrüva.

³⁴ Süko füpü nhapati ketako dipü bi sheri tavo rünakolü, nadekolü posü.

³⁵ Süla thümako tapra dipü thita sheri pe, ta Jisu cevori mu Thümao ngo, püyo therükesuko tapra ketao, Jisu phece babata, ufüne khi, mu ukelü tsüba keta, side uko mpeta.

³⁶ Pü kengoko ukoce po küsü dipübide therükesüpo ukebü ketao sürho ta sheri posü.

³⁷ Süsa makro Gadarenes rüna kemetuko metü püpo tatano chota, kekrelamori uko mpeshu ketala; süla püta rulü lüde sala püra vota.,

³⁸ Therükesu püyotade praketa-o püzü batanyü de püce chosü, vele Jisu pü ketsü metava, püce poti,

³⁹ Ta ntho ncelü votate, Jihova mhakezho n yo thikesü pü mi mhüngo thisüte, pütho pücholü vota, nadelü metü Jisu püyo mhakezho thi kesü povota.

Thenomipü thikesürho sü, mu Jairus nupü thimerhüsü

⁴⁰ Jisu sala voritice miko unüshude püzüyi, kekrelamori uko pü meri kebala.

⁴¹ Hi he, mipü Jairus zitipü synagogue lü kezhomi ta vori nekütsü Jisu phece pü reshüta, side püpo tapücelü vorino chota.

⁴² Kekrelamori pünupü mipü lebi kebao tsekerikena bari mhathi bata de sata tolizü vele pü tavozü ticethümako pügü tutu tata.

⁴³ Thenopüpü tütse kerikena thüzakrü tata, pü mhango keyiko metü khipü daru kesemi la ketseva, sizizori püthi kesürhoyi mo.

⁴⁴ Süpü tavori de pü bolaphre nisü, sizi sümetha thüza krümota.

⁴⁵ Jisu poti “sopü a jüsü?” Miko metü pü nimole zi ketasa, Peter püce poti mu püzü ketakosheri, kemethao, thümako n gü tutu ta, (nfüta) no, “sopü anisü” zitola?

⁴⁶ Jisu poti “humi ani süle, kekrelamori kekupü ayo taprate.”

⁴⁷ Thenopü resüyi (kevayi) mota, tatsü pü mhüjülü pü reshüta, dipüla pü tavo pünisüsheri popü thüma metüko mese süta, pü dipü bide sürho mhai tasheri posü.

⁴⁸ Pü thenopüce poti, “Anupü nnütate, n kemelü nthi meve süteho; nlümenü de tavotate.”

⁴⁹ Pü sükopo kebalü, mipü synagogue kezhoo celü tavori, de püce poti, nnupü sateho kemethao kebühitate.

⁵⁰ Vele Jisu süo se kesüce, püfü kelade poti, mpe hite, melü keyi lebizo, sizide thenopü veyito.

⁵¹ Pü celü vori, mipüpori celü lü mota, Peter, James mu John ko lebisa, mu püpo püzuni, (thenopü nepo mu uzuni).

⁵² Miko kra mu thekri thiba, vele pü ukoce poti, “krahite, thenopü satamo, vale zü kebazo.”

⁵³ Uko pükrünyü bata, pü sa keta se kebala.

⁵⁴ Pü ukopo cetavota, pübepü thenopü be ceyi (thezüyi) de poti, relipü, tasürite.

⁵⁵ Pü rüpü sala vorita, rekri thenopü tasürita, süsa pü ketico khapütsüno posü.

⁵⁶ Püpo püzu neko ungophita, vele pü ukopo mhathi kesüko pü mipü ceri pohino, ketüva.