LUKE 20 - KETHOLESI KESAO N.T. (BSI)

Jisu keku ketso keta

¹ Pü kereshücelü mi metha keba pünha, jüyikeve zhopo thi kebace, thevoko, thezhokeseko mu mehiko ta püce vori.

² Püce poti, hako ce posüte, dipü keku khipü no mha hiko thiba sheri?

³ Pü uko fü kelasü de poti, I sheri mhapü neko ketso süto mu afü kela sü mozesu.

⁴ John mipü jülo kepü tülü kirime mori thüma celü vori la?

⁵ Mu ukodolü mha kepo bata, uko lüti, mhace uko tülü kiri; sizilize, pü poketo, neko dipüla melü mota? Zitato.

⁶ Vele mhace uko, thümacelü vori, süsa thüma metü ketsüpü uko zhetato, kekrelamori uko melüti John hi saju kesemi pü ziba tila.

⁷ Uko püfü kelakesü, dipü bi sheri semo, sita.

⁸ Jisu ukoce poti, I sheri kedipü keku pü mha hiko thiyo sheri posü hote.

Tizhe kefümipü jüve

⁹ Süsa pü jüve posüta, mipü khubü yi lüpü meta, süo khapü kefümiko melüsüva, mu uko püse khipüvo pütsü nosü, mu ta rüna kemeculü vo pütü kecho bata.

¹⁰ Pütüce pü cetamipü ketsüpü kefüthümako cesü, ukopo püseko püvo putsü sü ketola; vele uko pü vüva de mechü pühu metava.

¹¹ Pü ceta kekremipü ketsü salasü, uko pü vüva, mu püthi kezhoshu sü, de methu pü ketsüva.

¹² Süsasheri vasüo pü ketsü sasü, mu uko pü reza sü de kelhupü chozu süva.

¹³ Sü tizhe niepoo poti, I dipü thize veta? I anu akhrüo ketsü süto; uko püngo tisa pü resesa sütori se homo.

¹⁴ Vele tizhe kefüko püngosü, de uko dolü mhakepoti, hiohi pü kalü-o tazo, tavorite de uko pü dokhri vakhe sizide uko pü kalü thita khe.

¹⁵ Süla uko pü kegüdü chozu süva, mu pü dokhriva; süla tizhe niepüo-o süko yo dipü thi tata?

¹⁶ Pü tavori de tizhe kefüko meka vato, mu tizhe khapü kekremi tsüvato, uko jü süo sesü de, therüo po süo khavate.

¹⁷ Pü uko ce thapü meka kesü, thopü kemeta dipü poba, ketsü khakeva-o, süo püvo pü külü tsüthisüte zi mome?

¹⁸ Kehopüri ta ketsüyo tsü timi kesüphro vato, vele ketsü süo tatsü pü kesü tisa pü kesü phrephapha pü megünyo thitato.

Khazhonu kekhrü ketso keti

¹⁹ Thevo kezhoko, mu thezho keseko sütülü uko be khapü püyo sütole süta, vele uko thümako mpeta; kekrelamori uko kelüce pü jüve hio popü uko metsu sütho sizi ketala.

²⁰ Uko püla bata, mu salimi ketsü sü, uko kemezimi khravü, uko pü jüpokolü pütüyi ketola, side uko pütüpü kekumi belü sorkari kesümi governor tsüsü ketola.

²¹ Uko pücepoti, kemethao, hako se keba no kemezilü mi methaba, mhacepüri thüma rhota yomo, vele Jihova cho jütho po süyo.

²² Hako po khazhonu pü Caesar ketsü thezho mema?

²³ Vele pü uko do kerü seyi de poti, neko dito a kedo ba?

²⁴ Presapü khapü ameka süte; sopü marhe mu thopü kemeta tsüyo ba? Uko püce poti, Caesar.

²⁵ Pü ukoce poti, Caesar zhüko kha Caesar tsüvate, mu Jihova zhüko kha Jihova tsü vate.

²⁶ Uko thümako mhüjülü pü tüyi hota; mu uko pü kelakesü füla uko ngo phita; side uko kemekre thita.

Jisu Sadducees fü kela kesü

²⁷ Süsa Sadducee mipü ta püce vori, uko rhülakesü bamo le ziyo; mu pü ketsoti.

²⁸ Moses thopü hako ketsü, mhace thümapü sazüjüra dolü sata, pücemi kebapü, pü nune bamo de sata; süsa pü sazüo süo cemi yiyi, thüma mehüpü pü jürao shuye thi ketola.

²⁹ Süko sazüjüra mi thüna ba, mu kerao theno yi, vele pünu di de sata.

³⁰ Mi kena-ori süpü yi, vele nudi thi sata.

³¹ Mi süo sheri süpü yi, sübi de mi thünako metü süpü yi, vele nu di thi satsota.

³² Thelatho thenopü sheri sata.

³³ Süla rhüla kesüce süpü sopü cemi thita? Uko mi thünako metü püyi tila.

³⁴ Jisu püfü kela sü de poti, cejü hilü nuko thenoyi yo, mu nhi siyo.

³⁵ Vele sopü cejü sülü voyi zü sheri rhüla kesü thethilü, kesasalü, theno keyi mori nhi (ceyo) ti bamo.

³⁶ Mori uko sasa hote, uko tüyochoyimiko zü ketüte, mu uko Jihova nuneko thi tato, uko rhüla kesü nuneko thi ketala,

³⁷ Tsüdo, kesami phu merhü kesü, nhatsalü (sünyholü) Moses mengo kesü pü süo cüpü Niepoo, Abraham Rüo, Isaac Rüo, mu Jacob Rüo.

³⁸ Kekrelamori pü kesami Rüo moli, vele rhü kebako Rüo; kekrelamori metüko püla rhütayo.

Jisu lesikeseko ketso keti

³⁹ Lesikesemi pü püfü khosü de poti, kemethao, no po meveshu süzo.

⁴⁰ Süsaco uko pü ketso meprüta.

⁴¹ Pü uko cepoti, kedipü bide Khrista David nu le sizita?

⁴² David sheri chelelü (Ps) lü poti, Niepoo a Niepoo ce poti, no azaco bayite.

⁴³ I n ngomuko pü nphezho thiva kemothe

⁴⁴ David zori pücü pü a Niepoo ziba lize, dipü bide pü nu tata?

⁴⁵ Süsa püfü reni keba thümako pü metha keyi ce poti.

⁴⁶ Lesikeseko yo neceri yite, uko füne rechu süpü mi mhüjülü keta uko nüyo mu methi thethi kolü mipo uko kelü ti reyo mu kereshücelü theba kerekrü kolü ba nyü, mu thenye kolü thethi kemelekolü tanyü phi.

⁴⁷ Uko theno samepüko kedoti tayo, mu mipo ngo ketola kechothi mechoshuyo; süko kemejo ngo mekro kuto.