LUKE 19 - KETHOLESI KESAO N.T. (BSI)

Zacchaeus thelü rede keyi

¹ Jisu Jericholü tavo zü.

² Hihe, mipü püza Zachaeus tipü ba. Pü theso keyimi mu mhaneshu.

³ Pü Jisu sü sopüdipü sheri pesü toli ba, püpeyi mota kekrelamori thüma kebü phi ketala, kekrelamori püda renu ketala.

⁴ Pü mhüjülü lekubo süyo meleku püpe ketola, pü chode sülü vori to kebala.

⁵ Jisu thethi sülü vori, pü tosü pe, de püngoyi, de püce poti, Zachaeus rekri kirite; kekrelamori tha I n celü ba moze kesula.

⁶ Mu pü rekri kiri, pünüshüde püzüyi.

⁷ Uko süo ngosü de jü kebushuta, de poti, pü kephomami so thi to vote.

⁸ Zacchaeus süthayi de poti, hihe, Niepoo azhü phatüpü kha kedimi tsü vato, mhace I kemedalü humi mha khiyi ta lize I zada pü pütsü sala vato.

⁹ Jisu püce poti, thatüsolü kelakeyi ce hilü vorite, pü, sheri Abraham nu zo tila.

¹⁰ Kekrelamori thüma Nuo di ketami phu mu kelato vori.

Presa keri jüve, mu kede thothü ba keta

¹¹ Uko mhasüko sekesü sa pü jüve posasü, kekrelamori uko Jerusalem meno voketala mu uko kelüce Jihova kedekethi vori mha zita totho zi kebala.

¹² Süla püpoti, mipü ta kemeculü vota pü kede khiyi ketola de süsa ta vori.

¹³ Pü mi keriko pücetako cüsü, mu presa (pound) keri pü uko tsüsü de uko ce poti, khipü bate I vori kemothe.

¹⁴ Vele püramiko püngo metsüta, de jüpü kha püsalü, posü, uko thüma hiopo upi kekhaho.

¹⁵ Pü kede kethi khiyi side ta sala vori, pü ceta süko po püce vorite side cüsü, presa pü uko tsü kesüko, uko dithedü meveyi ta sheri pü se ketola, hetho Heli kethilü.

¹⁶ Vori kerao poti, n presako za keri pra yite;

¹⁷ Mu püce po kesü, vewe, no ceta keve, no mha kenilü sheri jütho keyi la npo rüna keri pi kekhatato.

¹⁸ Mi kenao tavori poti, Niepoo npresako za püngu meveyite le,

¹⁹ Pü sübi de po kesü, npo rüna püngu pi kekha tato.

²⁰ Kekre-o (mi süo) püce voride poti, hi he, n presa I khapü mezü (a fünelü kezhü pü meta).

²¹ Kekrelamori I n meprü ketala, no kepatsü shu timipü (nlüsü timi), no khapü meta mori khiyi yo, so (tsava) mori rüyi yo tila,

²² Püpüce poti, n ta kekha vate, I nshe keti tato (nta kepo bi I nsheco süto). No thekü kesu, no seti I kepatsü timi lezi; I khapü meta mori khiyi yolezi; sosü mori I rüyi yole zite.

²³ No dito apresa khapü bank lü (kengu tice) sü meta vama, side apo püpra sheri ngoyi tama?

²⁴ Süsa pü uko ce poti, pukhüce kethako, püyo presa kebao püyi tate, de khapü presa $10 (pound) keri kebao tsüvate.

²⁵ Uko puce poti, Niepoo thüma hio presa keri bale.

²⁶ Pü uko poti; kehopü sheri mhakeba-a pü tsüsa süto, mu kehopü sheri mhalakemoo kebako sheri püyi tato, pücelü.

²⁷ Vele angokemumiko, apo ukopi kekha nyü kemoko, zü hice vorite, side amhüjülü uko dokhri vate.

Melemelu ta Jerusalem lü kelü

²⁸ Mu pü mha sübi po kevasa, pu uko mhüjülü ta Jerusalem lü khota.

²⁹ Püta Bethphage mu Bethanymeno vori tice, cejütu cüpü olive siyo, m pü mi kena püsajini ketsüsü.

³⁰ Poti, ta rünalü, neni mhüjülü lüte, neni talü tice, gada nepü khüpü mezü ngoyito, mipüri püyoo ku kemopü, phrüyite, püzü hice vorite.

³¹ Mhace humi neni ketsode dipüla pü phrü bata? Neni püce po süte, kekrelamori Niepoo (püzü) khimoze su bale.

³² Uni ketsü kesü ni tavo ta, mu uni tavo pü po kesü bide ngoyi.

³³ Uni tavo phrü kebace niepoko unice poti, neni dipüla pü (gadanu) phrü bata?

³⁴ Mu uni poti, Niepoo pü khimozesu bale.

³⁵ Uni gadanu züpü Jisu cevori, mu uko füneko kha gadanuyo khrasü, de Jisu süyo ku bayi.

³⁶ Mu püta kevo cholü uko füko khrasü.

³⁷ Uko ta olive cejütuyo ki kezüce pü metha keyi makro rechü de Jihova chuta, füphra meto seta, uko pü mhatho keku kene thi kesü kola.

³⁸ Kedeo Niepoo zalü kevorio po thejo kepü thiyite; tüyo kezü keve, mu zapozale kerekrüthoo.

³⁹ Phariseemiko humi makrodolü püce poti, kemethao, n sajiko lekhu süte.

⁴⁰ Pü uko fü kela kesü, I neko ce süo posüto, mhace uko kemekretazori, ketsüko rekri se meto prari tato.

Jisu Jerusalem krikra keta

⁴¹ Püta nadeo meno voritice pü süo pesüde pü krikra ta.

⁴² Poti, mhace no n tüso sebalize, ketsatho zori tha tüsohi, nla kezükeve pü voriti, vele süko n mhüce resüte.

⁴³ Kekrelamori pütüpü nce vorito, n ngomuko tekhü chüpü n hu püyito, de nbo yito, mu pükhüko metülü n-hu püyito.

⁴⁴ N khapü cejü mezü vato, mu n nuneko risa, side ketsü püpori kepishu pü bamotato; kekrelamori no nkelakeyi npe kevori semo ketala.

Va kena kereshüce thi kemesa kesü

⁴⁵ Püta kereshücelü lüde mhazhu, mhakhri kebako hu metava.

⁴⁶ Ukoce poti, Ace pü kechoce thi keto ketho lesilü tho meta, vele neko süo thipü keregomiko keba cepü thi bate.

⁴⁷ Pü tüsonha kereshücelü mimetha zo bata, vele thevo kezhoko, lesikeseko, thüma kezhomiko pü dokhriva keto rhü ba zota.

⁴⁸ Uko pü, mejo keto phumedita; thümako püfü reni türü ba ketala.