LUKE 10 - KETHOLESI KESAO N.T. (BSI)

Mi hethüna pü mhüjülü ketsü kesü

¹ Mhahiko salü Niepoo thüma kekre hethüna ketsüsü, mikena na de pü mhüjülü ketsü pü nade metülü sü, pü voketo kolü.

² Pü ukocepoti, yirü keto bashüte, vele rüketomi tsarizo, süla yi Niepoo ce chosüte, püpo yi kerümi ketsüpü yirülü sü ketola.

³ Tavote, I neko ketsü süzüho, teko ketsü pü sace dolü kesübi.

⁴ Presabü, mori pheku, mori lesi sheri püta hite; cholalü mipüri reshütahi.

⁵ Celü kehopülü lü sheri, theralü, thelü kemenü (kezüküve) po cehilü bayite side posüte.

⁶ Mhace cesülü kezükeve ba lize thelü kemenü süo bayi toho, molize thelü kemenü süo n yo la vori tato.

⁷ Ce sülü keti kekra khapü n ketsüko timu krayite, kekrelamori mha kethimi püzhokhro ngokeyi mesü, cepülü ba zote, kekrelü vo hite.

⁸ Neko nade kehopülü lüzori mi mhakhapü neketsüko timu krayite.

⁹ Kethimi thi kesürho süte, sülü, side ukoce Jihova kede vori ba keta posüte.

¹⁰ Vele neko nadelü kelüce, mi neko züyi muta lize, rüna sülü tapra tate, ne pra kezüce hiziti posüte.

¹¹ Nyopha ne nadelü hako phe kopü ketako sheri kekhupü ne rüna metsu süzüho, Jihova kede nece vori.

¹² Vele I nekoce posüto, sünha rüna süo ju Sodom rüleno hüyi reyiku tato.

Jisu nadeko pü mesu keto

¹³ Hesheherü chorazin, hesheherü Bethsaida, mhatho ungo keti thipü Tyre mu Sidon lüko sü lize nece thi kesüko biti, hi mhüjü uko thelü rede batato, de uko gakhrofü mu megünyo lü bata te vele.

¹⁴ Vele jünyo keti ketonha Tyre mu Sidon ni rele neko relece reyiku tato.

¹⁵ Capernaum no nthi kerekrüpü kho tüyotso keba thi siri n kelhupü mezalü sü vato.

¹⁶ Somi nekofü reni sheri afü reniyi, somi neko thalice ta sheri a thalice tazo, süla a thalice ketami sü aketsü kesüo thalice tazo.

¹⁷ Mi hethünako rethu (rechü) de ta sala vori, de poti, Niepoo therükesuko sheri nzalü hako khrote (füzüthite)

¹⁸ Pü ukoce poti, Hihe, Satan tüyo metha kekrithi cejü kiri keta I ngo ho.

¹⁹ Hihe, I keku pü nekotsüve, nhibü, sebako kedü vaketo, neko ngomuko pi keku mhapüri neko methiva keho.

²⁰ Mhasükola neko nüta hite, rüpüko kha neko khro sükevala; vele neko za thopü tüyo meta ketala neko rechü yite.

²¹ Pütü sülü Jisu ri rechüto, pü rüpülü, de poti, “I n meza, Apo, tücejü Niepoo, mha hiko kesemi mu kemerhüko mhüjülü kevapü meta de halapü natsi theba thejüko meka sü, Apo, sizi ti n nü ketala.”

²² Apo mha metü khapü atsü süte, mipüri Nuo sü semo, vele Pootho seba; mori mipüri poo semo, vele Nuo thozo, mu Nuo tho Poo sü thapü mika süyo.

²³ Pü regü metha keyiko ce vode uko ce poti, nemhüpü mha kengoko rüku thoko (thejo kepütho).

²⁴ Kekrelamori saju kepoko mu kedemi kekrosheri mha hiko ngosü nyüshu vorizo, vele ngo mote; neko keseko sesü nyüshuzo vele uko semote.

Thezho kesemipü Jisu ketsoti

²⁵ Thezhokesemipü süthayi de pü kedo ketola pü ketsoti, kemethao, kechothe kehü kalü thiyi ketola I kedipü thimoze suta?

²⁶ Pücepo kesü, thezho lesilü dipü thometa? No dipüle zide phriba?

²⁷ Püfü kelakesü, no n Niepoo n Rüo khrü mu rhoyite nmelü metü, nkeku metü, nkhrirarü, metü, n kelü metü; mu nsüzanumi sheri khrüpü ntho n kekhrü biyite.

²⁸ Püce pokesü, no potü süzo, hibi thiyi te, mu size no rhüyito.

²⁹ Vele pütho mezileti thinyü de Jisu cepoti, sopü asüzanumita?

Samaritanmi khapü kejüve kesü

³⁰ Jisu püfü kela kesü, thümapü Jerusalem lü ta Jericho cholü kizü, ri ta süketimi dolü lüta, püfüneko khiva, pü rezasü, de pü khava tata, pü vüpü phesa mezüva.

³¹ Pütüsüce thevomipü cho sülü tavo, püngo zo vele pü chorhe tata.

³² Levimipü ta sülüvo, püngosü thethi sülü cho kekrepülü ta vota,

³³ Vele Samaritanmipü revükhi pü kezülü vori, püngosü de püphi mezheta.

³⁴ Ta püce phe de pü rezakuko therü mu phasü, tirü mu hezo lapü süko khrüva, pü khapü pü khonu (gada) yo süyi, de pü züvo prolü süde pü theküsü.

³⁵ Süsanha pütata, pü presa (raka) kena pü (pü theküo tsüsü) cieniepo-o tsüsü, de püce poti, pü thekü menu bate, I tala kevori ce no mhakekre ketse kevako I shupü ntsü vato.

³⁶ Thüma misüko sopü mizhü süti ketako belü kemezhe ketao süzanuta?

³⁷ Pü pokesü, püphi mezhe kesüo zo, süsa Jisu püce poti, nori tavo sübiti thisüte.

Martha mu Mary ni zhorele kekreketi

³⁸ Uko tavo kezüce, püta rüna pülü lüta, thenomipü püza Martha siti püba, püzüvo pücelü süyi.

³⁹ Pü sazüpü za Mary, pü Jisu phe ceba de jüko reniba.

⁴⁰ Vele Martha choyi kethi renade merezoba, ta püce vori, de poti, Niepoo, asazüpü alebipo mhathoko la mere zoba tino n lüni mozome? Püpo tavori akhrühi süno posüte.

⁴¹ Jisu püfü kelasü de püce poti, Martha, Martha, no mha kothi mere zoba, mhakekrolü.

⁴² Vele khimokesu, mhacopü lebizo, Mary no mhakeve süo kedayiteho, mha süo pücelü khipü tata hote.