LUKE 15 - KETHOLESI KESAO N.T. (BSI)

Pharisee miko panyo keba

¹ Süsa mali miko mu kephomamiko püfü renitole vori.

² Pharisee miko mu thezhokeseko panyode poti, Thüma hio kephomako zü mhatiyole.

Diketa tekonu jüve

³ Pü ukoce jüve hio pü posü.

⁴ Neko mipü teko krapü keba dolü pü mediva lize hethecü thecü khapü nhalü mezüde tavo pü diketa-o phu kemo sopüba?

⁵ Pü süo ngokeyice pü pübokayo süyi rechü tavorito.

⁶ Pücelü voride pükhretho mu püzanu miko cü kenguyi de ukocepoti, azü nenüyite, kekrelamori a teko di ketao ngoyi ketala.

⁷ Sübi tüyo sheri kephomamipü thelü rede keyila unüyo, mi hethecü thecü kemathoko thelü rede mori vetiko.

Presa medi keva jüve

⁸ Mori thenopümipü presa keri bade pü mediva lize pü me metosü de celü chokemesasü presa süo phukemo so püba, ngoi kemothe?

⁹ Thenopü süo ngoi ketasa püzümiko mu püzanuko cükenguyi de poti, azü nenüyite kekrelamori I presa medi kevao ngoyi ketala.

¹⁰ Sübi I neko ceposüto, tüyo Jihova choyimiko kephoma mipü thelü rede keyila u nüyo.

Diketa nu jüve

¹¹ Püpoti, thümapü pünu thepumi kena ne,

¹² Natsio püpo cepoti, apo, amha azhü mesüko kha atsü vate; mu mhakezapü unitsü va.

¹³ Tüsozho hu sa natsio pü mhako khiyi de ta chokemecu rünalü vota; sülü pümhako pü kesu kethilü ketse bata.

¹⁴ Pü süko ketsetsi kevasa, rena sülü thekre vorita, pü mhamenyü ta.

¹⁵ Pü tavo rüna sülü thümakocevo, mu mipü püpo thevo vi bata, yikolü.

¹⁶ Pü merita mu thevo co sheri pü püvalü sünyü bata, mipü ri mhakha pütsü mota.

¹⁷ Pü mhalü vorita, de pütho pü rethiti, apo choyi kethimi mizhokhripü ketako mi ditsupü ketikekra ukechu thitasü mu sükezü sheri siri I meripü satato züte.

Sala kevori

¹⁸ I tasü de apo ce votato, mu püce posüto, apo I tüyo kehümiko mu n mhüjülüri phomate

¹⁹ I n nune le pori shümote, apo no mi zhokhri pü keta thekümi pü thi tato.

²⁰ Pü tasü de ta püpo cevota, vele pü rapeco ketalü püpo püngosü de tavo püvo cho püyi de pü mebosü.

²¹ Nuo püpo cepoti, Apo I tüyo kehümi mu nmhüjülüri phomate, mu I nnune thiyi shü mote.

Kenühü

²² Vele püpo thekükoce poti, pü füne kevetho khipü vorite (Kedefüne) kha püpo bemene yite, bekha ri kha pübelüsüte, pheküri khapüpo püyite.

²³ Metho upho kevetho püvo dokhriyite, side uko mhati mhakra unü tolekhe.

²⁴ Kekrelamori anu hio satari rhüyite, medi vari ngo sala yi ketala. Uko süla unü bata.

²⁵ Hitüce pünu pethio yilü ta, de celü meno vorizüri tsale kethifü mu nasü keba sesü.

²⁶ Pü thekü mipü cüsü de dipü bibata sheri ketso.

²⁷ Pücepokesü, nsazüo tavoritele, mu npo thodo (or Tholi) upho keve dokhripü (Ukopoti) Kekrelamori pü sürho tade la vori keta la.

²⁸ Pünümota (pülü redata) mu pü ta celü lü muta; süla püpo ta prade püshu (pünüpo) de pürethi (püpo celü lüte side).

²⁹ Püpo ce pü poti, hihe, I tütse kekro n choyi thita, mori ncho vajo (n nümothi) vamo, no po kesüko mhapü ceri zümo ta mozo; siziri no tekone püri kha atsümo, apo azümiko zü anü ketola.

³⁰ Vele n nu hio n mha n zhüko khipü vo kethamiko (thethenuko) zü di ketseva, no metho upho keve dokhripü pütsüsü.

³¹ Pü po pücepoti, Anu no kechotheazü tazo, amha azhü kebako metü nzhüzo.

³² Neko unüti mesü, rechü ti mesü, nsazüo ditari ngoyite, satari rhüyi ketala.