JUDE 1 - KETHOLESI KESAO N.T. (BSI)

Swüdü dzü

¹ Jisu Khrista cieta-o mü Jakob sazüwo Judah no khapüh kumünupü u Po-u tho thimu shieyiküta mu Jisu Khrista zalü khapü müta küta ciyikütako cie küshü.

² Ngokümüzhie nieko kütsü, vetho kükhrü samükro shüte.

³ A kükhrüko, müthi kulaküyi dzüh a künü mütü süh die thopüh nieko cie küshü mü süo nieko cie thoshünyi bou kücü süo nie tarhopüh kümülü lü ba-i küto thadzü vapüh kümüsako cie shü küvao zo.

⁴ Kükrelamoli thüma humi mükhre guh udolü lü küta la; süko sazho dzüh thadzü thopüh müta ta. Süko kütho küthi mamo, kümünupü ngokümüzhie küdiepüh kürüyolü shüküvako: Nyiepoo u kümünupü püh zo mü Nyiepoo Jisu Khrista pha kümoko zo.

Küciedzü kümüthako müjoküto

⁵ I süna thadzü nieko shievoküta dibin Nyepoo Egypt mi tüjülü thüma kropüh külayi, mu mülükümoko müka küshü nieko po rükralayi nyite.

⁶ Süsa tülü choyimi kropüh thadzü u tho u küzho süh bayi mota die uko tho u batü-o kha küvako püe süko khapüh küzü khrikhrolü küchothe phapüh kütsokücü tüso küzho-u khü bata.

⁷ Sodom mü Gomorrah ni bin rüna lüco kübako uzho u rüle kümha utho u khapüh kükhrüküzu cülü shü, süsa thüma zhokümo kürüzhüko thi ta tie. Süna küchothe meza lü sazho ngoi die thakapuh thipüh batazo.

⁸ Süsü bin müsakümo u mhokümako uthi upho va mürho umhü küzhomi mütü mü zapozalie küthimishie krenyi ta yo.

Küciedzü kümüthako zhorüle

⁹ Thadzü Michael tülü choyi küzhoo thonu thürüküshüo zü no Moses mo küso die küpali kücülü püh müjo mpe ta die “Niepoo tho n müjo to” shita.

¹⁰ Dei hiko mhapühyi shiekümo zo shie-yi krenyita o, hikoe u lulu shieküba lüshie u zho küshü khonu bi die sükola utho katao.

¹¹ Süko cie-i kükrelamoli pühnieko Kain cholü vo mu zhokhro ngoi kütana tashü Balaam kükriküta dzü shie-i zei mu Korah nuko punieko mhuküzhomi dzü zimo küsülü katsota.

¹² Thüma hikohi nieko kükhrü tühü küthicie nieko zü hikücülü kürhodapü küta kropüh tüku kükhüko mpie modie u tho u va phuti-o kücükro, tükhra po hüshüküta kümhüko dzüshie ta kümo, tüsicie sü püshie küdi küsa sai sa kücü pü mieko chieluzo küva sübo kropüh.

¹³ Utho ula mulula zoküto dzüküzho raphü zokuzhü kropüh küchothe tüzü bu kücü khapüh uko muri taküta rühu sei ta küzhü thünyie kropüh zo

Thasa küciedzü kümüthako müjoküto

¹⁴ Adam zolü hüküpa pho thünao Enoch sadzü küshie dzü po die Heyi! Nyepoo pu kümüsako nyie küri züh vo.

¹⁵ Shishie-i püh thüma mütüko kütsoto mu uko kütholükümo mhatho thiküvako, uko kütholükumo thümako, süsa kütholükümo küphomako pu zo dzüküre poküva mütü küjo thashü kato.

¹⁶ Thüma hiko unümosüdie pacü pano mü künotao küzüko zo. Uko ta lü dzüpo khobou ta cüzo. Uko uko küpa ngoküyi lüdie mirho ta-o cüzo.

¹⁷ Dei a kükhrüko nieko Nyepo Jisu Khrista Apostelko thadzü po küshü dzüko rükrashüte.

¹⁸ Süko nieko cie po küzü pütü thülatso thüma kütholükümo u münyi utho u müdo thikütami küthükrezo kücü kropüh süto.

¹⁹ Thüma süko mi püphoküta kropüh zo, uko thümo mhashie sa ropü di.

²⁰ Dei a kükhrüko nieko Kümüsa Ropüo lü choba die nieko kümülü kümüsa thoo zalü ve kühü ma ma zo yi te.

²¹ Nietho niekhapüh u Jihova kükhrülü bayi mü küchothe kürhero ngoyi küto la u Nyepo Jisu cielü küpa ngo kümüzhie khüba zote.

²² Nieko humi ula kre ba ma? Süko ngo müzhie yite.

²³ Soo kükreko meza lü tüshüpayi die külayi, u thi u pho la ukhü unie rütsonyieko va murho küvako rutsi-i zo yi te.

Jude thüjo kücho

²⁴ Cüsa niephie müsükütolü niepo thayi kütola mü niepo jota modie püh tho zalie thikütolü u nüthori küto na no.

²⁵ U kümünupü uko külakiyi-o püh lübi mhashie, Pühpo cü mü küchothie zapo zalie küdie mü kukuo thiyi te. Amen.