LUKE 22 - KETHOLESI KESAO N.T. (BSI)

Jisu dokhriva keto mharhü

¹ Hi tüce cukevonye khrekhasü kemo tsükhri nye meno bata.

² Thevokezhoko mu thezho keseko Jisu tüpü dokhri va keto chode phu bata, kekrelamori uko thümako mpe ketala.

³ Süsa Satan Iscariot Judas yo lü ta.

⁴ Pü tavo kereshücelü thevokezhoko, mu mhakeseko zü kerethi de kedipü bize pütüpü uko tsüsü to sheri ziti.

⁵ Uko nü shuta de presa khapü pütsü keto kepoi.

⁶ Sülü pü sheri pütü kevengo keyi sa pü tüpü uko tsüsü keto, thüma makro kedice, pü medota.

Thenye rede

⁷ Susa khre khasü kemo tsükhri nye, cukevolü teko pü reshü kethi, tü vorita.

⁸ Süla Jisu Peter mu John ni ketsüsü, de poti, tavo uko cukevo nye nyeketo kerede süte side uko kezü mhatito.

⁹ Uni pü ketsoti, no thethi dipüce hanipo tavo kerede sünyü ba ukola?

¹⁰ Reni süte, “pü poti, neni nadelü talü tice mipü lekhulü jüpü keta ngoyi to. Neni püzü kesü keyice püta dipülü lüta sheri ce sülü neni püsa meji lüte.

¹¹ Ce niepoo ceposüte, kemethao ketsoti, resoce dipü ceba apo methakeyiko zü mhati ketola?

¹² Cebü mesolü thethi kemethipü thapü neni ka süto, ketsopü kemetapü, sülü ukola mhakerede yite.”

¹³ Süla uni tavo pü kepobi mhathipü kemeta ngoyi; mu uni cukevonye kesüyi.

Niepoo kerekra co kesü kesü

¹⁴ Pütülü pü miz ce bayi mu pu sajiko.

¹⁵ Pü ukoce poti, I kemezheti mhüjü neko zü cukevo nye mhaco tinyü shu tatele.

¹⁶ Kekrelamori I neko cekepo, Jihova kedela thitso sü kemothe I mhati sahote.

¹⁷ Süsa pü tehe-o püyi de kemeza (kethezü) posü, de poti, hihi püyi te neko dolü kezayite.

¹⁸ Kekrelamori Therhü-o kedethi vori kemothe I khubüzo krasa hote.

¹⁹ Süsa pü tsükhri pü khiyi de kemeza posü, süsa cephro sü de khapü uko tsüsü. Hibiti thite arekra ta ketola. Athi apho kha neko tsü kesü zoho.

²⁰ Tsükhri ti keyi salü tehe sheri püyi de poti tehe la kesü hio neko la aza kha kesü (mekrü) jükho kesa.

²¹ Vele atü kesüo azü bazo, mu pübe miz yo ba.

²² Thüma Nuo ta tato, popü kemeta bi, vele sopü pütüsüto sheri thüma süo hesheherü.

²³ Süsa uko hunehu ketsode, sopü thüma süo süta.

Sopü kezho thito sheri kebu keta

²⁴ Uko dolü sopü kezhotho thito sheri kebuta.

²⁵ Vele pü ukoce poti, Gentile (Jewmi kemoko) kedeko uthümako pi kekhayo, mu süko cüpü keprakemeve miko ziyo.

²⁶ Vele neko siziho, sizimori neko dolü kezhothoo po natsitho bito, krüta-o po mi thekümi thito.

²⁷ Sopü zhoku sheri püpo mi thekümi mori mi reyimi thito, I neko kemethao miz lü neko reyi ba mome?

²⁸ Neko azü mhakerülü tha.

²⁹ Apo mhapü Amelü kesübi, I sheri mhapü neko melü süzü; kede kethi.

³⁰ Süla neko a miz yo azüde mhati mhakra ketola, a kede kethilü, mu nekopo kedeba keri kena kolü bato side Isreal shuye kerikena kolü uko jünyo (sheco) ketito.

Jisu Peter püphramu ta keto mejü po kesü

³¹ Simon, Simon, renisüte, Satan neko rezo keto cho bate, tehakerezothito.

³² Vele I nla chosüte n kemelü thathi ta mo ketola, no sala vori tice tavo nsazüko thi kethepu süte.

³³ Pü pücepoti, Niepoo I nzü thejü kethilü mu kesalü sheri vo keto kerede pü tazo.

³⁴ Jisu poti, Peter I nceposüto, no vasü asemole ziti amela tato, tha thevü kekhu mhüjü.

Presabü, lekho, mu zecho

³⁵ Pü uko ce poti, presabü, lekho mu pheku samo de I neko ketsü kesüce neko tsakhu teme? Uko püce poti “mhapüri tsakhu mole,”

³⁶ Pü ukoce poti, vele tsüzo, presabü kebami khiyite, sübi lekho kebami ri; mu zecho kedimi ubola zhupü zecho khriyite.

