LUKE 11 - KETHOLESI KESAO N.T. (BSI)

Jisu kechozho

¹ Jisu kechothi keba tüpülü thethi pülü kechothi la ketace, mipü püsameji tade püce poti, Niepoo John püsajiko metha kesübi no sheri kecho kethizho thapü hako meka süte.

² Pü ukoce poti, neko kecho kethice hizi thite, hako po tüyokebao, nza kemesao thiyite, Nkede thivorite; Nmedo thiyite cejülü hiri pü tüyo bi süte,

³ Thathava (tüsonha) kha pü hatsü süte.

⁴ Hako kephoma va hatsü süte, hari mi hakoyo kekri ketako vapü ketsübi. Hazü medokephilü lühite, siziti mole keshülü hakela yite.

Utü kemolü kevori züo jüve

⁵ Pü ukopoi, neko humi ukhrethomi ne de mesotülu ta pücevo, de püce poti, Azü-o, tsükrida sü kha atsü süte.

⁶ Kekrelamori azümipü revü ace voritele, mu I mhapüri khapütsüti bamote.

⁷ Pü celü bade lüti, akebü hite, cekha khave, anuneko sheri azü thezilü züte, Itasü mhapü ntsüsü hote.

⁸ I nekoce posüto, pütho tasü mhakha pütsü mozosheri, süo püzümi tila pütü kemoce zosheri, pü tasü de mha pü sümokesudü khapü tsüto.

⁹ I nekoce posüto, chote khapü tsüto, phute, ngoyito; cekha kedüsüte, khri pütsüto.

¹⁰ Kekrelamori chotimi ngoyiyo, kephumiri ngoyito, cekha ketu kesümi ri cekha khripü pütsüto.

Mipone pü kejüvekesü

¹¹ Mhace miponepü unupüce tsükhri cholize pü ketsü kha pütsü tome? Mori mhace füpü chosü ze tenhipü pütsü tome?

¹² Mori pü thevüjü cho süze, seba khapü tsütome

¹³ Mhace nekesumi zori mhakeveko kha nenuneko ketsü do se lize, neko Po tüyo kebao Kemesa Rüpü kha pücecho kebako tsümo tome?

Jisu therükesu Beelzebub khi therükesuko hu ketapü pümejo keti

¹⁴ Pü therükesu jüpoyi keho rüpü husü. Kesu rüpüo taprata, jüpoyi kehoo jüpo yita, süla thümako ungothi ta.

¹⁵ Vele humi poti, Beelzebub, therü kesuko kezhoo züde kesu rüpüko huba.

¹⁶ Humi pü medophide tüyo zasi phuta.

¹⁷ Vele pü uko lüdo seba, süla ukoce poti, kede kehopüri kezaphro ta lize pü kede ditato; cekro kengomude kezata lize cekrosüo retu tato.

¹⁸ Mhace Satan sheri püdolü kengomu ta lize pü kede dipü bide bayita? Kekrelamori neko lüti, I Beelzebub zü rüpü kesuko zü tayo ziba.

¹⁹ Mhace I Beelzebub zü rüpü kesuko huba lize, nenu thepumiko sopü züde huya? Süla neko ne ketito (sheco süko).

²⁰ Vele mhace I Jihova kede voriba keta sejo mote, nekoce vori bate.

²¹ Thüma kekumi keredepü pükedeba füba tisa, pümhapüzhüko krü bayo,

²² Vele püce kukutimi püce vori talize, de pümeniva, pü melü keba rineko khi pütata, de püzhüko mpre yita.

²³ Sopüno azü tamo sheri pü ametsu ta, sopüno azü mha kengu kesayo moshele pü mha püzhüko kelhu vayo.

U tho kethi kelhü rede keyi kemathozho

²⁴ Therükesu rüpü thüma püyo taketa ce, pü thethi keshükolü voyo, pü kerelü thi phude, ngoyi mo ketace pütasala pükehüthi tapra ketalü lavo tayo.

²⁵ Pü tavori tice ce süo methu ba mu ketsopü mezü ngoyi.

²⁶ Pü tavo püceri sukuti rüpü thüna züvoriyo. Uko tavori sülü hüta; thümasüo kehü thelaco keraceri suku tayo.

²⁷ Pü süko po kethace, theno mipü pü krolü semeto de poti, “thenomi nobu sopü n nune pü sheri thejokepütho, sosopüpü no sheri.”

