LUKE 12 - KETHOLESI KESAO N.T. (BSI)

Jisu Phariseeko khreyo menuyi mo kesu kepo

¹ Thüma phriphayi keho tavo kengu keyice uko hunehu kedü vota, pü sajiko cepoti, Neko Pharisee kethera ketako khre yo menu yite.

² Hupü kemetako mhapüri kehala sümo taho; mori resü ketako semo keta bamo.

³ Süla no tüzülü pokesüko cetuyo po mese metosüto.

⁴ Azüneko I nekoce posüto, uthiupho dokhri ketio mpe hite, uko süpi mhathisayi keto basamote.

⁵ Vele I mejü neko sopü mpe moze susheli posüto, mpe moze kesuo sü dokhri kevasa ne kegüdüpü mezalü sü va ketoo pü keku keneo, I posüto pü mpe yite.

⁶ Cükhra püngu pü presa kena khriyi yo süko püri Jihova mhüjülü rükramo keta bamo (semo keta bamo)

⁷ Vele npithapri metü phriyi te, neko mpe hite, kekrelamori neko cükhra kekroce sheri uma neku.

⁸ I neko ce posasüto, kehopürei thüma mhüjülü aza phrakesüo, Niepoo sheri tüyo Jihova choyiko mhüjülü süko phrasüto.

⁹ Vele thüma mhüjülü a phramu ketami I sheri tüyo Jihova choyiko mhüjülü phramo tato,

¹⁰ Kehopü sheri Nuo kemetsu kepomi, kejovasü to vele Kemesa Rüpü kethami kejo vasü ho.

¹¹ Uko neko zü synagogue kolü, shecomiko, mu kekumiko cevoto; neko kedipü poto sheri mhalü kedodu tahite.

¹² Kekrelamori Kemesa Rüpü bavüdo sülü mhapo kezüko nceposüto.

¹³ Thüma krolü mipü püce poti, kemethao ajürao ceposüte, püpo kalü mhako azü kezayi ketola.

¹⁴ Pü pücepoti, “thümao, sopü a thipü mha keza ketimi thisü tola mori shecomi thisü ta, neko pi?”

¹⁵ Pü ukoce po kesü, menuyite, mhakeholü uce riyite, thümapü kehülü mhakekro kengu keyilü bamotila.

¹⁶ Pü jüvepü ukoce po kesü, kenemipü cejülü mhakekro ngoyi.

¹⁷ Pütho pülü lüti, I kedipü thita, kekrelamori amhako kengu yi keto thethi basa mote.

¹⁸ Pülüti, I hizi thito, ahaceko cele (rhü) vato, de thi mezhoyito; mu sülü ahako mu azhüko kha kenguyi tato.

¹⁹ I athi apho cepoti, relüyite, no mhakekro tütse kekrola kengu metave; krokrü tate, ti mu krade nnü bata te.

²⁰ Vele Jihova püce poti, no kemeloo, tsüzi n yo nrüpü zü tata to; sizitalize mha süko sopü zhü thitata, no ntho nla mha kengupü kemetako?

²¹ Süla sübi pütho püla mhakengu yo, vele Jihova la pü mhane kemoo sizi tato.

²² Pü sajiko cepoti, süla I neko ce posüto, nekehü la mhapüri medo thahite, no dipü tita, mori n mola dipü khi be meneta ziti.

²³ Kerhü (kehü) ketico ce veku, mu uthiumo sheri fünece veku.

²⁴ Tüyo rako rele lüsüte, uko tsava mori rüri yomo; uko tühace mori kengu ketice ri bamo, Jihova süko va thori thiyo, (ntheküyo) neko sükoce veku mome, türakoce?

²⁵ Neko mhalü medo kebala ne botho thepü ri thi pü rekrükuyi tome?

²⁶ Mhace neko mha kenithoo zori thiyi ho lize, dipüla ne dipüthide mhakekreko lü medo ba?

²⁷ Rübapü rele lüsüte, dipü bide uko hü mu mabaya, uko mhathi yomo, uko terhi thi (tachozü) yomo, siri I neko ce posüto, Solomon tho zori pü retso therho kethi thoce sheri keretso pü süko bimo.

²⁸ Mhace Jihova nha tha hüba sedo khapü melü süva keto retso thisüyo süze dithedüpü neko retso thisü mota; neko kemelü kediko.

²⁹ Neko dipü ti mu krato sheri süko lü hite, süko la nelü kemezhe de kehokero thi hite.