³⁷ Kekrelamori I nekoce kepobi, ketho lesilü thopü kemetako thitsosü ketola, Ayono, “püpü thezho kevarhüko saphri süte, mu sübi ala thopü kemetako thitsü sü tazo.”

³⁸ Uko poti, pete, hice zecho kena ba. Pü uko fü kela kesü, tsüzi zori vete.

Jisu olive cejütuyo kecho kethi

³⁹ Pü tapra pü zhoce kethibi olive cejütuyo vota, mu püsajiko püsa mejivo.

⁴⁰ Pü tavo thethi yo tso keyice ukoce poti neko kechothiyite, medo kephilü lüta mo ketola.

⁴¹ Süsa pü tsüzaphe tsüdü thepülü, chütuyi de kechothi bata.

⁴² Apo, mhace n medo tolize tehe hio acelü khipü tatate, sizori amedomo vele n medo thi yite,

⁴³ Süsa tüyo choyi mipü tavo püthi kethepusü.

⁴⁴ Pü lükemezhe tilü kechothi thehe thiku sasü; mu thüza rekhrü ti kezho retu cejü kita.

⁴⁵ Pü kecholü tasüri tice ta methakeyiko ce pheri mu uko zü renyü ba keta ngoyi, thelü su ba ketala.

⁴⁶ Pü ukoce poti, neko dito zü bata ta süte de kechothi yite, medo kephilü lüta mo ketola.

Jisu tüsü keva mu pü zü ta keta

⁴⁷ Pü jüpo kebalü thüma krodepü ta vori, mipü Judas, kerikenako dolü, ketapü thümakro chothazü vori, pütavo Jisu mebosü, Thüma Nuo tüsü ketola.

⁴⁸ Vele Jisu püce poti, Judas no thüma Nuo tüsü ketola pü mebosü tozüme?

⁴⁹ Püzü kebako mhathi sü keto vori kezü ngo de poti, “niepoo hako zecho pü dosü tome?”

⁵⁰ Uko süsa mipü zecho pü thevo kezhoo cetao uzaco ni zathü va.

⁵¹ Vele Jisu poti, mha hiziti thisa hite, pü ni jüsü mu thi menüsü.

⁵² Süsa Jisu thevo kezhoko, kereshücelü kefüko, mu mehiko ta püce voritiko ce poti, neko zechoko, sürüko, bekhako pü acevori züme, apü thüma kesumi bi?

⁵³ I tüsonha kereshücelü neko züba, neko süce nebe khapü ayo sümo, vele tsühi neko tüte, kezülü ketako keku.

Peter Jisu phamu keta.

⁵⁴ Süsa uko pütüyi de zü thevo kezhoo celü vota; vele Peter kemecu zalü püsa mejita.

⁵⁵ Uko cehükhro metsulü me thisü, de ba metupüba, Peter ukodolü ba.

⁵⁶ Süsa relimipü püpe türü sü, mekevelü, depoti, thüma hiori püzüta.

⁵⁷ Vele pü mole zita, de poti, thenopü Ipüse mole.

⁵⁸ Süsazace mipü püngo sü de poti, “thümao nori mipü zole, püzü ketako. Vele Peter poti, ‘thümao, I mole.’”

⁵⁹ Süsa bavüdopü salü mipü po sala de thüma hiohi kethozo püzü ketami pü, kekrelamori pü Galilee lü kehümi tsüla.

⁶⁰ Vele Peter poti, “thümao, no kedipü poba sheri I semo,” sizi po kebalü thevü füta.

⁶¹ Niepoo regüsü Peter pesü; süsa Peter Niepoo jü püsa lüyi, püce kepo, tha thevü kekhu mhüjü no asemole ti vasü po tato.

⁶² Mu pü ta chozu prade kra shuta.

Jisu krünyü de kemeshu mu püvü keta

⁶³ Hitülü Jisu tüpü kebako pü krünyü m u pü vüta.

⁶⁴ Uko pü mhü juvade mhapü pü ketso, saju po süte, sopü nvü ba sheri.

⁶⁵ Uko mha kekrolü pü meshu (kenga) ta.

Jisu kehu mhüjülü ketha

⁶⁶ Tüso vori ketace mehi miko, thevo kezhoko, mu thezhokeseko tavo kehulü kenguyi, mu uko püzü kehulü vo.

⁶⁷ No Messiah lize hakoce posüte; pü kela kesü, mhace I neko ce posü zori neko melüyi ho.

⁶⁸ I neko ce mhaketso zori neko acepo süho.

⁶⁹ Vele tsüsahi thüma Nuo Jihova keku zaco batato.

⁷⁰ Uko metü pü ketso, “no Jihova Nu zome?” Pü po kesü “neko kepo I le.”

⁷¹ Süsa uko poti, uko zhopo dipü phusa bata? Uko utho seyite pü mülü kepo.