LUKE 4 - KETHOLESI KESAO N.T. (BSI)

Khrista la medo kephi

¹ Jisu Kemesa Rüpü po püchu pü Jordan lü tala vorita, Kemesa Rüpü lüta rayholü vota.

² Zhoheda therükesu po pü kedo, tüsozho hidolü pü mhapüri timo; tüsozho süko tsü ketasa püvameri vorita.

³ Therükesuo pücepoti, no mhace Jihova nu lize ketsü hiopü tsükhri thiyi no posüte.

⁴ Jisu püfü kelakesü, thopü kemeta, thüma tsükhri lebi la hüyi yomo; vele Jihova jükolazo.

⁵ Therükesuo püzü cejütu kerekrü püyo vode vapülü cejülü kedeko metü thapü pü mekasü.

⁶ Side therükesu-o puce poti, keku metü I khapü ntsü süto, mu sülü zapozale metü sheri; kekrelamori süo pü atsü kevala, süo khapü a medomi tsüsü ketola.

⁷ Mhace no süla a reshü va ketosa süko metü khapü nzhü thisü tato.

⁸ Jisu püfü kelade po kesü, no Satan ta asaco votate, thopü kemeta, no Niepo N Rüo lebi reshüto, mu pü lebi choyi thito sizipü mezü.

⁹ Püzüpü Jerusalem lü vori de kereshüce pilülü bayi, de pücepoti, no mhace Jihova nu lize retu süte tsüce;

¹⁰ Kekrelamori thopü kemeta, pü tüyo choyimi ketsüpü nbuyi tato de npo krimo ketola.

¹¹ Nko belü nkekriyi tade npo ketsüyo nphe meshü mo ketola.

¹² Jisu püfü kelakesü, sülü thopü kemeta, “no n Niepo Rüo kedosu.”

¹³ Therükesuo medokephi metü thitsü kevasa pücelü dopüla tata.

Jisu sala ta Galilee lü vori

¹⁴ Jisu Kemesa Rüpü kekulü ta Galilee lü vori; pü kemele ukhü metülü vota,

¹⁵ Pü kereshüce kolü mi metha mele ketabi.

Nazarerth kereshücelü kelü

¹⁶ Pü Nazareth lüvo, sülü pü thekü vori tila, püzho cebi ta kereshücelü Sabbath nhalü, pü tosü thayi de lesiphri sü.

¹⁷ Isaiah lesi khipü tsüsü, pü lesio hasü, hizi thopü metati ngoyi

¹⁸ Niepoo Rüpü ayota, kekrelamori apo jüyikeve popü kedimikoce süno akenhüyi; pü a ketsüpü umelüpro ketako lü thomelu süno, mijükethiko phrüsüno, umhü keceko mhükhri sü, mipo uvü ketako hesü.

¹⁹ Niepoo kenü tütse po mese kesü.

²⁰ Süsa pü lesio khava, khapü kemethao tsü sülava, de bayi kereshücelü kebako metü umhükhrüpü püpe bata, pe türüba.

²¹ Pü uko shudü jüpo, thahi neko nilü jüthopü kemeta thitso süte.

²² Uko metü süo zhopo, pütalü jü keve poprari tikola ungo bata, uko kepode, nu hio Joseph nuzo mome?

²³ Pü ukoce poti, neko ace hibiti potüzoto, “Darukeseo ntho nthi kesürhoyite, hako kesebi Capernaum lüri thisüte, n rüna lüri thisüte, sizito.”

²⁴ Püpo kesü, kethozo, I nekoce po süto, saju kepo mipüri utho ura yinyü yomo.

²⁵ I nekoce kethopo süto Elijah tüce thenosamepü kekro ba Isreal tütse sü mu tekhri shurü türü mota, kemekre cejü metülü bata.

²⁶ Elijah ketsüpü Zarephat Sidon nadelü leti kesüzo, theno samepü celü.

²⁷ Isreal lü lepra kethimi kekroba Elisha saju kepoo tüce, Naaman Syria mipü lebi thi kemenü kesüzo.

²⁸ Kereshücelü kebako mhasüko sekesü ce uko lü redata.

²⁹ Uko tosü pü hupü nade sa (cosa) süva, uko püpi mesode kelhupü thikha lüsü va keto rhüta (cosalü thikha kebala).

³⁰ Vele pü uko dolü ta pücholü vota.

Jisu Capernaum lü v otherürüpüko hu keva

³¹ Püta Capernaum lü ki, Galilee lü nadeo Sabbath nha pü kereshücelü mi metha.

³² Uko pükepo zhokola ungophita, püjü keku kenela.

³³ Kereshücelü thümapü rüpü mesakemo füphra se meto bayo.

³⁴ Poti, hako kebü hite, no hakozü kedipü thita, no Nazareth mi Jisu? No hako meka ketola vorime? I nseba no sopüsheri, Therü kemesao.

³⁵ Jisu pü lekhusü, de poti, no kemekre tate de püyo tapra tate. Kesu rüpü pü kegüdü pü ukodolü süva; püyo taprata, pü methi mota.

³⁶ Uko metü ungothita, de uko kerethi de poti, jühio dipü jüta! Pü keku kene ukopo tatano kesüce kesurüpüko ta pra ketahi.

³⁷ Pü kemelü chozucori sevota, pükhü kewhiko rüna metülü.

Jisu Peter cemizu thi kesürho kesü

³⁸ Pü kereshücelü tasüde ta Simon celü vota. Simon cemizu rüce shüshu ba. Uko püpo thi kesürho süno chota.

³⁹ Pü thenopü pice thayi, de kethio kethisü; süo pükhava tata; rekri thenopü tasü de uko reyi bata.

⁴⁰ Hitüce nace lütazü, kethi kekre kekrori zü puce vori; pübe chopü sükoyo süde thikesürho sü.

⁴¹ Kesurüpüko sede taprata, poti “no Khrista zoti seba ketala.”

⁴² Tüso vori ketace, püta cejü kesalü vota, thümako püphu, ukota puce vori, ta puce voride püzü bata, püpo tata hino pota.

⁴³ Pü ukoce poti, I thethi kekrerari vode Jihova kede popü mice sü mozesu; kekrelamori a ketsü kesü süo tila.

⁴⁴ Pü Galilee kereshüce kolü vo mi metha.