JOHN KÜRAO 3 - KETHOLESI KESAO N.T. (BSI)

Jihova nuneko

¹ Hey, u Po u khrüpü küdithüdü püh thi siküti lüsüte. U püsü Jihova nune thitaleküti, Siyilizo, u rei seyita zo.

² cejüo u se mo kükrelamole pü seyi moküta la zo, uko tsürei Jihova nuneko thite, mu tsüsa u küdipüh kümhato shi mülemülu mozolu. Sirei pü mi mhüngo thi voküto ce pü kümha zotoküti u se bate; Kükrelamole u pü küdipüh kümha ba shi u süo ngo zotoküti la.

³ Mu thüma kühopührei pü la sadzu süo künyemi pu müsaküti kümha u po rei u thikümüsayi noyo.

Jihova nuneko thürüküsüo zu kümürhaküti

⁴ Thüma kühopührei küphomathiyo küzhomi thüzho kümo rei thiyo; mu küphomami-e thüzho kümo zo.

⁵ Mu neko se mülemülu bate; u küphomako pü taküta-o, mu püyolü küphoma püh rei bamo.

⁶ Thümakühopührei nepo yolü ba sühyo küzhomi phomatayo mo; thüma kühopührei phomatayoküzhomi pü ngoirei mo, morei pu seyi rei mo.

⁷ A nune kütsüko, mipührei po neko swükütseivahite; thüma kühopührei mathoyoküzhomi pü mathoyoküti kümha sümi rei matho zo.

⁸ Thüma kühopührei phomayoküzhomi thürükürüzhü-o celü zo; Kükrelamole thükürüzhü-o nnhannhalü phoma tata zo küti la Jihova nuo thadzü mi mhüngo thi voriküti kükrelamole pü thürü kürüzhüo mhathoko thi müdivaküto la zo.

⁹ Thüma kühopührei u Niepoo Jihova yolü u münuyi kütami küphoma thitayo mo. Süsü pütsa püyolü basühyo kütila, küphoma thitayo mo.

¹⁰ Hihi la Jihova nuneko tha mülemülu süh bazo, mu küshü-o nuneko rei sa, thüma kühopührei mathoküti thiyokümomi sükoe Jihova celü vorimo mu mhapüh cerei u sazüdzüra khrüyiyo mo.

Hunehu khrüyinoküti

¹¹ Silizo upo huniehu khrüyinoküti neko nnhannhalü dzüo seküyi süo zo.

¹² Cain kürüzhüo celü pütho pü sazüo dokhrikütakümha thizü mo. Silizo küdipüh la pü süo dokhriva ra? Kükrelamole pü mhathoko zoe süo mu pü sazüo mhathoko müzi zo küti la.

¹³ A sazüneko cejüo neko rütsüyozo sherei neko ngo hite.

¹⁴ U u sazümi khrüyoküzho la küsao cuh kürhülü pataküti u se bate. Thümakühopührei mi khrüyokümomi küsalü bayo zo.

¹⁵ Thüma kühopührei pü sazüdzürami rütsüyoküzhomi mi küdokhrimi zo; mu küchothe kürhü lü mi küdokhrimi lü bayo moüküti neko rei se bayo.

¹⁶ Pü püpho khapü u pho sü thivaküta-o la. U süla kükhrü-e küdipüh shiküti seyiyo; Silizo u rei u sazüdzürami la u pho khasüyi zü.

¹⁷ Siseri thüma kühopührei cejü nyoko bade pü sazüdzürami kütsakhu ngosüri pülülü mi ngomüzhie küprao khayita lizo Jihova pü celü küprao kükhrü küdipüh kümha de pü yolü baita?

¹⁸ A nune kütsüko uko dzü mu u ta lübizomole, mhatho mu kütho süh mikhrüyi khe.

¹⁹ Sülizo, u küthoo lüpazo leküti seyito, mu ulülü rei mhasetüi tato, pü mhodzüce.

²⁰ Kükrelamole u lüe umüjoyo lizo, Jihova u lü cezhoku mu mhamütükoseyoküzho la.

²¹ Kükhrüko, u lü-e u müjoyo molizo, u Jihovamhodzü lü u küthüpu nebate.

²² U pü dzü khaküsüko züyo mu pü küngo ce mha pü nüyoküzho la, u mhakühopüh chorei u pücelü ngoiyo mu süko püceyo pünü.

²³ Mu püdzü kha u ceküsü kümha u po Pün u Jisu Khrista zalü mülüyi de hunehu khrüi no küti, süo pü dzü zo.

²⁴ Mu thüma kühopührei u khaküsüko züyoküzhomi pülü bayo mu pürei süo lü bayo. Silizo pu u lü bayo le küti pü khapüh u kütsü Ropüo la u süo seyiyo.