²⁸ Püpoti. Vele, Ile, süo ceri sopüno Jihova jüko reni mu khiyi sheri süo thejo kepütho.

Jonah sa yo zasi

²⁹ Thümako tavo kefükeyice pü ukoce poti, tsünumihi nuhü kesupü, uko zasi phutayo, zasi kha uko tsü hote, Jonah saju kepo yo zo kemosa.

³⁰ Jonah yo zasi khapü Ninevimiko tsüsü, sü bide thüma Nuo yo tsü kehü nuko tsü süto.

³¹ Mekhroco kedepü sürei de tsünumiko yo sheco thito, de uko mejo tato; kekrelamori pü cejü valalü tavori de Solomon mhase ri ne, hihe, Solomon ceri zhoku tipü hice tha.

³² Nineveh thümako tasü tsünumi zü thayi de uko mejo tato, kekrelamori uko Jonas zhopola thelü redeyi ketala; Hihe, Jonas ceri zhoku tipü hice tha.

Meto kha kejüve kesü

³³ Mipüsheri meto khapü keresülü süva yomo, mori kha merhakhro süyo mo; vele kha metobayo süde thüma kevoriko po mhango ketola.

³⁴ Themo kevesü umhüzo, nmhü ve kebala upho (nmo) metü vekrü bayo; vele nmhü vemo ketasa npho metü züte.

³⁵ N yo keba kebao la menuyite, zübüta mo ketola.

³⁶ Mhace nmo metü vekrü ba lize, püceri zü ta moze, meto keve mhava vekrü keba bi.

³⁷ Pü mhapo kebace Pharisee mipü püpo tavo pücelü mhatino püphu vori, pü tavo de mhati ketola bayi.

³⁸ Pharisee-o püngo kesüce pübe metü ra kemola püngo thita, mhaketi mhüjü.

Jisu Phariseemiko kesu kerho po süta

³⁹ Niepoo pücepoti, tsühi ne Phariseemiko chozuco tehe mefü thikemesa phiyo, vele ulüco mhakesu kelü mu kerhoko chu pü tayo.

⁴⁰ Ne kemeloko, chozu thi kesüo thelü laku sheri thisü mo me?

⁴¹ Vele mhakha mitsü mi Za süte, no thi kebabi, hihe, nla mhametü mesazo.

⁴² Vele ne Phariseemiko kesukerho, nreko zakeri zapü mhakenitho kori khasüyo, gako sheri, si neko yo Jihova kekhrü zalü kejütho mu kekhrü di no; hiko thiti mesüzo mu kekreko sheri thimo keta mesümo.

⁴³ Phariseemiko, kesukerho, neko Synagogues kolü theba kerekrü kolü ba, duka kolü thüma kelu tayo.

⁴⁴ Phariseemiko, lesikeseko, yo kesukerho, kethera ketako; neko mhakhrelü ngokemo bi, thümako sükoyo ta voyo upi se kemola

Jisu kesurho popü thezho keseko ce kesü

⁴⁵ Thezhokesemipü püce poti, kemethao no hako sheri meshude pobate ile,

⁴⁶ Pü pokesü, neko thezhokekhiko yo kesu kerho, mipo püyi keho thezhoko kha mipo püyo, mo neko becüne sheri püjü yomo.

⁴⁷ Nekoyo kesu kerho, neko saju kepoko mhakhre chüsü de neponeko süko dokhri süyo.

⁴⁸ Nepo neko thi kesü neko zhopo kozo, uko süko dokhri süzo, neko süko mhakhre chüsü.

⁴⁹ Süla Jihova mhase po kesü, I saju kepo mu Apostleko ketsü süto, süko humi ukopo dokhri to mu methi meni to.

⁵⁰ Thajü saju kepoko za mekrü kesü metü vo thaketso tsüdo nuhüko po shu tato.

⁵¹ Abel za mekrü kesülü vo Zacharia ketso kereshüce dolü mu kereshüba yo; I nekoce potüsüto, süko metü vo tsü nuhüko yo kutato.

⁵² Neko thezho kekhikoyo kesukerho, neko mhase cabi khipü tate, neko sheri thiyomo mu mipori süko zümu.

⁵³ Mhahiko püpo kesüsa, lesikeseko mu Phariseeko püpo mhaposasü ketola pu kethuta.

⁵⁴ Püri bata, mu pütalü kepo tüyi ketola side pü mejo ketola.