³⁰ Melü kemomi süko phu tayo, mu neko poneko süko khimoze kesu seba,

³¹ Vele Jihova kede kethi phu mera yite, mhasüko metü kha neko tsü süto.

³² Mpe pa hite, kro ketsako, neko po Pü kede kha neko tsü keto pü medo ketala.

³³ Neko, mhakebako zhu yite, kha ketsakhumi vaphi süte; neko khapü ne lekholü süyi, sühü po tiva keho cene, tüyo dita keho mhangu, kerügomi ri mori mhothsü tiri khipü tata keho.

³⁴ Kekrelamori n mha nzhü kebara n melü sheri sülü bayo.

³⁵ N chephayi mo n metopo tovekrüyite.

³⁶ Thüma uniepomi nolü hülü la vori ketofü kebabi, pü, sala ta kevori ce tavo cekha kedü sülize uko rekri cekhakhri süyo tibi.

³⁷ Choyimi füba uniepomi kevorice ngokeyi miko thejo kepütho; I neko ce posüto, püvori de püchephayi to, mu ukopo bayito, mhati ketola, side pü renapü uko tsüto.

³⁸ Mhace pü rifü kenalü vori lizo mori süolü vori zori tavo uko fü keba ngoyi tisa süko thejo kepütho choyiko.

³⁹ Hihi seyi te, mhace thüma kevemi kerügomi vori keto seba lize pü fü türü bato, mu püce mipo thi mesu vaho.

⁴⁰ Neko süla kerede pü bate, thüma Nuo dipü tülü vorito sheri sekemola. (Nelüba kemolü vori ketola).

⁴¹ Peter pücepoti, Niepoo jüve hiopo hakoce mori metü koce posü home?

Mha kepemi mu pücetami pü ju

⁴² Mhakepe mipü Niepoo poti, jütho mu mhase ti cetami pü thipü mi kekhati thisü, püce pe ketola, ketico pü pütü tülü ukopo mhatiyi; sopü siziyi veta?

⁴³ Pü niepoo la vori tice sizi ba ngoyi lize veto.

⁴⁴ I nekoce posüto, pü khapü pümha püzhü metüpi kezhoo (kepeo) thi tato.

⁴⁵ Vele cheta süo pülü lüti a niepoo la vori mhai hote, mu pü choyi miko thepu thenoko vü bata mu keti kekra thi mezü bata.

⁴⁶ Ceta süo niepoo lüba kemo pülü vori ta, tüsozho, bavüdo, pü füba kemolü pü dothü phapha vato, mu pü khapü melü kemoko thethi lü sü vato.

⁴⁷ Ceta süo pü niepoo medo semo, pü kerede pü bamo, mori pü thino kesüko ri thimo, süla va kekro sürü pü püvü süta.

⁴⁸ Vele mhapüri sebamode mhathi ba ketao süpü vüzori kedopü kevü zoto; kekrelamori mhakekro mha melü kesüo püyo mhakekro choto, mhakekro khikeyi miyo mhakekro püpo khasüto.

Khrista thüma keza kesüo

⁴⁹ I me kha cejülü süketola vori, I kedipü thita, mhace süosü to bata lize.

⁵⁰ Vele I jülo kepü püba, mhatho süo thitsüyi kemothe I thazoto.

⁵¹ Neko I kezükeve khasü tole lübame, cejülü? Mo, sizi mori kelükreti khasüto.

⁵² Kekrelamori mipüngu cepülü kebako misü mikena metsu tato, mu mikena misü metsu tato.

⁵³ u Po pünu metsuto, pünu püpo metsu tato, unupü püna metsu tato, püzu pü nupü metsu tato; thenopü pünu cemi metsu, pünu cemi püzu metsu tato,

⁵⁴ Pü ukoce posa kesü, neko kemhü nakroco prari kezü ngo lize türü ta keto neko poyito, sübiu türü vori tayo.

⁵⁵ Mekhroco tükhra voriti neko ngo lize, neko poti, tü thi tato (lütato) sizi bayo, mu sübide tülü tayo.

⁵⁶ Ne kethera ketako, neko tü mu cejü züyo kevekesu seyi ve; vele neko tsütülü kevekesu se kekre yi hola?

⁵⁷ Ile, neko thozori kemezi seyi hola?

⁵⁸ No n ngomumi züde shecomi (teshe keti) cevo, neko tsüdo thi kebabi, neko khapü pübelü süva lize, pü neko khapü sheco mi tsü vato, mu shecomi ne tüpü thejü celü süva keto lü mu seyite.

⁵⁹ I nekoce posüto, no sülü tayi ho tato presa kenitho (thela) shutsüsü kemothe.