JOHN KÜRAO 2 - KETHOLESI KESAO N.T. (BSI)

Khrista u kükhrühio zo.

¹ A nune kütsüko neko po phomata mo kütola I dzü hiko thopü neko ce süzü ho mu humi mhanuü phomatayo lizo, U poo zü küba u ukil kümathoyo Jisu Khrista bazo.

² Mu pue u küphomako la u rütho thiküvayo zo; Sirei uko la lübizomolie cejü mütü la rei sa.

³ Mu u pü seyita le küti seyiküta kükrelamole u pü dzü khaküsüko züyoküti la zo.

⁴ Thüma kühopührei I pü seyo isi de pü dzü khaküsüko züyokümomi kücejümi zo, mu küthoo pü lülü ba mo.

⁵ Sirei thüma pü dzüo thüzüsüh kübami Jihova celü küpa kükhrüo pü lülü batsühkütho zosüyolü u pü lü ba leküti seyiyo.

⁶ Thüma kühopührei pü lülü bayo leküzhomi sümi rei Khrista kümha tüi zü.

Thezhokesa

⁷ A khreko I neko ce dzü khaküsü küsa pührei thosümo zo. Sirei dzükhaküsüko küvüo süosü neko nnhanhalü sühkübao zo. Dzükhaküsüo küvüo süosü nnhanhalü seküyi dzüo zo.

⁸ Süsa I dzü khaküsü püh thopüh neko ce süzü, mha süo püyolürei mu neko yolürei kütho zo. Kükrelamole küzüo ditazü mu küveo küthoo zü ve pa bataküzü la.

⁹ Thüma kühopührei küveo lü bayole side püthopü sazüdzürami mütsüyo küzhomi tsürei küzü lü ba zolu.

¹⁰ Thüma kühopührei pü sazüdzürami khrüyo küzhomi küveo lü bayo, mupütü kühopüh cerei püla thüphe kümüsü pührei ba mozo.

¹¹ Ele thüma kühopührei pü sazüdzürami mütsüyo küzhomi küzüo lü bayomu küzüo lü tayo. Mu küzüo pü mhü thi mücieküva la pü dipüh cievozüshi sürei seyo mo.

¹² A nuneko kütsüko I thopüh neko ce süsüyo. Kükrelamole, püza-o la neko küphoma vasüküva la.

¹³ Miponeko nekoe nnhannhalü kütao seyiküta la I thosü neko cesüzü, khriesako, neko küsüo mho kuyiküta la I thopüh neko ce süzü, Anune kütsüko nekoe poo seyiküta la I thopüh neko cesüvate.

¹⁴ Mi poneko nekoe nnhannhalü kütao seyiküta la I thopüh neko cesüvate, khresako, nekoe ku, mu Jihova dzüo neko lü bayo mu neko küsüo mhokuyi kütala I thopü neko ce süvate.

¹⁵ cejüo rei mu cejülüküta zhüko khrü hizote. Mhanuü thüma kühopührei cejüo khrüyo lizo, u poo celü küvo kükhrüo pülü bamo.

¹⁶ Cejü lü zhüko mha süko uthi upho münyiko, mu umhü münyiko cesücene kemeko ketsü ukülhülü kümako küzüko zo, mu süko u poo celü mole, cejüo lü zhü ketsü la.

¹⁷ Mu cejüo mu sülü münyiko ditazü, Sirei thüma kühopührei Jihova nü thiyoküzhomi küchothe bayo.

Khristangomuo sü küto

¹⁸ A nune kütsüko, thüla tüo sü vobate; mu Khrista ngomuo votazüküti neko seyiküta kümha tsürei Khrista ngomuo kükro sü bate; süyolüsüna thüla tüo sü vo bataüküzü u seyiyo.

¹⁹ Süko uko dolü ta pa tazo. Sirei süko u kromi rei mozo; kükrelamole süko u kromi le lizo. Süko u zü bazoto le, sirei sükoe u kromi mozo le küti mi po seyiküto la siküta zo.

²⁰ Silizo nekoe kümüsao celü künhüküyi ngoite, mu neko mha mütüko seyiyo.

²¹ Neko yisü küthoo semo leno I thopüh neko ce süsü mo; sirei neko süo seyoküzho la mu küthoo lü kücejü pührei ba kümo la.

²² Jisu-e Khrista zo li küti po phra muyoküzho sa kücejü-osü sopüh ta? U Poo mu pü Nuo phra muyoküzho sü Khrista ngomuo zo.

²³ Thüma kühopührei Nuo süo phrasü muyoküzhomi u Poo puceco mo; Thüma kühopührei Nu süo phrayoküzhoo u poo rei puceco ba zo.

²⁴ Neko zoe nnhannhalü seküyio süo po neko lü bazoi; neko nnhanhalüseküyi süyolü ba ze Nuo lü ba mu u Poo yolü bayito.

²⁵ Mu pü thadzü popüh u tsüpü küta küchothe kürhüroo sü dzü süo zo.

²⁶ Neko swü kütsiva nyiyoküzhoko dzu I dzü süko thopüh neko ce süvate.

²⁷ Silizo, neko zoe pü celü künhüküyi ngoküyi-o neko lü bayo. Süla neko mipo neko müthaküti thi morive; ale pü neko künhüküyi-o tho mha mütüko dzu popüh neko kayo, mu süo kütho zo, mu kücejüo ba mo, süla süo thapüh neko mhüngo thiküsü kümha neko püyolü bayite.

²⁸ Mu silizo, A nune kütsüko, neko püyolü baite: bayi lizo, pu mi mhüngo thi voküto ce pu mhüdzülü mungatayilho.

²⁹ Pumathoyoküti neko seyiyolizo, kühopührei mathoküzhomi pü yolü u münuyi zoküti nekorei se bato.