LUKE 24 - KETHOLESI KESAO N.T. (BSI)

Jisu rhüla kesü

¹ Deba zho theranha, keshu rena, uko ta mhakhre lüvo, mharü kethenyüko püvo.

² Uko ketsüo retu zü keta ngo; mhakhreyo.

³ Vele uko ta mhakhrelü kelüce themo-o ngo mota.

⁴ Mha süo la uko ve kedi thitha, sizi metha mi kena ufüne mevashuti khide uko khüce thatha.

⁵ Thenomiko kerepü uko züpüki cejü merüpü bata; vele uni ukoce poti, neko dipüla kesako dolü rhü ketao phuta? Pü hice ba mote, vele rhü süte.

⁶ Pü nekoce kepoko rükra süte; pü süce Galilee lü bazolu tice.

⁷ Thüma Nuo tüpü kephomako belü sü vato, püpü gu kevasa zhosü nha rhüla sütato.

⁸ Süsa uko püjüko rekrayi.

⁹ Mhakhrelü uko salavori, uko mi keripü koce, mu kekreko metüce posü.

¹⁰ Hilü, Mary Magdalene, Joana, Mary James zü, mu theno kekreko ri ta, kha apostleko koce posü.

¹¹ Vele jü süko ketho kemo pü bita, mu uko melü mota.

¹² Vele Peter tasü de ta mhakhre lü vo, neküki pesü, pü linen fünheko lebi ngo, süla püta celü vorita, mhathi ketako püngota,

Emmaus lü kevoni

¹³ Hihe, sünhasü mikena ta Emmaus cholü vozü, Jerusalem zü kemecuti mile thüna mesü.

¹⁴ Uni ta kezhu mhathi ketako, cholü kepovozü.

¹⁵ Uni mhakepo mu mhalü keta tülü Jisu ta unice vode uni züta.

¹⁶ Vele uni mhü thipü pü semova.

¹⁷ Pü unice poti, neni kedipü kepode tavo züla? Uni thayi de uni thüsu bata.

¹⁸ Süsa mipü püza Cleopas püfü kelasü, n lebi sojüsove thide Jerusalem lü ta zotho he, Jerusalem lü mhathi ketako sekemo?

¹⁹ Pü uni ketso sa de poti, mha kedipü la? Uni posala kesü, mha sükosü Jisu Nazareth mi keku mhatho Jihova mhüjülü mu thüma metüko mhüjülü sheri.

²⁰ Hako thevo kezhoko mu krütako pü khapü mejo vade cross yo gu vale.

²¹ Vele hako kelüce Isreal rhakeyi mitho zi bale; Ile, hizi kevasa, tha tüsozho süte.

²² Sülebi mori, hako krolü thenomiko hako kere süte; tsali rena uko ta mhakhrelü vo.

²³ Uko pümo ngomo ta, sülü uko poti, tüyo choyimiko zümholü ngole zita; ukoce pü rhüla süte.

²⁴ Hako kezü kebako humi tavo pe mhakhrelü, de thenoko kepo bi tü pote; vele pü ngomo.

²⁵ Süsa pü unice poti, neko dithedü nyozoshi, mhase thophi, saju kepoko jü melü kemo.

²⁶ Khrista kemezhe keti hiko, thisüzo mome, de pü zapozale lü lüketako?

²⁷ Moses yo shudü vo saju kepo metüko ketho lesilü thopü kemetako po vacho vosü. Sükolü püju thopü kemetako.

²⁸ Uko ta rünalüvoto kezülü meno vota, püta mecu (vazü) vota keto bisü.

²⁹ Vele uni pü vakha sü de poti, thüva te, mu tüso vote, hice batate; mu pü unizü sülü bata tole lüta.

³⁰ Pü uni zü mhaketi miz yo kebace, pü tsükhri püyi de reliphri sü (kechothisü) mu cephro sü mu khapü uni tsü sü.

³¹ Uni mhüko khrisü, uni püseyi ta; mu pü uni mhüjülü ngo mota.

³² Uni hunehu cepoti, chodelü püzü ketace pü amice mhapo ketace avu melü lümü ta zomome? Pü ketholesikolü haphra de po kesü kolü?

³³ Pütü sülü unita Jerusalem lü la vori, mi keripüko sülü kengupü ba ngoyi, mu thüma kekreko sheri ba.

³⁴ Uni poti, Niepoo rhüla süta kethozo, Simon sheri mengosü.

³⁵ Uni chodelü mhathi kesüko pü posü mu tsükhri cephro kesülü unipo püse keyi kopü posü.

³⁶ Uko side theju süko kepo kebalü Jisu pütho ta zolü uko dolü metsulü thapü ba ngoyita; de ukocepoti, thelü kemenü po neko yo bayite.

³⁷ Vele uko keresü de mpe bata, uko kelüce rüpüpü ngoti zotho side lü bata.

³⁸ Pü ukoce poti, neko dipüla nekolü kemezheba? Neko melülü kedipü la mhalü bata?

³⁹ Hihe, abezi mu aphezi ko pesüte, I zole, anite (a jüsüte) de seyite; kekrelamori rüpü utrhi upho uroko bamo, neko kengoce I süko ba.

⁴⁰ Pü jü süko po kesüsa pü bezini mu pü phezi ni pü uko mekasü.

⁴¹ Uko rethu ba ketala melü rü bata, uko ngo thide, pü uko ce poti, neko ketico hu pü tame?

⁴² Uko fü kechü tipü kha pü tsüsü (mefijüsa).

⁴³ Pü süo püyi de pü tiyi uko mhüjülü.

⁴⁴ Pü uko cepoti, mhahiko I neko ce posü, I neko zü ketace, mha popü kemetako metü thitso sü ketola, Moses thezhokolü, saju kepoko mu Chelekolü ala thopü meta tiko.

⁴⁵ Süsa pü khakhripü ukopo seyi, ukopo ketho lesiko seyi ketola.

⁴⁶ Pü poti, Khrista kemezheto, mu sa keta zhosü nha rhüla sürito.

⁴⁷ Thelü rede keyi mu kejo vakesü Jerusalem lü poshüdü de shuye metülü püza pü posü ketola.

⁴⁸ Neko mhahiko zhopo kozo.

⁴⁹ Hi he, apo jüko khapü neko ketsü I ketsüsüto, vele neko Jerusalem nadelü fü türü bate, mesolü kevori neko thi mekusü kemothe.

⁵⁰ Pü uko chothazü Bethany ketso kho, mu pübe chopü uko yosü de jopü uko tsü.

⁵¹ Pü jopü ukotsü kebace uko zü kekhota mu pü khipü tülü vota.

⁵² Uko pü reshüsü, side uko nüshü mu rethu de ta sala Jerusalem lü vori ta.

⁵³ Tüsonha kereshücelü bazota, Jihova chu mu jopü putsü. Amen.